Skip to main content
x
የኮንሰርቱ ድባብ

የኮንሰርቱ ድባብ

በሚሌኒየም አዳራሽ ሐምሌ 8 ቀን 2009 ዓ.ም. የተካሄደው አዲስ 2 የተሰኘው ኮንሰርት አንጋፋና ወጣት ድምፃውያን ያቀነቀኑበት ነበር፡፡ ከአንጋፋዎቹ ድምፃውያን ዓሊ ቢራና ኤፍሬም ታምሩ እንዲሁም ከወጣቶቹ አቢ ላቀው መድረኩን አድምቀውት አምሽተዋል

ፎቶ በናሆም ተስፋዬ

‹‹ኑ አብረን እንገንባ!››

በኃይሉ ገብረ እግዚአብሔር

በጣም የተመቸኝ ማስታወቂያ፤ ‹‹እናልማት ኢትዮጵያን፤ የሕዳሴው ግድብ ይገደብ በቶሎ፤...›› ምንትስ ቅብርጥስ ከሚሉ የንቅናቄ መዝሙሮች ‹‹ኑ አብረን እንገባ!›› በስንት ጣዕሙ! እኔ ልሙት፤ በስንት ጣእሙ! በተለይ ከእነዜማው ሲደመጥ የሆነ ልብን የሚነቀንቅ ነገር አለው።

ይልቅስ ኑ አብረን እንገባ!
ሥራ፣ ጥበብ፣ ፍቅር፤
ስኬት፣ ኩራት፣ ክብር፤
ኑ አብረን እንገባ!
አብረን እንገባ!
ኑ ኑ አብረን እንገባ!
አብረን እንገባ!
በጋራ - በመተሳሰብ፤
በፍቅር - እንደ ቤተሰብ፤
እጃችን - አይሰበርም፤
ልባችን - አይበገርም፤
አይዝልም - ከቶ ትከሻ፤
ቅርስ ማቆም - ነው የእኛ ድርሻ፤
ኑ አብረን እንገባ!
አብረን እንገባ፤

* * *

የ60 ዓመት ጋብቻን ለመዘከር የተገነባ ሙዚየም

የሚሲሲፒ ነዋሪው ቻርለስ ከሉዊዛ ጋር የተጋባው እ.ኤ.አ. በ1949 ነበር፡፡ 60 ዓመታትን አብረው ከኖሩ በኋላ ‹‹በጣም አፈቅራት ነበር›› የሚላትን ሚስቱን በ2011 በሞት ያጣታል፡፡ በወቅቱ በመቃብሯ ሐውልት ቢያሠራም፣ ይህ አላረካውም፡፡ በመሆኑም ለፍቅራቸው መገለጫ ሙዚየም መገንባትን ይመርጣል፡፡ ከቤቱ አጠገብም አነስተኛ ሙዚየም በመገንባት ከባለቤቱ ጋር የነበረውን የፍቅር ጊዜያት የሚያስታውሱ ፎቶዎችችን፣ ዕቃዎችን አስቀምጧል፡፡ ከሚስቱ ጋር ይደንሱባቸው የነበሩ የሙዚቃ አልበሞችን፣ መጀመርያ ያገኛት ጫማ በመጥረግ ሥራ ላይ ስለነበር የጫማ መጥረጊያ ቁሳቁሶቹን ጭምር በሙዚየሙ አስቀምጧል፡፡ ‹‹ለመግለጽ ከባድ ነው፣ ሆኖም ራስን የሚያሰቃይ ትውስታ አይደለም፡፡ ሕይወታችንን የሚገልጽ ነው፤›› ሲል ሙዚየሙን የሚጎበኙ ሰዎችም ደስተኞች እንደሆኑ ለሲቢኤስ ኒውስ ተናግሯል፡፡

* * *

ለሽያጭ የቀረበ የጨረቃ አፈር

ለመጀመርያ ጊዜ በሰው በተመራው የጨረቃ ጉዞ የተሰበሰበ አፈር ለጨረታ ቀረበ፡፡ እ.ኤ.አ. በ1969 ኔል አርምስትሮንግ ይጠቀምበት በነበረው ቦርሳ ውስጥ የሚገኘውን ከጨረቃ የተሰበሰበ አፈር ለመግዛት ጨረታ የሚያሸንፍ ሰው ግን የአፈሩ ንብረትነት የናሳ መሆኑን መቀበል አለበት ሲል ኢንዲፔንደንት ዘግቧል፡፡ አፈሩ ከ2 ሚሊዮን እስከ 4 ሚሊዮን ዶላር ያወጣል ተብሎ ተገምቷል፡፡

* * *

ዕፅ ተሰረቀብኝ ብሎ ለፖሊስ ያሳወቀ ዕፅ አዘዋዋሪ

ሰዎች ወንጀል ውስጥ መሳተፋቸውን እያወቁ ከወንጀሉ ጋር የተያያዘ ጉዳይን ለፖሊስ ያሳውቃሉ ብሎ መገመት ሊያዳግት ይችላል፡፡ የኤቢሲ ኒውስ ዘገባ ግን፣ በዕፅ አዘዋዋሪነት ስራ የተሰማራው የ32 ዓመቱ ዴቪድ ብላክሞን፣ አንድ ሰው መኪናው ውስጥ ገብቶ 50 ዶላር የሚያወጣ ከኬይን እንደሰረቀው ይናገራል፡፡ በመሆኑም ኮኬይን ይዞ እንደነበር በመናገሩና ሊታሰር ሲል ሁከቱ በመፍጠሩ ተከሷል፡፡

* * *