አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

የአበራሽ ምንስዎ አስደናቂ ድል

   

በኬንያ አዘጋጅነት እየተካሄደ ባለው የዓለም ታዳጊዎች ከ18 ዓመት በታች የአትሌቲክስ ሻምፒዮና፣ በመክፈቻው ሐምሌ 5 ቀን 2009 ዓ.ም. በተካሄደው የልጃገረዶች 3,000 ሜትር ፍጻሜ በኢትዮጵያና ኬንያ አትሌቶች መካከል በተካሄደው ፉክክር የደመቀ ነበር፡፡ የኢንተርናሽናል አትሌቲክስ ፌደሬሽኖች ማኅበር ድረ ገጽ እንደዘገበው፣ በዝናባማው አየር ሁኔታ በደጋፊዎቻቸው ታጅበው ድል ለመምታት ቋምጠው የነበሩት ኬንያውያቱ ኢማኩሌት ቼፕኪሩይና ቢትስ ቼቤት ለኢትዮጵያውያቱ አበራሽ ምንስዎና ይታይሽ መኰንን እጅ ሰጥተዋል፡፡ እስከ መዳረሻው መስመር ድረስ የተፎካከረችው ቼፕኪሩይ አበራሽን መቅደም አልቻለችም፡፡ አበራሽ በ9 ደቂቃ 24.62 ሰከንድ ክሩን በጥሳ ስትገባ፣ በ7 መቶኛ ሰከንድ ልዩነት (9፡33.26) ኬንያዊቷን አስከትላ ገብታለች፡፡ ሐቻምና በኮሎምቢያ ተደርጎ በነበረው ተመሳሳይ የዓለም ሻምፒዮና ውድድር ሹሩ ቡሎ ድል ማድረጓ ይታወሳል፡፡ በሌላ በኩል ከትናንት በስቲያ (ሐምሌ 7 ቀን) በተካሄደው የልጃገረዶች የ2,000 ሜትር መሰናክል ውድድር በነበረው ከፍተኛ ፉክክር ኬንያውያቱ ካሬን ቼቤት (6፡24.80) እና መርሲ ቼፕኲሩይ (6፡26.10) የወርቅና የብር ሜዳሊያውያን ሲያጠልቁ፣ ኢትዮጵያዊቷ እታለመሁ ስንታየሁ (6፡35.79) የነሐስ ሜዳሊያውያን ጨብጣለች፡፡ ፉክክሩ ከፍተኛ ቢሆንም፣ ከስምንት ዓመታት በፊት ኢትዮጵያዊቷ ኮራሁብሽ ኢታ በአንደኝነት ያስመዘገበችውን 6፡11.83 የዓለም ሪከርድ መስበር አልቻሉም፡፡ በሌላ በኩልም በልጆች 1,500 ሜትር ፍጻሜ ኢትዮጵያውያኑ አበበ ዲሳሳና በለጠ መኰንን ከፍተኛ ፉክክር በማድረግ ሁለተኛና ሦስተኛ ሆነው ሲያጠናቅቁ፣ ኬንያዊው ጆርጅ ማናንጎይ ቀዳሚ ሆኗል፡፡ ዛሬ (9/11/2009) የሚጠናቀቀው የታዳጊዎች የዓለም ሻምፒዮና ይህ ዘገባ እስከተጠናቀረበት ዓርብ ምሽት (7/11/2009) ድረስ የነበረው የደረጃ ሠንጠረዥ እንደሚያመለክተው፣ ኩባ በ3 ወርቅና 1 ብር ስትመራ፣ ኬንያ በ2 ወርቅና 3 ብር ሁለተኛ፣ ጀርመን በ2 ወርቅ፣ 1 ብርና 3 ነሐስ ሦስተኛ ናቸው፡፡ ኢትዮጵያ በ1 ወርቅ 1 ብርና 3 ነሐስ ሰባተኛ ደረጃ ላይ ትገኛለች፡፡