Skip to main content
x
የዋሊያዎቹ አሠልጣኝ የቡድናቸውን ዝርዝር አሳወቁ

የዋሊያዎቹ አሠልጣኝ የቡድናቸውን ዝርዝር አሳወቁ

  • ከግንቦት 11 እስከ 14 ተጨዋቾች የሕክምና ምርመራ ያደርጋሉ

የኢትዮጵያ ብሔራዊ ቡድን (ዋሊያዎቹ) ዋና አሠልጣኝ ሆነው በቅርቡ የተሾሙት አሸናፊ በቀለ በቀጣይ ለሚጠብቃቸው ለአፍሪካና ለቻን ምድብ ማጣሪያ የመረጧቸውን ተጨዋቾች ዝርዝር አሳወቁ፡፡ አሠልጣኙ ከግንቦት 11 እስከ 14 ቀን 2009 ዓ.ም. ተጨዋቾች የሕክምና ምርመራ አድርገው ግንቦት 15 ቀን በሆቴል እንዲሰባሰቡ ፌዴሬሽኑን ጠይቀዋል ተብሏል፡፡

አሠልጣኝ አሸናፊ ይህ ዘገባ እስከተጠናቀረበት የቡድናቸውን ስብስብ ለመገናኛ ብዙኃን ይፋ ባያደርጉም ለፌዴሬሽኑ ግን የ29 ተጨዋችን ዝርዝር ማሳወቃቸው ምንጮች ገልጸዋል፡፡

በዚሁ መሠረት ግብ ጠባቂዎች ለዓለም ብርሃኑ ከሲዳማ ቡና፣ ጀማል ጣሰው ከጅማ አባቡና፣ አቤል ማሞ ከመከላከያ፣ ተክለማርያም ሻንቆ ከአዲስ አበባ ከተማ ሲሆኑ፣ ተከላካዮች አስቻለው ታመነ ከቅዱስ ጊዮርጊስ፣ ሥዩም ተስፋዬ ከደደቢት፣ አብዱርከሪም መሐመድ ኢትዮጵያ ቡና፣ አህመድ ረሻድ ኢትዮጵያ ቡና፣ ተስፋዬ በቀለ አዳማ ከተማ፣ አንተነህ ተስፋዬ ሲዳማ ቡና፣ አዎት ገብረሚካኤል ኢትዮ ኤሌክትሪክ፣ አዲስ ተስፋዬ መከላከያና መጅብ ቃሲም ከአዳማ ከተማ ሆነዋል፡፡

አማካዮች ናትናኤል ዘለቀ ቅዱስ ጊዮርጊስ፣ ብሩክ ቃልቦሬ አዳማ ከነማ፣ ምንተስኖት አዳነ ቅዱስ ጊዮርጊስ፣ ኤፍሬም አሻሞ ደደቢት፣ ሺመክት ጉግሳ ደደቢት፣ ጋቾች ፓኖም ኢትዮጵያ ቡና፣ ታደለ መንገሻ አርባ ምንጭ ከተማ፣ ሙሉዓለም መስፍን ሲዳማ ቡና፣ ጋዲሳ መብራቱ ሐዋሳ ከተማ፣ ሽመልስ በቀለ ከግብፁ ፔትሮ ጀት ሲሆኑ፣ አጥቂዎች ጌታነህ ከበደ ከደደቢት፣ ሳላዲን ሰይድ ከቅዱስ ጊዮርጊስ፣ ኡመድ ኡክሪ ከግብፁ ኢኤል ኢንታግ ኢኤል ሐርባይ፣ አብዱራአህማን ሙባረክ ከፋሲል ከተማና አዲስ ግደይ ከሲዳማ ቡና መሆናቸው ታውቋል፡፡

በ100 ሺሕ ብር ወርኃዊ ክፍያ ዋሊያዎቹን ለሁለት ዓመት ለማሠልጠን ውል የገቡት አሠልጣኝ አሸናፊ፣ ለፌዴሬሽኑ ካሳወቁት ዝርዝር በመነሳት ስብሰባቸው  በአብዛኛው ልምድ ባላቸው ተጨዋቾች ላይ ያተኮረ ነው፡፡ ኢትዮጵያ ለ2019 የአፍሪካ ዋንጫ ማጣሪያ ጋና፣ ኬንያና ሴራሊዮን ከሚገኙበት ምድብ መካተቷ አይዘነጋም፡፡