Skip to main content
x

የሳምንቱ ገጠመኝ

ሊቀ ማእምራን አበባው ይግዛው በአንድ መጽሐፋቸው ላይ ያሰፈሩት ታሪክ ትዝ ይለኛል። ሰውዬው አንዱ ዳንዴ የፈታትን ሴት መቸም የፈታት ባይፈልጋት ነው ብሎ ያገባል። አግቢውን አንድ ቀን ገበያ ላይ ያገኘዋል። ‹‹አንተም ወንድ ሆነህ እኔ የፈታኋትን ሴት ታገባለህ?›› ብሎ ያፈጥበታል። የሚያደርገው ጠፍቶት የሚናገረው ቸግሮት ሲርበደበድ የያዘውን ዱላ ከእጁ ነጥቆ እያገላበጠ ነረተው። በኡኡታ ሕይወቱን አትርፎ እያነከሰ እቤቱ ገባ። ‹‹አንቱዬ ምን አገኘዎ?›› ስትል ሚስት ትጠይቅአለቸ። ‹‹የቀድሞ ባልሽ እንዴት ጥጋበኛ ነው ጃል! እምቢ ጠብ ብሎ ገበያ መሀል ደበደበኝ›› ይላታል። ‹‹እስከማውቀው እሱ ገበያ ሲወጣ ዱላ ይዞ አይወጣም። ሌላ ሰው ሊሆን ይችላል›› ትላለች ሚስት። ‹‹እሱማ ምን ዱላ ይቆርጣል በገዛ ዱላዬ ነው እንጂ›› አለ አቶ ባል። ነሐሴ 14 ቀን 2009 ዓ.ም. የወጣው ሪፖርተር ጋዜጣ 16ቱ የፖለቲካ ፓርቲዎች ስለ ፖለቲካ ፓርቲዎች ምዝገባ የወጣውን አዋጅ ለማሻሻል የደረሱበትን ስምምነት ዘግቦአል። ሕገ መንግሥቱን ከመጣሳቸው በላይ የታየኝ በራሳቸው ላይ ሸክም ማብዛታቸው ነው፤ ያሳዝናል። ይበልጥ የሚያሳዝነው ደግሞ ‹‹በጋራ በደረስንበት መሠረት,,,›› እየተባለ የሚቀጥለው ፕሮፓጋንዳ ነው። ‹‹ጅል ልጅ ከቤታችሁ አይውጣ›› ብሎ የሚመርቅ አገር እንዴት ያጣል!

አያሌው አስረስ በፌስቡክ ገጹ ያሠፈረው