Skip to main content
x
የኢትዮጵያ ቱሪዝም አባት ሀብተ ሥላሴ ታፈሰ (1918-2009)

የኢትዮጵያ ቱሪዝም አባት ሀብተ ሥላሴ ታፈሰ (1918-2009)

የቱሪዝምን ጽንሰ ሐሳብ ኢትዮጵያ ውስጥ በማስተዋወቅ፣ የኢትዮጵያ ቱሪስት ድርጅት በመመሥረትና በዋና ሥራ አስኪያጅነት ያገለገሉት የአቶ ሀብተ ሥላሴ ታፈሰ ሥርዓተ ቀብር፣ እሑድ ነሐሴ 7 ቀን 2009 ዓ.ም. በመንበረ ጸባዖት ቅድስት ሥላሴ ካቴድራል ከረፋዱ 5 ሰዓት ይፈጸማል፡፡

ከአምስት አሠርታት በላይ በተለይ በቱሪዝም ዘርፍ ለአገሪቱ ያበረከቱት ዘርፈ ብዙ አገልግሎት የተነሳ ‹‹የኢትዮጵያ ቱሪዝም አባት›› የሚለውን መጠሪያ ያገኙት አቶ ሀብተ ሥላሴ፣ በድንገተኛ ሕመም በተወለዱ በ91 ዓመታቸው ያረፉት ረቡዕ ነሐሴ 3 ቀን 2009 ዓ.ም. ነበር፡፡

አቶ ሀብተ ሥላሴ በኢትዮጵያ የቱሪዝም ኢንዱስትሪ መሥራች፣ የአሥራ ሦስት ወራት ፀጋ (13 Months of Sunshine) በሚል መጠሪያ ቱሪዝሙን ለዘመናት ሲያስተዋውቅ የኖረውን መለያ (ብራንድ) የፈጠሩና በዘርፉ በርካታ ሥራዎችና የራሳቸውን የዕደ ጥበብ ውጤት ጨምሮ ያስተዋወቁ ነበሩ፡፡

ከቀረጥ ነፃ የሚሸጥባቸው መደብሮች (ዲዩቲ ፍሪ ሾፕ) የያዘው የኢትዮጵያ ቱሪስት ንግድ ሥራ ድርጅት ከሃምሳ ዓመት በፊት ያቋቋሙት፣ መስህቦችን በስፋት ለማስተዋወቅ የሚያስችል ገንዘብ ለማግኘት ነበር፡፡

በዚህም የመጀመሪያው የገፀ በረከት መደብር በመከፈቱም የአገሪቱን የተፈጥሮና የዕደ ጥበብ ሀብቶችና ባህላዊ ገጽታዎች የሚያንፀባርቁ ቅርፃ ቅርፆች፣ ፖስት ካርዶች፣ ፖስተሮችና የኅትመት ውጤቶች ማቅረብ አስችሏቸዋል፡፡

ኢትዮጵያ ሕይወት የሆነውን ነፋሻማ አየሯን ለዓለም ገበያ ማብቃት አለባት በማለት ይናገሩ የነበሩት አቶ ሀብተ ሥላሴ፣ ከአባታቸው ፊታውራሪ ታፈሰ ሀብተ ሚካኤልና ከእናታቸው ወ/ሮ ሙላቷ በላይነህ በ1918 ዓ.ም. የተወለዱት በአዲስ አበባ ከተማ ነው፡፡ የአንደኛ ደረጃ ትምህርታቸውን በአቴንስ ግሪክ፣ ሁለተኛ ደረጃን በእስክንድሪያ ግብፅ አጠናቀዋል፡፡ በአሜሪካ ሚኒሶታ ዩኒቨርሲቲ በኢንተርናሽናል ሪሌሽን የመጀመሪያ ዲግሪ አግኝተዋል፡፡

በሥራ ዓለምም ሙሉ ትኩረታቸውን በቱሪዝሙ መስክ ከማድረጋቸው በፊት፣ በውጭ ጉዳይ ሚኒስቴር የፕሬስና ኢንፎርሜሽን መምርያ ኃላፊ ሆነው አገልግለዋል፡፡

አቶ ሀብተ ሥላሴ ላበረከቱት አገልግሎት የባህልና ቱሪዝም ሚኒስቴርና ጠቅላይ ሚኒስትር ኃይለ ማርያም ደሳለኝ በቅርቡ ዕውቅና እና ሽልማት መስጠታቸው ይታወሳል፡፡

ነፍስ ኄር ሀብተ ሥላሴ የሁለት ወንዶችና የአንድ ሴት ልጅ አባት ነበሩ፡፡