ክቡር ሚንስተር

[ክቡር ሚኒስትሩ በጠዋት ከቤት ሊወጡ ሲሉ ሚስታቸው ቁርስ እየበሉ አገኟቸው]

  • ቁርስ አትበላም እንዴ?
  • ኧረ እበላለሁ፡፡
  • በል ቤት ያፈራውን አፍህ ላይ ጣል አድርግ፡፡
  • ቁርስ ይኼ ነው እንዴ?
  • ምነው?
  • ደረቅ ዳቦና የገበታ ቅቤ?
  • እና ምን ጠብቀህ ነበር?
  • እኔማ ስምንት ዘጠኝ ዓይነት ነዋ፡፡
  • ያደለውማ ይጾማል፡፡
  • ከሃይማኖት ጋር አታነካኪኝ፡፡
  • እና ስምንት ዘጠኝ ዓይነት ነበር የጠበቅከው?
  • እህሳ?
  • አንተ ግን ትንሽ አታፍርም?
  • ለምንድን ነው የማፍረው?
  • አገሪቷ ውስጥ ምን እንዳለ ራሱ ረስተኸዋል አይደል?
  • አገሪቷ ውስጥማ ከፍተኛ ዕድገት እንዳለ አውቃለሁ፡፡
  • እ…
  • ለዚህ እኮ የእኛም የቁርስ ዓይነት በከፍተኛ ደረጃ ማደግ አለበት የምለው?
  • እና እንቁላል አማረህ?
  • ምን እሱ ብቻ?
  • ከጎኑ ቅንጬም ይደረግበት?
  • በትክክል፡፡
  • ጥብስ ነገርም ይኑረው?
  • የፈረንጅም ቢኖር አሪፍ ነው፡፡
  • ስለዚህ ፓንኬክም ይደረግበታ?
  • ፍሬንች ቶስትም ቢኖር አይከፋም፡፡
  • እኔ የምልህ አገሪቷ ውስጥ ከአምስት ሚሊዮን በላይ ሕዝብ መራቡን ዘነጋኸው እንዴ?
  • ረሃቡ ከእኔ ቁርስ ጋር ምን አገናኘው?
  • የአንተ ቁርስ ከአገሪቷ ዕድገት ጋር ነው የሚገናኘው?
  • ስሚ ቀኑን ሙሉ ከስንት ባለሀብት ጋር መሰለሽ የምገናኘው፡፡
  • ብትገናኝስ ታዲያ?
  • በቃ ሲያገሱ ራሱ የጠጡት ጁስ ይሸተኛል፡፡
  • እና ጁስም አማረህ?
  • ምን አለበት?
  • የኑሮ ውድነቱን ረሳኸው እንዴ?
  • ማለት?
  • ኑሮ በጣም ተወዷል፡፡
  • ቢወደድስ?
  • ይኸው የልጆች ትምህርት ቤት ራሱ ሊጨመር ነው፡፡
  • ባለፈው ዓመት አይደል እንዴ 30 ፐርሰንት የጨመሩት?
  • ይኸው ከሚቀጥለው ዓመት ጀምሮም ስለሚጨምሩ ስብሰባ ጠርተውኛል፡፡
  • እነሱ ምነው አበዙት?
  • እና ሰውዬ ከየት መጥቶ ነው የጠየቅከው ነገር የሚደረገው?
  • ለነገሩ እኔም እጨምራለሁ፡፡
  • ደመወዝተኛ መሆንህን ረሳኸው?
  • ደመወዜን አይደለም የምጨምረው፡፡
  • ታዲያ ሌላ ምን ልትጨምር ነው?
  • ኮሚሽኔን፡፡
  • ገቢህን ከጨመርክ ለእኔ ችግር የለውም፡፡
  • ስሚ እኔ ልክ እንደ መንግሥት ጥልቅ ተሃድሶው ውስጥ ነኝ፡፡
  • የምን ጥልቅ ተሃድስ ነው?
  • በቃ በራሴ ላይ አብዮት ላስነሶ ነው፡፡
  • የምን አብዮት?
  • የኢኮኖሚ!

[ክቡር ሚኒስትሩ ቢሮ ሲገቡ አማካሪያቸው ገባ]

  • ደህና አደሩ ክቡር ሚኒስትር፡፡
  • እሺ ምን አለ?
  • በጣም ብዙ ነገር አለ፡፡
  • እኮ ምን?
  • ያው በዚህ ዓመት የምንጀምረው ፕሮጀክት አለ፡፡
  • አውቃለሁ፡፡
  • ስለዚህ ፕሮጀክቱን በአስቸኳይ መጀመር አለብን፡፡
  • ይጀመራ፡፡
  • አዎ ግን የፕሮጀክቱን ፕላን ማፅደቅ ይጠበቅብዎታል፡፡
  • ይፅደቃ፡፡
  • እኮ እንዲያነቡት ሰጥቼዎት ነበር፡፡
  • ለእኔ?
  • አዎን ሁለት ሳምንት አለፈው እኮ፡፡
  • በቃ አፅድቄዋለሁ፡፡
  • ሳያነቡት?
  • እሱን ማንበቢያ ጊዜ የለኝም፡፡
  • ይኼማ እንዴት ይሆናል ክቡር ሚኒስትር?
  • እያዘዝከኝ ነው እንዴ?
  • ኧረ በፍጹም ክቡር ሚኒስትር፡፡
  • እና ምን እያልክ ነው?
  • በኋላ ላይ ተጠያቂነት ስለሚያስከትል፣ ቢያነቡት መልካም ነው፡፡
  • ማን ነው የሚጠይቀኝ?
  • ሌላው ቢቀር ህሊና መጠየቁ አይቀርም ብዬ ነው?
  • እሱንማ እያደነዘዝኩት ነው፡፡
  • በምን?
  • በገንዘብ ነዋ፡፡
  • ከድንዛዜው የነቃ ቀን ግን ጉድዎት ነው፡፡
  • ያልተጠየከውን አታውራ፡፡
  • ለማንኛውም ዛሬ እንግዶች ይመጣሉ፡፡
  • የምን እንግዳ?
  • ባለጉዳዮች ናቸው፡፡
  • ያለቀጠሮ?
  • ኧረ ቀጠሮ ከያዙ ወር ሆኗቸዋል፡፡
  • ስማ እኔ በስብሰባ ጊዜዬን አላጠፋም፡፡
  • ባለጉዳዮች እኮ ናቸው፡፡
  • እኔ ሌላ ጉዳይ አለኝ፡፡
  • የምን ጉዳይ?
  • በራሴ ላይ ጥልቅ ተሃድሶ እያካሄድኩ ነው፡፡
  • እንደዚያማ ከሆነ ባለጉዳዮቹን ማናገር እኮ የተሃድሶ አካል መሆን አለበት፡፡
  • በእኔ ተሃድሶ ውስጥ ባለጉዳይን ማናገር አልተካተተም፡፡
  • ታዲያ ምንድን ነው የተካተተው?
  • ባለሀብትን ማናገር፡፡
  • ምን?
  • ለመሆኑ ደመወዝህ ይበቃሃል?
  • ከየት መጥቶ ክቡር ሚኒስትር?
  • የኑሮ ውድነቱ ምንም አይሰማህም ታዲያ?
  • እሱማ ከአቅሜ በላይ ሆኗል፡፡
  • ስለዚህ ጊዜው አሁን ነው፡፡
  • የምኑ?
  • ራሳችን ላይ አብዮት የማስነሳቱ፡፡
  • የምን አብዮት?
  • የኢኮኖሚ!

[ክቡር ሚኒስትሩ አንድ ዳያስፖራ ወዳጃቸው ጋ ደወሉ]

  • ሄሎ ክቡር ሚኒስትር፡፡
  • እንዴት ነህ ወዳጄ?
  • አለሁ ክቡር ሚኒስትር፡፡
  • ስማ ምርር ብሎኝ እኮ ነው የምደውልልህ?
  • ምነው? ምነው?
  • ኧረ ኑሮ ውድነቱን አልቻልነውም፡፡
  • እ…
  • ይኸው ሁሉ ነገር ይጨምራል፡፡
  • መንግሥት ግን ምንድን ነው የሚያደርገው?
  • እኔንም ግርም የሚለኝ እርሱ ነው፡፡
  • እ…
  • በቃ አንድ ነገር ከወጣ ተመልሶ አይወርድም፡፡
  • እሱማ ከእናንተ ተምሮ ነው፡፡
  • ማለት?
  • ያው እናንተም ሥልጣን ላይ ወጥታችሁ አልወርድ ብላችኋል እኮ?
  • እኛንም ያስተማሩን እነሱ ናቸው፡፡
  • እነማን?
  • ነጋዴዎቹ፡፡
  • እ…
  • አንዴ የዕቃውን ዋጋ ይሰቅሉታል፣ ከዚያ አያወርዱትም፡፡
  • በቃ አንዱ አንዱ ላይ እያላከከ ግን እስከ መቼ እንዘልቀዋለን?
  • ስማ እሱን ተወውና የደወልኩበትን ጉዳይ ልንገርህ፡፡
  • እሺ ይንገሩኝ፡፡
  • እኔ ለኑሮ ውድነቱ መፍትሔ አግኝቻለሁ፡፡
  • ምን ዓይነት?
  • ወጪያችን ስለጨመረ፣ ገቢያችንንም መጨመር አለብን፡፡
  • እንዴት አድርገን?
  • ለምን ሐዋላ አንጀምርም?
  • ሐዋላ ሲሉኝ?
  • ይኸውልህ ነጋዴው በኤልሲ ችግር ተሰቃይቷል፡፡
  • እሺ፡፡
  • ስለዚህ አንተ እዚያ በዶላር ገንዘብ ትሰጣቸዋለህ፣ እኔ እዚህ በብር እቀበላለሁ፡፡
  • ይኼ ምን ይጠቅመኛል?
  • ምንዛሪው በብላክ ነዋ፡፡
  • የጥቁር ገበያ እንጀምር እያሉኝ ነው?
  • ስማ ራሴ ላይ ከፍተኛ አብዮት አስነስቻለሁ፡፡
  • የምን አብዮት?
  • የኢኮኖሚ!

[ክቡር ሚኒስትሩ አንድ ባለሀብት ጋር ደወሉ]

  • ከየት ተገኙ ዛሬ ክቡር ማኒስትር?
  • እኔ እኮ ሁሌም እፈልግሃለሁ፡፡
  • ኧረ በተደጋጋሚ ደውዬ ነበር ግን አያነሱም?
  • ምን የእኔ ነገር ስብሰባ ሆኜ ይሆናላ?
  • እሱን እንኳን አውቃለሁ፡፡
  • ዛሬ ግን አንድ ሐሳብ ይዤ ነው የመጣሁት፡፡
  • ምን ዓይነት ሐሳብ?
  • አንድ ላይ እንድንሠራ፡፡
  • ምን ክቡር ሚኒስትር?
  • ቢዝነስ ነዋ፡፡
  • ይኼማ ስጠብቀው የነበረው አጋጣሚ ነው፡፡
  • እንዴት?
  • ያው እኔ ሪል ስቴት እንዳለኝ ያውቃሉ?
  • በሚገባ፡፡
  • አሁን በርካታ መሬት እፈልጋለሁ፡፡
  • እሱንማ እኔ አቀርብልሃለሁ፡፡
  • ኪኪኪ…
  • ምን ያስቅሃል?
  • መሬት አቀርብልሃለሁ ሲሉኝ ነዋ፡፡
  • እውነቴን ነው፡፡
  • በቃ መሬት ካሰጡኝ እኔ ለግንባታው አሽዋ፣ ጠጠር፣ ሲሚንቶና ሌሎችም ግብዓቶች ስለሚያስፈልጉኝ እርስዎ ሊያቀርቡልኝ ይችላሉ፡፡
  • እሱን ነው የምልህ እኮ፡፡
  • ያሉዎትን ማሽነሪዎችም ልከራያቸው እችላለሁ፡፡
  • በቃ እንጠቃቀማለን ስልህ?
  • ለጀመርኩት ሆቴልም የፊኒሺንግ ዕቃ ለማስገባት ኤልሲ ያስፈቅዱልኝ?
  • ምንም ችግር የለም፡፡
  • ያው ዕቃዎቹ ከቀረጥ ነፃ ስለሚገቡ እዚህ በደንብ ያዋጡናል፡፡
  • አንተ በቃ የገባህ ሰው ነህ፡፡
  • እኔ የምልዎት ክቡር ሚኒስትር…
  • እ…
  • ከእኔ ጋር ለመሥራት ምን አነሳሳዎት?
  • በቃ በራሴ ላይ አብዮት ማቀጣጠል እንዳለብኝ ወስኛለሁ፡፡
  • የምን አብዮት ነው?
  • የኢኮኖሚ አብዮት!