አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

ክቡር ሚንስተር

 

[ክቡር ሚኒስትሩ ለወዳጃቸው ባለሀብት ስልክ ይደውላሉ]

  • ሄሎ ወዳጄ፡፡
  • ሄሎ ክቡር ሚኒስትር፡፡
  • ሰሞኑን ምነው ጠፋህ?
  • ፆም ስለነበር ነዋ፡፡
  • ዛሬ እኮ ስልክህን በጣም ጠብቄ ነበር፡፡
  • ቁርጥ እንድንቆርጥ ብለው ነው?
  • እህሳ ወዳጄ፡፡
  • ቁርጥ ተውኩ እኮ ክቡር ሚኒስትር፡፡
  • እንዴት ሆኖ?
  • ሐኪም ከለከለኝ፡፡
  • በፊትስ ሐኪም ይከለክልህ አልነበር እንዴ?
  • ክቡር ሚኒስትር አሁን እኮ በየቀኑ እየጨመረብኝ ነው፡፡
  • ግብሩ ነው?
  • ኧረ ስኳርና ደም ግፊቱ፡፡
  • ምን ሆነህ?
  • ሰሞኑን ጠቅላይ ሚኒስትሩ ያሉትን አልሰሙም እንዴ?
  • ምን አሉ?
  • ፊታችንን ወደ ባለሀብቱ እናዞራለን ብለዋል እኮ?
  • ለምን?
  • በሙስና በግብር ማጭበርበር ነዋ፡፡
  • ታዲያ አንተ ምን አገባህ?
  • እንዴት አያገባኝ?
  • ተነካክተሃል እንዴ?
  • ክቡር ሚኒስትር ከሰው ስህተት ከብረት ዝገት አይታጣም ሲባል አልሰሙም?
  • ስለዚህ ተሳስቻለሁ እያልከኝ ነው?
  • ፍፁም ነኝ ማለት ይከብደኛል፡፡
  • እሱን እንግዲህ ጊዜ ይፈታዋል፡፡
  • ክቡር ሚኒስትር አሁንስ ተጨንቄ ልሞት ነው፡፡
  • ምን ሆነህ?
  • ካሁን ካሁን ያዙኝ እያልኩ ነዋ፡፡
  • ኧረ ይኼን ያህል አትጨነቅ፡፡
  • ክቡር ሚኒስትር ከሁሉ በላይ የልጆቼ ጉዳይ ነው የሚያሳስበኝ፡፡
  • ምን እንዳይሆኑ ነው?
  • ምን አላቸው ያለ እኔ?
  • ሦስት ሕንፃዎችና ሦስት ፋብሪካዎች ነዋ፡፡
  • እኔን ካስገቡኝ እነሱስ ቢሆኑ መታገዳቸው መቼ ይቀራል?
  • አንተ እኮ በአካል ነው እንጂ በሐሳብ ገብተሃል፡፡
  • የት ክቡር ሚኒስትር?
  • ቂሊንጦ፡፡
  • እውነትዎትን ነው አንደኛዬን ገብቼ ባርፈው ይሻለኛል፡፡
  • ለማንኛውም ዛሬ የደወልኩልህ የልምዳችንን እንድናደርስ ነው፡፡
  • ስነግርዎት ክቡር ሚኒስትር  አልበላም፡፡
  • ስማ እዛ ደንበኛችን ጋ ለምሳ ቦታ ይያዝልን ብያለሁ እኮ፡፡
  • እኔ እኮ ፆም ላይ ነኝ፡፡
  • ተፈታ አይደል እንዴ?
  • በዚህኛው ፆም እኮ እስከ 21 ነው የምፆመው፡፡
  • እንዴ ለምን?
  • አሁን የመጣው የሙስና ጎርፍ እንዳይወስደኝ ነዋ፡፡
  • እና ፆሙን ቀጥለኸዋል?
  • እስካሁን እግዚአብሔር ይቅር እንዲለኝ ነበር የፆምኩት፣ ከዚህ በኋላ ያለውን ደግሞ መንግሥት ይቅር እንዲለኝ ነው፡፡
  • መንግሥት ምንድነው ይቅር የሚልህ?
  • በማወቅ በድፍረት. . .
  • እ. . .
  • ሳላውቅ በስህተት ለሠራሁት!
  • ለሠራኸው ምን?
  • ሙስና!

[አንድ ሀቀኛ ባለሀብት ለክቡር ሚኒስትሩ ደወለላቸው]

  • ሰላም ክቡር ሚኒስትር፡፡
  • ሰላም ወዳጄ፡፡
  • በጣም ጠፉ እኮ ክቡር ሚኒስትር?
  • የሥራችንን ፀባይ እያወከው?
  • እሱማ ይገባኛል፡፡ ሰሞኑን እንደውም ሳስብዎት ነበር፡፡
  • በምን ጉዳይ?
  • አይ ከፍተኛ የመንግሥት ባለሥልጣናት በሙስና ተጠርጥረው መታሰራቸውን ስሰማ ትዝ ብለውኝ ነበር፡፡
  • በሙስና እጠረጥርሃለሁ እያልከኝ ነው?
  • ኧረ እንደዛ ማለቴ አይደለም፡፡
  • ታዲያ ምን እያልክ ነው?
  • በጉዳዩ ዙሪያ እንድንጨዋወት ብዬ ነው፡፡
  • እእእ. . .
  • እርስዎማ በዚህ እንዴት ይጠረጠራሉ?
  • ሁሉም ሰው መቼ እንዳንተ ያውቀኛል ብለህ ነው?
  • እርስዎን ሙሰኛ ናቸው ብሎ የሚያስብ አለ እንዴ?
  • አየህ አንዳንድ ፀረ ልማቶች እንደዚያ ሊያስቡ ይችላሉ ብዬ ነው፡፡
  • ለማንኛውም የሰሞኑ ጉዳይ እኔንም አሳስቦኛል፡፡
  • ይህማ ሊሆን አይችልም፡፡
  • ሀቀኛ ነው ብለው ነው አይደል?
  • እንዴ አንተ እኮ እኔ ራሱ ከምመሰክርላቸው ሀቀኛ ባለሀብቶች መካከል አንዱ ነህ፡፡
  • ልክ ነው፣ በእሱስ እኔም አላሳፍርዎትም፡፡
  • ታዲያ ምኑ ነው ያሳሰበህ?
  • ክቡር ሚኒስትር ሰሞኑን የማላውቃቸው ሰዎች ስልክ እየደወሉልኝ ነው፡፡
  • ምን ብለው?
  • በስልክ ማስፈራሪያ ቢጤ ነው የነገሩኝ፡፡
  • የምን ማስፈራሪያ?
  • ሰሞኑን የበርካታ ባለሀብቶች ንብረት መታገዱን አልሰማህም ወይ ምናምን እያሉ ሊያስፈራሩኝ ይሞክራሉ፡፡
  • ምን?
  • ከስልክም ባለፈ ለአንዳንድ ወዳጆቼ ጠንቀቅ እንድል ምክር አዘል ማስፈራሪያ አስልከውብኛል፡፡
  • አንተ የሠራኸው ነገር አለ እንዴ?
  • ኧረ በፍፁም ክቡር ሚኒስትር፡፡
  • ታዲያ ለምንድነው የሚያስፈራሩህ?
  • እኔም ሊገባኝ አልቻለም፡፡
  • ለመሆኑ ምን እያሉ ነው የሚያስፈራሩህ?
  • በቀጣይ በሰፊ ዕርምጃ የሚወሰደው የግል ባለሀብቱ ላይ ስለሆነ ተጠንቀቅ ይሉኛል፡፡
  • አንተ ግብር ምናምን በአግባቡ ነው አይደል የምትከፍለው?
  • የመንግሥት አንዲት ስባሪ ሳንቲም የለችብኝም፡፡
  • ታዲያ ምን ፈልገው ነው?
  • ጉቦ ፈልገው ነው ክቡር ሚኒስትር፡፡
  • የምን ጉቦ?
  • ከሊስት ውስጥ እናሰርዝሃለን ነው የሚሉት፡፡
  • የምን ሊስት ነው?
  • በሙስና የሚጠረጠሩ ሰዎች ሊስት ነዋ፡፡
  • ታዲያ ምኑን ነው የሚሰርዙልህ?
  • ስሜን!

[ለክቡር ሚኒስትሩ የውጭ ስልክ ተደወለላቸው]

  • ሄሎ ክቡር ሚኒስትር፡፡
  • ማን ልበል?
  • ባለፈው የመሥሪያ ቤትዎን የፈርኒቸር ጨረታ የሰጡኝ ነኝ፡፡
  • ሰላም ነው ወዳጄ?
  • ምን ሰላም አለ ክቡር ሚኒስትር?
  • ምን ሆንክ ደግሞ?
  • ስልክ በተደወለልኝ ቁጥር መደንበር ነው ሥራዬ፡፡
  • እንዴ ለምን?
  • ይኸው እንቅልፍ በዓይኔ ከዞረ ራሱ ስንት ጊዜው?
  • ሥራ ቀየርክ እንዴ?
  • ወደ ምን?
  • ወደ ጥበቃ ነዋ፡፡
  • አይ ክቡር ሚኒስትር አሁንም ይቀልዳሉ?
  • ይህ ኑሮ ካልቀለድክበት አትገፋውም ብዬ ነው፡፡
  • ለነገሩ እውነትዎትን ነው፡፡
  • ለመሆኑ የት ሆነህ ነው የምትደውልልኝ?
  • ከአገር ወጣ ብያለሁ፡፡
  • እንዴ ለምን ወጣህ?
  • የሰሞኑ ማዕበል እስኪረጋጋ ነዋ፡፡
  • የምን ማዕበል ነው?
  • የሙስናው ማዕበል ነዋ፡፡
  • ምነው ፈራህ እንዴ?
  • እኔ ካልፈራሁ ማን ሊፈራ?
  • ምን ያስፈራሃል?
  • ክቡር ሚኒስትር ጥያቄው የተገላቢጦሽ ነው መሆን ያለበት፡፡
  • ማለት ይኼን ጥያቄ መጠየቅ ያለብዎት እርስዎ ነዎት እያልከኝ ነው?
  • አይደለም አይደለም፣ የማያስፈራህ ነገር ምን አለ ብለው ቢጠይቁኝ ይሻላል ልልዎት ፈልጌ ነው፡፡
  • ይህን ያህል ፈርተሃል ማለት ነው?
  • ክቡር ሚኒስትር ሰዎች ስሜን ሊስት ውስጥ ማየታቸውን ነግረውኝ ነበር፡፡
  • ታዲያ ሊስቱ ውስጥ ከነበርክ እንዴት ከአገር ወጣህ?
  • የወጣሁት በቦሌ አይደለማ፡፡
  • ታዲያ በየት ነው የወጣኸው?
  • በባሌ!

[የክቡር ሚኒስትሩ ቢሮ የፋይናንስ ኃላፊው ገባ]

  • ፈልጌዎት ነበር ክቡር ሚኒስትር፡፡
  • ለምን ጉዳይ?
  • በወጪ ቅነሳው ላይ እንድንወያይ፡፡
  • የምን ወጪ ቅነሳ ነው?
  • ለሚቀጥለው ዓመት መሥሪያ ቤታችን ወጪ መቀነስ እንዳለበት መንግሥት አሳስቧል፡፡
  • ታዲያ መቀነስ ነዋ፡፡
  • ስለእሱ ጉዳይ እንድንመካከር ብዬ ነው፡፡
  • ምኑ ላይ የምንመካከረው?
  • የሚቀነሱት ነገሮች እርስዎን ይመለከታሉ፡፡
  • እንዴት ሆኖ?
  • ለምሳሌ ለልጅዎ የተሰጠው መኪና መመለስ አለበት፡፡
  • ምን?
  • እሱ ብቻ ሳይሆን የባለቤትዎትም መኪና መመለስ አለበት፡፡
  • እንዴት ነው የተናናቅነው  እባክህ?
  • ይህ እኮ ንቀት አይደለም፡፡ መመርያን የማስፈጸም ጉዳይ ነው፡፡
  • አንተን ማን ነው አስፈጻሚ ያደረገህ?
  • ክቡር ሚኒስትር እኔንም እኮ ያስጠይቀኛል፡፡
  • ሰውዬ በጣም የደፈርከኝ አልመሰለህም?
  • ክቡር ሚኒስትር ለምን ፐርሰናል ያደርጉታል?
  • ይህማ ፐርሰናል ጉዳይ ነው፡፡
  • እንዴት ሆኖ?
  • ይኸው ልጅህና ሚስትህ መኪና ይቀሙ እያልከኝ ነዋ?
  • ታዲያ እነሱ የመሥሪያ ቤታችን አባል እኮ አይደሉም፡፡
  • እኔ ሚኒስትር መሆኔን ረሳኸው?
  • ኧረ በፍፁም ክቡር ሚኒስትር፡፡
  • ታዲያ ምን ፈልገህ ነው?
  • ወጪ መቀነስ!

[የክቡር ሚኒስትሩ ሚስት ስልክ ደወሉ]

  • ለመሆኑ በሕይወት አለህ?
  • ምነው ታሰረ አሉሽ እንዴ?
  • ብትታሰር ይሻልሃል፡፡
  • ምንድነው የምትቀባጥሪው?
  • ምን እየተደረገ ነው ለመሆኑ?
  • ምን ተደረገ?
  • መኪናዬን እኮ ሊቀሙኝ ነው?
  • እ. . .
  • አንተ ነህ እንዴ የላካቸው?
  • ወጪ ቆጥቡ ተብለን እኮ ነው፡፡
  • ታዲያ እኔን መኪና በመቀማት ነው ወጪ የምትቆጥቡት?
  • መመርያ ተላልፎ እኮ ነው፡፡
  • እና በዜሮ ልታስቀሩኝ ነው እንዴ?
  • በዜሮማ አትቀሪም፡፡
  • ይኸው ሁሉን ነገር ተከለከልን አይደል እንዴ?
  • ያልተከለከልነው አንድ ነገር አለ፡፡
  • ምንድነው እሱ?
  • ድጋፍ የምናደርግለት ማኅበር ማቋቋም እንችላለን፡፡
  • የምን ማኅበር ነው የምናቋቁመው?
  • የአካል ጉዳተኞች ማኅበር!