የቅዱስ ጊዮርጊስና መከላከያ የአህጉራዊ ተሳትፎ ቀጣይነት እሑድ ይወሰናል

የአፍሪካ እግር ኳስ ኮንፌዴሬሽን (ካፍ) በውድድር ዓመቱ የሚያደርገው የአፍሪካ ክለቦች ሻምፒዮንስ ሊግና ኮንፌዴሬሽን ዋንጫ ቅድመ ማጣሪያ መርሐ ግብር ተጀምሯል፡፡ በመድረኩ ኢትዮጵያን የወከሉት ቅዱስ ጊዮርጊስና መከላከያ የመጀመርያውን ቅድመ ማጣሪያ በድል አጠናቀዋል፡፡ የመልሱን ጨዋታ ቅዱስ ጊዮርጊስ በሜዳው መከላከያ ደግሞ ከሜዳው ውጭ የፊታችን እሑድ ያደርጋሉ፡፡

ለአህጉራዊው የክለቦች ውድድር ቤተኛ የሆነው ቅዱስ ጊዮርጊስ፣ ባለፈው ቅዳሜ የካቲት 4 ቀን 2009 ዓ.ም. የአፍሪካ ደሴት አገር ወደ ሆነችው ሲሸልስ አምርቶ ኮት ዲ ኦርን በሜዳውና በደጋፊው ፊት 2 ለ0 አሸንፎ ተመልሷል፡፡ ሳላዲን ሰይድ ጎሎቹን አስቆጥሯል፡፡ የመልሱን ጨዋታ ደግሞ እሑድ የካቲት 11 ቀን 2009 ዓ.ም. በሐዋሳ ስታዲየም እንደሚያደርግ ይጠበቃል፡፡ የዓለም አቀፍ ደረጃውን አሟልቶ ግንባታው በመጠናቀቅ ላይ የሚገኘው የሐዋሳ ስታዲየም ካፍ ዕውቅና ከሰጣቸው የአገሪቱ ስታዲየሞች አንዱ ሆኖ የተመዘገበ ነው፡፡

የሲሸልስ አቻው ኮት ዲ ኦርን በቀላሉ አሸንፎ ወደ ቀጣዩ ዙር እንደሚያልፍ ትልቅ ቅድመ ግምት የተሰጠው ቅዱስ ጊዮርጊስ፣ በሁለተኛው ዙር ከኮንጎ ብራዛቪሉ ኤሲ ሊዮፓርድስና ከካሜሩኑ ዩኤምሰዲሎም አሸናፊ ጋር ይገኛል፡፡ ለአፍሪካ ክለቦች ሻምፒዮንስ ሊግም ሆነ ለአፍሪካ ኮንፌዴሬሽን ዋንጫ እንግዳ እንዳልሆነ የሚነገርለት ቅዱስ ጊዮርጊስ ዘንድሮ ካለፉት ዓመታት ሁሉ የተሻለ ውጤት ማስመዝገብ ይችል ዘንድ አቅዶ እየተንቀሳቀሰ እንደሚገኝ ከክለቡ የሚወጡ መረጃዎች ይጠቁማሉ፡፡

ካፍ በዚህ ዓመት በሚጀምረው አዲስ የውድድር መርሐ ግብር መሠረት በአፍሪካ ክለቦች ሻምፒዮንስ ሊግ የቅድመ ማጣሪያውን የመጀመርያ ዙር ማለፍ የቻለ ክለብ ሁለተኛው ዙር ላይ ከሻምፒዮናው ቢወጣ በኮንፌዴሬሽን ዋንጫ ተሳታፊ ይሆናል፡፡ ቅዱስ ጊዮርጊስ የዚህ ዕድል ተጠቃሚ የሚሆንበት ዕድል እንዳለውም እየተነገረ ይገኛል፡፡

ያለፈው ዓመት የኢትዮጵያ ክለቦች ጥሎ ማለፍ አሸናፊ የሆነው መከላከያ በበኩሉ፣ ለአፍሪካ ኮንፌዴሬሽን ዋንጫ ቅድመ ማጣሪያ ባለፈው እሑድ የካሜሩኑ ዮንግ ስፖርትስ አካዴሚን በአዲስ አበባ ስታዲየም አስተናግዶ፣ 1 ለ0 በሆነ ጠባብ ውጤት አሸንፏል፡፡ ወደ ሁለተኛው ዙር ለማለፍ ከሜዳው ውጭ ወደ ካሜሩን አምርቶ የሚያደርገውን ጨዋታ ተጠባቂ አድርጎታል፡፡

በአገር ውስጥ አሠልጣኝና ተጨዋቾች የሚዘጋጀው መከላከያ የፊታችን እሑድ የሚያደርገውን ጨዋታ በድል የሚያጠናቅቅ ከሆነ በቀጣዩ ዙር ከቱኒዚያው ሲኤስ ሴፋክሲየን ጋር እንደሚገናኝ ይጠበቃል፡፡