Skip to main content
x
ክቡር ሚንስተር

ክቡር ሚንስተር

[ለክቡር ሚኒስትሩ አንድ ሙስና ውስጥ የተዘፈቁ ሌላ ሚኒስትር ደወሉላቸው]

  • ሄሎ ክቡር ሚኒስትር፡፡
  • ማን ልበል?
  • ኧረ እኔ ነኝ ስልኬን ረሱት እንዴ?
  • ውይ ወዳጄ አንተው ነህ እንዴ?
  • ምን ባክህ አንድ ችግር አጋጥሞኝ ነው፡፡
  • ምን ክቡር ሚኒስትር?
  • እሱን በኋላ እነግርሃለሁ፡፡
  • ለማንኛውም ምን አስደነገጠዎት?
  • እንዴት አልደነግጥም?
  • ምነው?
  • ስማ ሰሞኑን እየተፈጸመ ያለው ነገር አያሳስብህም እንዴ?
  • እኔም እኮ እሱን ብዬ ነው የደወልኩት፡፡
  • አሁን ምንድን ነው የሚውጠን?
  • ክቡር ሚኒስትር በዚህ ወቅት እኔን ባያማክሩኝ ይሻላል፡፡
  • ምን ማለት ነው ሥራውን አንድ ላይ አይደል እንዴ የሠራነው?
  • ለዚያ እኮ ነው ሥራውን መጀመሪያ ያመጡት እርስዎ ነዎት፡፡
  • ቢሆንስ ታዲያ?
  • ስለዚህ መውጫ መንገዱም እርስዎ ጋ አለ ብዬ አስባለሁ፡፡
  • ለመሆኑ አንተ ጋ ዶክመንት አለ?
  • እኔ ጋ ያለውን ዶክመንት ለማጥፋት ጥረት እያደረግኩ ነው፡፡
  • ምን አደረግከው?
  • ካዝና ውስጥ ቆልፌዋለሁ፡፡
  • አሁኑኑ አውጣና አቃጥል፡፡
  • ይሻላል ክቡር ሚኒስትር?
  • በአፋጣኝ አቃጥለው አልኩህ፡፡
  • እንዳሉ ክቡር ሚኒስትር፡፡
  • እኔም ጋ ያሉትን አቃጥያቸዋለሁ፡፡
  • በጣም ጥሩ፡፡
  • ቅድም ስልክ ራሱ የጠፋብኝ ዶክመንት አጠፋለው ብዬ ኮንታክቶቼን በሙሉ አጥፍቻቸው ነው፡፡
  • ክቡር ሚኒስትር?
  • አቤት፡፡
  • ዶክመንቶቹ ግን ከእኔና ከእርስዎ ውጪ ሌሎች ሰዎች ጋም ይገኛሉ፡፡
  • እኔም የጨነቀኝ ጉዳይ እሱ ነው፡፡
  • ምን ተሻለ ታዲያ?
  • ዶክመንቱ ያላቸው ሰዎች ጋ ስልክ ልደውል ብዬ ፈራሁ፡፡
  • ምን አስፈራዎት ክቡር ሚኒስትር?
  • ስልኬ ይጠለፋል ብዬ ነዋ፡፡
  • ስልኩ ላይማ ስለልማት ምናምን ብለው ሸፋፍነው ያውሩና በአካል ተገናኝተው ያነጋግሯቸዋ?
  • ስማ እንደዚህ የማደርግበት ሞራሉም ድፍረቱም የለኝም፡፡
  • ለምን ክቡር ሚኒስትር?
  • ሌሊቱን ሳልተኛ ነው የማድረው፡፡
  • ክቡር ሚኒስትር ይኼን ያህልማ አይረበሹ፡፡
  • ስማ ፊት ለፊቴ የአገር የመድኃኒት ብልቃጥ ነው የተደረደረው፡፡
  • ብዙ አይጨነቁ ስልዎት?
  • የሚጠብቀን ምን እንደሆነ ታውቃለህ?
  • ግፋ ቢል መታሰር ነው፡፡
  • እኔ የማልፈልጋት እሷን እኮ ነው፡፡
  • መታሰር ብርቅ ነው እንዴ?
  • አንደኛውን ብታሰር ይሻለኝ ነበር፡፡
  • እንዴት?
  • ይኸው አንዴ ስኳር፣ አንዴ ደም ግፊት ተጫወቱብኝ፡፡
  • ክቡር ሚኒስትር የበለጠ እየተጨናነቁ ራስዎን አይረብሹ፡፡
  • አሄሄ፡፡
  • ለማንኛውም አንድ ጉዳይ ስላለኝ ወደዚያ ልሂድ፡፡
  • እኔም በቃ ሻንጣዬን ላዘጋጅ፡፡
  • ከአገር ሊወጡ ነው እንዴ?
  • መግባቴ ስለማይቀር ልብሴን ከአሁኑ ላዘጋጅ ብዬ ነው፡፡
  • የት ነው የሚገቡት?
  • ቂሊንጦ!

[ክቡር ሚኒስትሩ ከሚስታቸው ጋር እያወሩ ነው]

  • ሥራ አትሄድም?
  • እስቲ ተይኝ፡፡
  • ምንድን ነው ይኼ ሁሉ መድኃኒት?
  • አንቺ ነሽ ለዚህ ሁላ የዳረግሽኝ፡፡
  • ምን አደረግኩህ ደግሞ?
  • አንቺ አይደል እንዴ የገፋፋሽኝ፡፡
  • በል በእኔ እንዳታላክክ፡፡
  • ለነገሩ ‘ሴት የላከው ሞት አይፈራም’ አሉ፡፡
  • ተረትህን እዚያው፡፡
  • ይኸው ምክርሽን ሰምቼ ሊጠፍሩኝ ነው፡፡
  • ማን አባቱ ነው የሚጠፍርህ?
  • እንዲህ እያልሽ ነው ጉድ የሠራሽኝ፡፡
  • ነገርኩህ በእኔ አታሳብ፡፡
  • እና በማን ላሳብ?
  • አንተ ራስህ አምነህበት ነው የገባኸው፡፡
  • ምኑን?
  • ሙስናውን፡፡
  • እንዴት?
  • መንግሥት የሚከፍልህ ደመወዝ እንደማይበቃህ ታውቃለህ፡፡
  • እሱማ ይኼን ሁለት ቤት የሠራሁት እዚች እዛች ብዬ ባገኘኋት ኮሚሽን ነው፡፡
  • ታዲያ በእኔ ለምን ታሳብባለህ?
  • ይኸው ያቺ ኮሚሽን ለስኳርና ለደም ግፊት መድኃኒት ዳረገችኝ፡፡
  • ሰውዬ ተረጋጋ፡፡
  • እስር እኮ ነው የሚጠብቀኝ፡፡
  • መንግሥት የሰጠውን መግለጫ አልሰማህም እንዴ? አንተ አትታሰርም አልኩህ፡፡
  • እና ማን ነው የሚታሰረው?
  • ዳይሬክተሮቹ!

[ሰሞኑን ከታሰሩት ዳይሬክተሮች መካከል የአንደኛው ሚስት ለክቡር ሚኒስትሩ ስልክ ደወሉ]

  • ሄሎ ክቡር ሚኒስትር፡፡
  • ማን ልበል?
  • ‹‹ማን ልበል?›› ይሉኛል እንዴ ክቡር ሚኒስትር?
  • ስላላወቅኩሽ ነው ይቅርታ?
  • እርስዎ ሳይገቡ የእኔ ባል ገባ?
  • ፓርላማ ነው?
  • እሱማ ቢሆን በምን ዕድሌ?
  • አላወቅኩሽም ይቅርታ፡፡
  • ባሌ ታስሮ እርስዎ ሊንደላቀቁ? መቼም አይሆንም፡፡
  • ይቅርታ የእኔ እመቤት፣ ባልሽ ማን ነው? አንቺ ማን ነሽ?
  • ባሌን አደፋፍረው ያንን ሁሉ እንዲሠራ ያደረጉት እርስዎ አይደሉ እንዴ?
  • ውይ ውይ የእኔው ጉድ ነሽ እንዴ?
  • ትዝ አልኩዎት አይደል?
  • በሚገባ አስታውሻለሁ፡፡
  • ክቡር ሚኒስትር በአፋጣኝ ባሌን ያስፈቱልኝ?
  • በምን አቅሜ?
  • እኔና ልጆቼ በየቀኑ እያለቀስን ነው፡፡
  • ምን ላድርጋችሁ ታዲያ?
  • ባሌን አስፈቱት አልኩዎት?
  • አልችልማ፡፡
  • ለነገሩ አንድ ነገር ገብቶኛል፡፡
  • ምን?
  • ሹመት ሹመቱን ለራሳችሁ ትወስዳላችሁ፡፡
  • እ…
  • እስር እስሩን ደግሞ…
  • እ…
  • ለበታቾቻችሁ!

[ለክቡር ሚኒስትሩ አንድ ሀቀኛ ሚኒስትር ደወሉላቸው]

  • ሄሎ ክቡር ሚኒስትር፡፡
  • ማን ልበል?
  • ምነው ምነው? ያንን ሁላ ዘመን ተደዋውለን ዛሬ ስልኬ ጠፋዎት?
  • ውይ በሞትኩት አሁን በድምፅ አወቅኩዎት፣ እንዲያውም ስፈልግዎት ነበር፡፡
  • ለምን ፈለጉኝ ክቡር ሚኒስትር?
  • እንደ እርስዎ ሐቀኛ ብሆን ይሻለኝ ነበር፡፡
  • ይኼ ዛሬ ነው እንዴ የታየዎት?
  • መረረኝ እኮ በጣም፡፡
  • ያኔ ስኳሯን ሲልሷት ግን ጥማዎት ነበር፡፡
  • ምን ላድርግ? ወድጄ አይደለም፡፡
  • እኔ በደህናው ዘመን መክሬዎት ነበር፡፡
  • ያኔማ ጆሮዬ መቼ ይሰማ ነበር?
  • ለነገሩ ያኔ ስኳር የሚልሱበት ምላስዎ ብቻ ነበር የሚሠራው፡፡
  • ተወኝ እስቲ፡፡
  • ምን እያሰቡ ነው ታዲያ?
  • የልጆቼ ጉዳይ በጣም አሳስቦኛል፡፡
  • ያኔ ነበር ይኼንን ማሰብ፡፡
  • ወይ ጣጣ?
  • ለመሆኑ የዛሬውን ስብሰባ ለምን ቀሩ?
  • የትኛውን ስብሰባ?
  • ሂስና ግለሂስ የሚያደርጉበትን ስብሰባ ነዋ፡፡
  • አይ ቤቴ ሂስና ግለሂስ እያደረግኩ ነበር፡፡
  • ከማን ጋር?
  • ከስኳርና ከደም ግፊት!

[ክቡር ሚኒስትሩ ከሰዓት በኋላ ቢሮ ገቡ አማካሪያቸውም ቢሯቸውን በርግዶ ገባ]

  • ውይ፡፡
  • ምነው ደነገጡ ክቡር ሚኒስትር?
  • ሊወስዱኝ የመጡ መስሎኝ ነው፡፡
  • ለነገሩ ምን ያለበት ዝላይ አይችልም አይደል የሚባለው?
  • አሁንማ እንደፈለግክ ስደበኝ፡፡
  • ኧረ ልሳደብ ፈልጌ አይደለም፡፡
  • አሁን ክብሬ ከእኔ ርቋል፡፡
  • ይኸው እኔ ራሴ ክቡር ሚኒስትር እያልኩዎት አይደል እንዴ?
  • ተወው ባክህ፡፡
  • ምነው?
  • ከጥቂት ጊዜ በኋላ ምን ብለህ እንደምትጠራኝ አውቀዋለሁ፡፡
  • እንደዚህማ አይጨነቁ ክቡር ሚኒስትር፡፡
  • ሕዝቡ የሚለውን ስላልሰማህ ነው፡፡
  • ደግሞ ሕዝቡ ምን አለ?
  • እየተሰናበተን ነው እኮ?
  • ምን ብሎ?
  • ‹‹ደህና ሁኑ ሌቦች፣ የዛሬ ሚኒስትሮች የነገ ኢንቨስተሮች›› እያለ፡፡
  • ቀልድ ግን እስካሁን አልተውም ማለት ነው?
  • ይኸው አሁን ሊቀለድብኝ እኮ ነው?
  • ለመሆኑ ሰሙ?
  • ምን?
  • ፓርላማ አስቸኳይ ስብሰባ መጥራቱን?
  • ዕረፍት ላይ አይደለን እንዴ? ምን ተፈጠረ ደግሞ?
  • ለዓርብ ስብሰባ ተጠርቷል፡፡
  • ችግር አለ እንዴ?
  • ሊነሳ ነው አሉ፡፡
  • የአስቸኳይ ጊዜ አዋጁ?
  • ኧረ አይደለም፡፡
  • ታዲያ ምኑ ነው የሚነሳው?
  • ያለመከሰስ መብት!