Skip to main content
x
ክቡር ሚንስተር

ለክቡር ሚኒስትሩ የአንድ ማተሚያ ቤት ባለቤት ደወለላቸው

[የክቡር ሚኒስትሩ ሚስት ስልክ ደወሉላቸው]

  • ምነው ብሩን ጠዋት ሳትሰጠኝ ወጣህ?
  • የምን ብር?
  • የድግሱን ነዋ፡፡
  • የምን ድግስ ነው የምታወሪው?
  • የእህቴ ልጅ ልትመረቅ መሆኑን ነግሬህ አይደል እንዴ?
  • እሱማ ነግረሽኝ ነበር፡፡
  • እስካሁን በጀቱን ከቢሮ አላስፈቀድኩም እንዳትለኝ?
  • ወይ በጀት?
  • ስማ አንድ ሺሕ ሰው ልጠራ ነው ያሰብኩት?
  • እየቀለድሽ ነው?
  • ምን ችግር አለው? አንተ ከቢሮ ሁለት ድንኳን ታስመጣለህ፣ ከዚያ ሦስት ሠንጋ መጣል ነው፡፡
  • ይኼ ሁላ ከየት ይመጣል?
  • ከመሥሪያ ቤት በጀት አስለቅቅ፡፡
  • ወይ ጣጣ፡፡
  • ስማ በአብዛኛው የሚጠራው እኮ ባለሀብትና ባለሥልጣን ስለሆነ ድግሱን ስም እናወጣለታለን፡፡
  • ምን ብለን?
  • ልማታዊ ድግስ፡፡
  • አዲስ መመርያ ወጥቷል ሴትዮ፡፡
  • የምን መመርያ?
  • እንደዚህ ዓይነት ድግሶች የሚከለክል፡፡
  • ስማ መስሚያዬ ጥጥ ነው፡፡
  • ምን እያልሽ ነው?
  • ማን ደግሶ ማን ይቀራል?
  • አልገባኝም?
  • እነሱ ልጆቻቸውን አስመርቀው ከጨረሱ በኋላ መመርያ ማውጣት ምን ይባላል?
  • ምንም ማድረግ አልችልም፡፡
  • ቀስ ብለው የውጭ ጉዟችንንም ይከለክሉናል?
  • አልሰሜን ግባ በለው አሉ፡፡
  • ማለት?
  • የውጭ ጉዞም ተከልክሏል፡፡
  • ይኼማ ሊደረግ አይችልም?
  • ተደረገ እኮ ነው የምልሽ?
  • ባለፈው ሳምንት እኮ ነው የአሜሪካ ቪዛችንን ያሳደስነው፡፡
  • ምን ላድርግ ታዲያ?
  • አሁንስ አልበዛም እንዴ?
  • ወይ ጣጣ፡፡
  • አሁን ልጆቹን ምን ልንላቸው ነው?
  • በቃ የአሜሪካ ጉዞ እንደቀረ ንገሪያቸው፡፡
  • ስማ መቼም አያናግሩኝም፡፡
  • ምን ይሻላል ታዲያ?
  • አሜሪካም ባይሆን ሌላ ቦታ እንውሰዳቸው፡፡
  • ሌላ የት?
  • ዱባይ፡፡
  • ውጭ አገር የሚባለውማ ከጥያቄ ውጪ ነው፡፡
  • ታዲያ ልጆቹ የት ሄደው ይዝናኑ?
  • አገር ቤት፡፡
  • አገር ቤት? ለምን አትጥሰውም ታዲያ?
  • ምኑን?
  • መመርያውን፡፡
  • የሚጠብቀኝን ታውቂዋለሽ፡፡
  • ታዲያ ከሕዝቡ በምን ልትለይ ነው?
  • አልገባኝም?
  • እንደዚህ ዓይነት ጥቅማ ጥቅም ካላገኘህ ምን ይሠራልሃል?
  • ምኑ?
  • ሚኒስትርነቱ!

[ለክቡር ሚኒስትሩ የአንድ ማተሚያ ቤት ባለቤት ደወለላቸው]

  • የጠፋ ሰው ከየት ተገኘህ?
  • ደርሷል ለማለት ነው የደወልኩት ክቡር ሚኒስትር፡፡
  • ምኑ ነው የደረሰው?
  • ካላንደሩና አጀንዳው፡፡
  • ምን?
  • ምነው ደነገጡ?
  • ከቢሮ አልደወሉልህም እንዴ?
  • እኔ እኮ እንዳይደውሉልኝ ብዬ ሌላ ሥራ አቁሜ ነው የእርስዎን ሥራ ያስቀደምኩት፡፡
  • ወይ ጣጣ፡፡
  • ክቡር ሚኒስትር በጣም እንደሚወዱት እርግጠኛ ነኝ፡፡
  • እ…
  • አጀንዳው በስምዎት ነው የታተመው፡፡
  • ወይ ጉድ፡፡
  • ክፍያው ሲፈጸም የእርስዎንም እፈጽማለሁ፡፡
  • ምን?
  • ኮሚሽን!

[ክቡር ሚኒስትሩ አማካሪያቸውን ቢሮ አስጠሩት]

  • ፈለጉኝ ክቡር ሚኒስትር?
  • የአዲስ ዓመት አጀንዳዎቹ ታተሙ?
  • አዲሱ መመርያ አልደረሰዎትም እንዴ?
  • የምን መመርያ ነው?
  • በመመርያው መሠረት ከዚህ በኋላ አጀንዳ ማሳተም አንችልም፡፡
  • ባለፈው እሱን ሥራ እኔ ወስጄ አጀንዳዎቹ ታትመዋል፡፡
  • እንዴ ክቡር ሚኒስትር?
  • ምን ታፈጣለህ?
  • ያስጠይቀናል ብዬ ነው፡፡
  • ማን ነው የሚጠይቀን?
  • ኦዲተር ነዋ፡፡
  • ለምን ተብሎ?
  • ወጪ ቀንሱ ተብሎ ፎርም ተልኮልናል፡፡
  • እና ወጪ የምንቀንሰው አጀንዳ ባለማሳተም ነው?
  • እህሳ?
  • ስማ ወጪ የሚቀነሰው ሌላ ነገር በመቀነስ ነው፡፡
  • ሌላ ምን?
  • ሠራተኛ!

[ለክቡር ሚኒስትሩ በሰሞኑ የሙስና ዘመቻ ንብረታቸው ከታገደባቸው ባለሀብት አንዱ ይደውላል]

  • ሄሎ ክቡር ሚኒስትር፡፡
  • ማን ልበል?
  • ድምፄም ጠፋዎት?
  • ማን ነህ?
  • ያኔ በየቀኑ ምሳና እራት እንዳልበላን ድምፄም ጠፋዎት?
  • አንተ ውሽማዬ ነህ እንዴ ከእኔ ጋር ምሳና እራት ትበላ የነበረው?
  • ተውት እስቲ፡፡
  • ለማንኛውም ስልኩን ሳልዘጋው ማንነትህን ተናገር?
  • ልጅዎን ውጭ የማስተምረው ሰውዬ ነኝ፡፡
  • ውይ የእኔው ጉድ ነህ እንዴ?
  • እንደዚህ ዘንግተውኛል?
  • በስልክህ ለምን አልደወልክልኝም?
  • አልሰሙም እንዴ ክቡር ሚኒስትር?
  • ምኑን?
  • ንብረቴ እኮ ታግዷል፡፡
  • ምን?
  • አዎ ከሰሞኑ የሙስና ዘመቻ ጋር በተያያዘ ንብረቴ ታግዷል፡፡
  • አንተ ሙስናው ውስጥ አለህበት እንዴ?
  • ኪኪኪ…
  • ምን ያስቅሃል?
  • ወደው አይስቁ አሉ፡፡
  • ምን እያልክ ነው?
  • ለባለሥልጣናት የምሰጠው ስጦታ ራሱ ሙስና መሆኑን አያውቁም እንዴ?
  • በል ራስህን እዛው ቻል?
  • ምን እያሉ ነው?
  • ማንን ለማነካካት ነው?
  • እሱማ የማይነካካ ማንም አይኖርም፡፡
  • እና እኔንም ሙሰኛ ልትለኝ ነው?
  • እሱን ወደፊት የምናየው ጉዳይ ይሆናል፡፡
  • አልገባኝም እስቲ አብራራልኝ?
  • እኔን ከረዱኝ ሙሰኛ ላይሆኑ ይችላሉ፡፡
  • ምንድን ነው የምትቀባጥረው?
  • ክቡር ሚኒስትር ተደብቄ ነው ያለሁት፡፡
  • ለምን?
  • መንግሥት በንብረቴ ከመጣ ለእኔም እንደማይመለስ ገብቶኛል፡፡
  • ታዲያ እኔ ምን ላድርግህ?
  • እንዲረዱኝ ነዋ፡፡
  • ምንድን ነው የምረዳህ?
  • ሀቀኛ ባለሀብት መሆኔን አሳውቀው ከነገሩ ነፃ ያውጡኝ?
  • ሥራህ ነው ነፃ የሚያወጣህ፡፡
  • ክቡር ሚኒስትር እኔም ቤተሰቤም ተረብሸናል፡፡
  • ታዲያ እኔን ሰላምና መረጋጋት ነው ያለህ ማን ነው?
  • ቀልዱን ትተው ቢረዱኝ መልካም ነው፡፡
  • እያስፈራራኸኝ ነው?
  • ክቡር ሚኒስትር በችግርዎ ጊዜ እንደደረስኩልዎ ያውቃሉ፡፡
  • ታዲያ ሰው መርዳት ባህላችን ነው፡፡
  • አሁን እኔም ችግር ላይ ስለሆንኩ የእርስዎን ዕርዳታ እሻለሁ፡፡
  • አንተ የሚያስፈልግህ ዕርዳታ ሳይሆን ፀሎት ነው፡፡
  • ክቡር ሚኒስትር ነገሮች ፈር ሳይለቁ ቢረዱኝ ጥሩ ነው፡፡
  • ባልረዳህስ?
  • ተያይዘን…
  • እ…
  • እንገባታለን!

[ለክቡር ሚኒስትሩ አንድ የውጭ ስልክ ተደወለላቸው]

  • ሄሎ ክቡር ሚኒስትር፡፡
  • ማን ልበል?
  • ወዳጅዎ ነኝ፡፡
  • ባለፈው ሳምንት ደውለህልኝ አልነበር እንዴ?
  • መሄዴን መናገር ስላልፈለግኩ ነው ክቡር ሚኒስትር?
  • የት ነው ያለኸው?
  • ዱባይ ነኝ ክቡር ሚኒስትር፡፡
  • ሥራ አለህ እንዴ?
  • ትንሽ ልረፍ ብዬ ነው፡፡
  • ሰሞኑን አይደል እንዴ ከአሜሪካ ዕረፍት የመጣኸው?
  • ክቡር ሚኒስትር በአንዴ እኮ ነው የጨመረብኝ?
  • ግብር ነው?
  • ኧረ ስኳርና ደሜ፡፡
  • እና ዱባይ ልታስቀንስ ነው የሄድከው?
  • እንዴ በአንዴ ስታስገቧቸው ሁላችንም ደነበርን፡፡
  • ከማን ጋር ነው የሄድከው?
  • ከእርስዎ ጋር ቢዝነስ የሚሠሩ በሙሉ እዚህ ናቸው፡፡
  • ለምን ሄዳችሁ?
  • ፈርተን ነዋ፡፡
  • ምንድነው የሚያስፈራችሁ?
  • ክቡር ሚኒስትር ቢያስገቡንስ?
  • ማን አባቱ?
  • አይ አሁን እንደዚያ የሚባልበት ጊዜ አይደለም፡፡
  • ስማ እናንተ እኮ ልማታዊ ባለሀብቶች ናችሁ፡፡
  • ቢሆንም የጥንቸሏ ነገር እንዳይፈጸምብን ብለን ነው፡፡
  • ጥንቸሏ ምን ሆነች?
  • እስኪጣራ ተብለን እንዳንበሰብስ ነው፡፡
  • ምኑ ነው የሚጣራው?
  • ልማታዊነታችን፡፡
  • አሁን እዚያ ማን ማን አለ?
  • የእርስዎ ወዳጅዎች አንድም አልቀሩ፡፡
  • ምን እያደረጋችሁ ነው?
  • ይኸው ፌስቡክ ላይ አፍጥጠን ነው የምንውለው፤ እንዲያውም እኔ እዚህም ሥራ አልፈታሁም፡፡
  • ምን እየሠራህ ነው?
  • ውርርድ፡፡
  • የምን ውርርድ?
  • ቀጥሎ ደግሞ እናንተን ነው የሚከቱት እያልኩ ገንዘብ እያስያዝኩ ብዙ በላሁ፡፡
  • እውነትም ንግድ ደምህ ውስጥ ነው ያለው፡፡
  • ምን ላድርግ ክቡር ሚኒስትር?
  • ሰሞኑን ግን የሚታሰር ሰው ብዙም የለም፡፡
  • የእኔም ገቢ ቀዝቀዝ ብሏል፡፡
  • ለመሆኑ በቀጣይ ማን ነው የሚታሰረው?
  • እርስዎ!