የአዲስ አበባ ጡረተኞች ማኅበር የአደረጃጀት ችግር ገጠመው

ከተቋቋመ 23 ዓመት የሞላውና 28 ሺሕ ጡረተኞችን በአባልነት ያቀፈው የአዲስ አበባ ጡረተኞች ማኅበር፣ ላጋጠመው የአደረጃጀት ችግር መፍትሔ እንዲፈልግለት የአዲስ አበባ ሠራተኛና ማኅበራዊ ጉዳይ ቢሮን ጠየቀ፡፡ ቢሮው በበኩሉ ጥያቄው በጥልቀት ከታየ በኋላ አዎንታዊ ወይም አሉታዊ መልስ በቅርቡ እንደሚሰጥበት አስታውቋል፡፡

የማኅበሩ የልማትና ዕቅድ ክፍል ኃላፊ ሻምበል እንግዳወርቅ ማሞ እንደገለጹት፣ ማኅበሩ ለቢሮው ጥያቄውን ያቀረበው ጥር 9 ቀን 2009 ዓ.ም. በጻፈው ደብዳቤና ተደጋጋሚ ጊዜ በአካል በመቅረብ ነው፡፡ ጥያቄውን ለማቅረብ ያነሳሳውም የኢትዮጵያ በጎ አድራጎት ድርጅቶችና ማኅበራት ኤጀንሲ ጉዳዩ ከሚመለከተው መንግሥታዊ አካል ጋር በመሆን እስከ የካቲት 30 ቀን 2009 ዓ.ም ድረስ አደረጃጀቱን እንዲያስተካክል መጋቢት 7 ቀን 2008 ዓ.ም. በቁጥር 02 ሲኤስኤ 7916 ለማኅበሩ በጻፈው ደብዳቤ በማሳሰቡ ነው፡፡

ኤጀንሲው ይህንን ማሳሰቢያ ሊሰጥ የቻለውም ማኅበሩ በአዋጅ ቁጥር 621/2001 አንቀጽ 32 ‹‹መ›› መሠረት ባለመቋቋሙና አፈጻጸሙ ሁሉ ከአዋጁ ውጭ ሆኖ ተገኝቷል በማለት መሆኑን አስረድተዋል፡፡

ማኅበሩ የኤጀንሲው ማስጠንቀቂያ እንደደረሰው ለጠቅላይ ሚኒስትር ጽሕፈት ቤትና ለፌዴሬሽን ምክር ቤት ጉዳዩን ማቅረቡን ሻምበል እንግዳወርቅ ገልጸው፣ ምክር ቤቱ ጉዳዩ የሚሻሻልበት መንገድ ካለ እንደገና እንዲታይ ወደ ኤጀንሲው መመለሱንና ኤጀንሲውም በጽሑፍ ካስተላለፈው ማስጠንቀቂያ ውጭ ምንም እንዳላንገራገረ አስታውቀዋል፡፡

ማኅበሩ በቦሌ ክፍለ ከተማ 22 ማዞሪያ እየተባለ በሚጠራው አካባቢ ለአረጋውያን መዝናኛና  ለገቢ ማስገኚያ የሚውል ባለአራት ፎቅ ሁለገብ ሕንፃ ለማሠራት፣ ከ2,400 ሜትር ካሬ በላይ የሆነ ቦታ ከሊዝ ነፃ በ2002 ዓ.ም. ከመንግሥት ተሰጥቶት ዙሪያውን በአጥር ከልሎ እንዳስከበረ፣ ነገር ግን በአቅም ማነስ ምክንያት እስካሁን ግንባታውን   እንዳልጀመረ ነው ሻምበል እንግዳወርቅ የተናገሩት፡፡

አቅም ፈጥሮ ሁለገቡን ሕንፃ ከማሠራቱ በፊት ግን በቅድሚያ ለጡረተኞች ነፃ የሕክምና አገልግሎት የሚሰጥ ክሊኒክ ለማቋቋም ጉዳዩ የሚመለከተውን መንግሥታዊ አካል የግንባታ ፈቃድ ጠይቆ መልሱን በመጠባበቅ ላይ መሆኑን ከኃላፊው ማብራሪያ ለመረዳት ተችሏል፡፡

የሠራተኛና ማኅበራዊ ጉዳይ ኃላፊ ልዩ ረዳት አቶ ዓለማየሁ ሮሪስ፣ ማኅበሩ ያመለከተውን ጉዳይ በተመለከተ ላቀረብንላቸው ጥያቄ፣ ‹‹ጉዳዩ በቢሮው ኃላፊና አግባብ ባላቸው ባለሙያዎች ከታየ በኋላ የደረስንበትን ድምዳሜ እናሳውቃቸዋለን፤›› ብለዋል፡፡