Skip to main content
x
የታዳጊዎች የምዘና ውድድር የክለቦችን ቀልብ ገዝቷል

የታዳጊዎች የምዘና ውድድር የክለቦችን ቀልብ ገዝቷል

አምስተኛው አገር አቀፍ የታዳጊ ወጣቶች ሥልጠና ፕሮጀክት የምዘና ውድድር የክለቦችን ቀልብ ገዝቷል፡፡ እሑድ ነሐሴ 7 ቀን 2009 ዓ.ም. በሐዋሳ ከተማ የጀመረው ሻምፒዮናው በ13 የስፖርት ዓይነቶች ታዳጊዎችን ማሳተፍ ችሏል፡፡

ዘጠኙም ክልሎችና ሁለት የከተማ አስተዳደሮች የተሳተፉበት አገር አቀፍ ሻምፒዮናው በተለይ በአትሌትክስና እግር ኳስ ውድድሮች ላይ ተስፋ የሰነቁ ታዳጊዎች የክለቦች ትኩረት መሳባቸው ተገልጿል፡፡

ከ17 ዓመት በታች ውድድሩ የዕድሜ ጉዳይ ቀደም ብሎ ጎልቶ የሚታይ የነበረ ቢሆንም፣ ዘንድሮ ግን በመጠኑም ቢሆን መቀነሱ መቻሉን የወጣቶችና ስፖርት ሚኒስቴር የኮሙዩኒኬሽን ምክትል ኃላፊ አቶ እንየው አሊ ለሪፖርተር ገልጸዋል፡፡

‹‹የምዘናው ውድድር ዋና ዓላማ በክልል ሲደረግ የነበረውን የሥልጠናው አፈጻጸም ደረጃ የሚገመገምበትና ልዩ ችሎታና ብቃት ያላቸው ምርጥና ተተኪ ወጣቶች በመምረጥ በቀጣይ የተሻለ ዝግጅት እንዲያደርጉ ምቹ ሁኔታ የሚፈጥርበት ነው፤›› በማለት የወጣቶችና ስፖርት ሚኒስትር ዴኤታ ተስፋዬ ይገዙ አስረድተዋል፡፡

በኢትዮጵያ ኦሊምፒክ ኮሚቲ ፕሬዚዳንት አሸብር ወልደጊዮርጊስ (ዶ/ር) ገለጻ ከሆነ የምዘና ውድድሩ ብቃታቸው ጎልቶ የሚወጡ ታዳጊ ወጣቶች በቀጣይ አገራቸውን ወክለው የሚሳተፉበትን ዕድል ያመቻቻል፡፡ ስፖርተኞች ሳምንትን ባስቆጠረው የምዘናው ውድድር ላይ ክለቦች ከ10 በላይ የስፖርት ዓይነቶች ላይ መሳተፍ ችለዋል፡፡ የጅምናስቲክ፣ ብስክሌት፣ ቦክስ፣ ጠረጴዛ ቴኒስና ፖራሊምፒክ ውድድሮች ፍጻሜያቸውን አግኝተዋል፡፡

ከውድድሩ ጎን ለጎንም ለአሠልጣኞችና ተወዳዳሪዎች ስለዶፒንግ የግንዛቤ ማስጨበጫ ትምህርት እየተሰጠ ይገኛል፡፡

በዘንድሮው ውድድር ወንድ 1,361፣ ሴት 1,014 እንዲሁም 430 አካል ጉዳተኞች ተሳታፊ ሆነዋል፡፡