Skip to main content
x
ዋሊያዎቹ የአፍሪካ ዋንጫ የምድብ ጨዋታቸውን ዛሬ ከጋና ጋር ያደርጋሉ

ዋሊያዎቹ የአፍሪካ ዋንጫ የምድብ ጨዋታቸውን ዛሬ ከጋና ጋር ያደርጋሉ

የኢትዮጵያ ብሔራዊ ቡድን (ዋሊያዎቹ) የ2019 የአፍሪካ ዋንጫ የምድብ የመጀመሪያ ጨዋታውን ከጋና አቻቸው ጋር ዛሬ እሑድ ሰኔ 4 ቀን 2009 ዓ.ም. ያከናውናል፡፡ ሐሙስ ሰኔ 1 ቀን 2009 ዓ.ም. 22 ተጫዋቾችን በመያዝ ወደ ጋና ያመራው ብሔራዊ ቡድኑ ጠንካራ ጨዋታ ይጠብቀዋል፡፡

አዲሱ የዋሊያዎቹ አሰልጣኝ አሸናፊ በቀለ ከአገር ውስጥ ክለቦች ከተመረጡት ተጨዋቾች በተጨማሪ የግብፅ ክለቡን ፔትሮጄት አማካይ ሽመልስ በቀለና የኢል-ኤንታግ ኤል- አርቢ የፊት አጥቂ ዑሙድ ዑክሪን ከውጪ በቡድን ውስጥ አካቷል፡፡

ከሳምንታት በፊት ጀምሮ ልምምዱን ሲያደርግ የቆየው ብሔራዊ ቡድኑ ለማጣሪያው እንዲረዳው ከዑጋንዳ ብሔራዊ ቡድን ጋር የዝግጅት ጨዋታን በአዋሳ ስታዲየም አድርጎ ያለ ምንም ግብ መለያየቱ ይታወሳል፡፡

ለ32ኛ ጊዜ ለሚደረገው የአፍሪካ አገሮች ዋንጫ ውድድር ከሴራሊዮን፣ ኬኒያና ጋና ብሔራዊ ቡድኖች ጋር የተደለደለው የኢትዮጵያ ብሔራዊ ቡድን ከጋና አቻው ትልቅ ፉክክር ይጠብቀዋል፡፡

የአራት ጊዜ የአፍሪካ ዋንጫ ሻምፒዮናው ጋና በጋቦን ተሰናድቶ በነበረው 31ኛው የአፍሪካ ዋንጫ ላይ አራተኛ ደረጃን በመያዝ ማጠናቀቁ ይታወሳል፡፡

አዲሱ የጋና ብሔራዊ ቡድን አሰልጣኝ ከዊሲ አፒያ በእንግሊዝ፣ በስፔን፣ በጀርመን፣ በፈረንሣይ እንዲሁም በዱባይ በመጫወት ላይ የሚገኙትን አምበሉን አሳማዋ ጅያንን ጨምሮ በርካቶችን ለእሑዱ ጨዋታ ማካተታቸው ተዘግቧል፡፡

ወደ ጋና ያቀኑት የኢትዮጵያ ብሔራዊ ቡድን ተጫዋቾች

ግብ ጠባቂዎች - ለዓለም ብርሃኑ፣ ጀማል ጣሰውና አቤል ማሞ

ተከላካዮች - ተስፋዬ በቀለ፣ ሙጂብ ቃሲም፣ አብዱልካሪም መሐመድ፣ አስቻለው ታመነ፣ አዲሱ ተስፋዬ፣ አንተነህ ተስፋዬ፣ ሥዩም ተስፋዬ፣ ሳላሃዲን በርጌቾ

አማካዮች - ጋቶች ፖኖም፣ ሙሉዓለም መስፍን፣ ሽመልስ በቀለ፣ ሽመክት ጉግሳ፣ ብሩክ ቃልቦሬ፣ ጋዲሳ መብራቴ

አጥቂዎች - አዲስ ግደይ፣ ጌታነህ ከበደ፣ አብዱራህማን ሙባረክ፣ ዑመድ ዑኩሪና ሳላሃዲን ሰዒድ ናቸው፡፡