Skip to main content
x
ዋሊያዎቹ ለሁለተኛው የቻን ማጣሪያ ዝግጅታቸውን ጀምረዋል

ዋሊያዎቹ ለሁለተኛው የቻን ማጣሪያ ዝግጅታቸውን ጀምረዋል

በኬንያ ለሚስተናገደው የ2018 የአፍሪካ አገሮች የእግር ኳስ ሻምፒዮና (ቻን) የኢትዮጵያ ብሔራዊ ቡድን (ዋሊያዎች) የሁለተኛ ማጣሪያ ጨዋታ ለማድረግ ዝግጅቱን በአዳማ ከተማ ጀምሯል፡፡

በመጀመሪያ የማጣርያ ጨዋታ በሰፊ የግብ ልዩነት 5 ለ 1 መርታት የቻለው  ብሔራዊ ቡድኑ፣ የደርሶ መልስ ጨዋታውን ከጅቡቲ ፎርፌ በማግኘቱ ሁለተኛውን ጨዋታ ለማከናወን የሱዳንና ቡሩንዲን አሸናፊ ይጠብቃል፡፡ ለዚህም ይረዳው ዘንድ በአዳማ ከተማ ዝግጅቱን እያደረገ የሚገኘው ብሔራዊ ቡድኑ በጨዋታ ምክንያት በቡድን ውስጥ ያልነበሩት የቅዱስ ጊዮርጊስ ተጫዋቾችን አካቷል፡፡

ሁለተኛው ጨዋታ ነሐሴ 5 ቀን 2009 ዓ.ም. በሐዋሳ ስታዲየም የሚያደርገው ብሔራዊ ቡድኑ የመልስ ግጥሚያውን ከሜዳዋ ውጪ ከ15 ቀናት በኋላ ያከናውናል፡፡

የአገር ውስጥ ተጫዋቾችን ያማከለው የቻን ውድድር ከ48 ተሳታፊ አገሮች 16ቱ ኬንያ ላይ ተካፋይ ይሆናሉ፡፡

በ2001 ዓ.ም. በአይቨሪኮስት በተጀመረው የቻን ውድድር፣ ኢትዮጵያ ለመጀመሪያ ጊዜ የተሳተፈችው በ2006 ዓ.ም. በደቡብ አፍሪካ በተዘጋጀው ወድድር ላይ ነበር፡፡ በወቅቱም ምድብ ሐ ላይ ከጋና፣ ሊቢያና ኮንጎ ጋር ተደልድላና ሦስት ጨዋታ አድርጋ ያለምንም ነጥብ ማጠናቀቋ ይታወሳል፡፡ እንዲሁም ብሔራዊ ቡድኑ በሩዋንዳ አዘጋጅነት በ2008 ዓ.ም. በተካሄደው ውድድር ላይ ከአይቨሪኮስት፣ ዛምቢያና ጊኒ ጋር የተደለደለ ሲሆን፣ ከካሜሮውን ጋር ባደረገው ጨዋታ ያለምንም ግብ በመለያየት አንድ ነጥብ ማግኘት ችሏል፡፡ የዘንድሮ የአሠልጣኝ አሸናፊ በቀለ ስብስብ ካለፉት ሁለት የቻን ውድድሮች ተሳትፎ ባሻገር የተሻለ ውጤት ያስመዘግባል ተብሎ ይጠበቃል፡፡

የብሔራዊ ቡድኑ ስብስብ ግብ ጠባቂ ጀማል ጣሰው፣ ሳምሶን አሰፋ፣ ለዓለም ብርሃኑ፤ ተከላካዮች አብዱልከሪም መሐመድ፣ አስቻለው ታመነ፣ ሳላዲን በርጌቾ፣ አንተነህ ተስፋዬ፣ ሙጂብ ቃሲም፣ ተስፋዬ በቀለ፣ ደስታ ዮሐንስ፣ አምሳሉ ጥላሁን፤ አማካዮች ናትናኤል ዘለቀ፣ በኃይሉ አሰፋ፣ ምንተስኖት አዳነ፣ ሽመክት ጉግሳ፣ ሙሉዓለም መስፍን፣ ገዲሳ መብራቴ፣ ታፈሰ ሰለሞን፣ ብሩክ ቃልቦሬ፤ አጥቂዎች ጌታነህ ከበደ፣ አዲስ ግደይ፣ አብዱልራህማን ሙባረክ፣ አሜ መሐመድ፣ ሳላሃዲን ሰዒድ ናቸው፡፡