አዲሱን ድረ ገጽ ይሞክሩ!
አዲሱን ድረ ገጽ ይሞክሩ!

የኮፓ ኮካ ኮላ ብሔራዊ ሻምፒዮና መዳረሻውን ጅግጅጋ አደረገ

  • 30 ሺሕ ተመልካች የሚይዝ ስታዲየም በጅግጅጋ ተመርቋል

የኮፓ ኮካ ኮላ ብሔራዊ የታዳጊ ወጣቶች ዓመታዊ የእግር ኳስ ውድድር የመዳረሻ ምዕራፍ የሆነው ውድድር በጅግጅጋ አደረገ፡፡

ኮፓ ኮካ ኮላ ከመጋቢት 15 ቀን 2009 ዓ.ም. ጀምሮ በሁሉም ክልሎችና ከተማ አስተዳደሮች በሚገኙ ትምህርት ቤቶች መካከል ሲካሄድ የሰነበተ ሲሆን፣ ከየክልሉ የተመረጡ ምርጥ ተጨዋቾችን ለይቶ ለማውጣት ጅግጅጋን መዳረሻው አድርጓል፡፡  

ከነሐሴ 20 እስከ 28 ቀን 2009 ዓ.ም. ቆይታውን የሚያደርገው ሻምፒዮናው በየክልላቸው ትምህርት ቤቶች መሠረታዊ (ግራስ ሩት) ውድድሮችን እንዲሁም የየክልሎቹን ጥሩ ቡድኖች ለመለየት የሚደረጉ የጥሎ ማለፍ ውድድሮችን ባሸነፉ 11 የታዳጊ ወንዶችና በተመሳሳይ 11 የታዳጊ ሴቶች መካከል የእግር ኳስ ውድድሩ ይከናወናል፡፡

በአገሪቱ በሚገኙ 2,000 ትምህርት ቤቶች በተካሄደው ውድድር ዕድሜያቸው ከ15 ዓመት በታች የሆኑ ከ36 ሺሕ በላይ ተማሪዎች ተሳትፈዋል፡፡

የኮካ ኮላ ብራንድ ማናጀር ወይዘሪት ትዕግሥት ጌቱ በዓለም አቀፍ ደረጃ የሚደረጉ የኮፓ ኮላ ውድድሮች ስኬቶችን በመጥቀስ፣ ውድድሩ የኢትዮጵያ እግር ኳስ የወደፊት ተስፋ መሆኑን ገልጸዋል፡፡

ከቅርብ ጊዜ ወዲህ ሌሎች የአፍሪካ አገሮችና ዓለማት ይህንን የታዳጊዎች ውድድር እያዘወተሩት ሲሆን፣ ለክለብና ለብሔራዊ ቡድን ትልቅ ግብዓት የመሆን ዕድላቸውም ሰፊ እንደሆነ ተጠቅሷል፡፡ ለዚህም ዑጋንዳ ከግማሽ በላይ የሚሆኑትን የብሔራዊ ቡድን ተጨዋቿቸውን ከኮካ ኮላ ውድድር መመልመሏ ይነገራል፡፡

በመክፈቻ ሥነ ሥርዓቱ ላይ የተገኙት የኢትዮጵያ እግር ኳስ ፌዴሬሽን ፕሬዚዳንት አቶ ጁነዲን ባሻ በበኩላቸው፣ ‹‹በኢትዮጵያ ውስጥ የእግር ኳስ ክህሎት እጅግ በጣም አለን፡፡ ይህንን ክህሎት ከየክልሉ ለይቶ ለማውጣትና ለማሳደግ በተለያዩ ጥረቶች ላይ ተሰማርተናል፤›› በማለት አስተያየታቸውን ሰንዝረዋል፡፡

በመክፈቻ ሥነ ሥርዓቱ ጎን ለጎንም የክልሉ መስተዳድር አዲስ ያስገነባውን ከ30 ሺሕ በላይ ተመልካች የመያዝ አቅም ያለውን አዲስ ስታዲየም አስመርቋል፡፡