Skip to main content
x

የቤት መሠረተልማቶችና ትራንስፖርት ይሟሉልን!

የአዲስ አበባ ከተማ አስተዳደር የመልካም አስተዳደር ችግርን ለመፍታት እየሠራ መሆኑን በመግለጽ ላይ ይገኛል፡፡ እኛ የቦሌ አራብሳና የኮዬ ፈጬ ኮንዶሚኒየም ባለ ዕድለኞች ቁልፍ ብንረከብም፣ መብራትና ውኃ ሳናገኝ ከሰባት ወራት በላይ አስቆጥረናል፡፡ አብዛኛው የውስጥ ለውስጥ መንገድም አልተሠራም፡፡ አፈር በየበራችን ላይ እንደተቆለለ ነው፡፡

አስተዳደሩ ዕጣ ቶሎ ላለማውጣቱ ይሰጠው የነበረው ምክንያት መሠረተ ልማት ከተሟላ ኋላ ዕጣው እየወጣ ሰው የሚገባበት ቤት ለማስረከብ ነው የሚል ነበር፡፡ በተግባር ግን አልተፈጸመም፡፡ በዚህ ምክንያት የብድር እፎይታ ጊዜው እያለፈብን ለከፍተኛ ችግር ተጋልጠናል፡፡ አስተዳደሩ ይኼን ችግር ተረድቶ አስቸኳይ መፍትሔ ይሰጠን፡፡

ከኑሮ ችግር አንፃር በሻማ እየተጠቀምን፣ ውኃ በአህያ እያስጫንን እየገባን ለመኖር ተገደናል፡፡ አስተዳደሩ የታክሲ ሥምሪት በአግባቡ ባለመመደቡም ሰዎች በግል ተነሳሽነት የሚሠሩት፣ ታሪፍ የሚተምኑት ራሳቸው በመሆኑ ለታክሲና ለባጃጆች ከፍተኛ ወጪ ለማውጣት ተገደናል፡፡ በከፍተኛ ደረጃ እየተበዘበዝን እንገኛለን፡፡

ከእነዚህ አካባቢዎች በመነሳት ወደ መሐል ከተማ በሥራ ገበታችን ለመገኘት በቀን በደርሶ መልስ ከ30 ብር በላይ እያወጣን ነው፡፡ ይኼ በወር ሲሰላ ከ600 ብር በላይ ነው፡፡ ይኼን መቋቋም ያቃታቸው ነዋሪዎች፣ ቤታቸውን ለመሸጥ እየተገደዱ ነው፡፡ ለድሃው ተብለው የተሠሩት ቤቶች የደላሎች የገቢ ምንጭ እየሆኑ፣ ጥቂት ሀብታሞች እጅ እየገቡ ነው፡፡

በመሆኑም አስተዳደሩ የታክሲ ሥምሪት እንዲያስጀምርልን፣ የጀመሩትን የታክሲም ሆነ የባጃጅ ታሪፍ በሕጉ አግባብ እንዲያስተካከልን እንጠይቃለን፡፡

 የአንበሳ አወቶብስ የመነሻ ሰዓት በሁሉም አካባቢዎች 12፡10 ሰዓት ቢሆንም፣ እኛ አካባቢ ግን በ12፡40 ሰዓት እንኳ ጭኖ አይነሳም፡፡ ከርቀት አንፃር በዚህ ሰዓት ተነሳ ማለት ደግሞ መንገዶች ስለሚዘጋጉ መሐል ከተማ ሥራ ቦታችን ለመገኘት 3፡30 ሰዓትም አንደርስም፡፡

የትኛውም አገልግሎት ከኅብረተሰቡ ፍላጎት ጋር አብሮ ማደግ አለበት፡፡ ከከተማው መስፋፋት ጋር ተያይዞ በቀላሉ ከዳር አካባቢዎች ወደ መሐል ከተማ መድረስ አስቸጋሪ ሆኗል፡፡ ይህን ታሳቢ በማድረግ ለአንበሳ አውቶቡስ ሠራተኞች ተገቢውን የትርፍ ሰዓት ክፍያ በመክፈል ጠዋት የትራንስፖት አገልግሎት ከ11፡30 ሰዓት ጀምሮ ተጠቃሚው ጋር የሚደርሱበት አሠራር ቢዘረጋ፣ እየተፈጠረ ያለውን ከሥራ የመስተጓጎል ችግር መቅረፍ ይቻላል፡፡

                                            (ማቲዎስ ጫኮ፤ በኮዬ ፈጬ)