Skip to main content
x
የጅማ አባቡና አቤቱታ ውሳኔ ያላገኘው በፌዴሬሽኑ ቸልተኝነት እንዳልሆነ ተገለጸ

የጅማ አባቡና አቤቱታ ውሳኔ ያላገኘው በፌዴሬሽኑ ቸልተኝነት እንዳልሆነ ተገለጸ

  • የ2010 የውድድር ፕሮግራም በክረምቱ ምክንያት መራዘሙ ተነግሯል

 ከአንድ ዓመት የፕሪሚየር ሊግ ቆይታ በኋላ በ2009 ዓ.ም. ወደ ከፍተኛ ሊግ የወረደው የጅማ  አባቡና እግር ኳስ ክለብ፣ ለኢትዮጵያ እግር ኳስ ፌዴሬሸን ያቀረበው አቤታቱ ምላሽ ያላገኘው በፌዴሬሽኑ ቸልተኝነት እንዳልሆነ ተገለጸ፡፡ ጉዳዩ በፌዴራል ፖሊስ የምርመራ ቢሮ እጅ እንደሚገኝም ተነግሯል፡፡

በ2009 የውድድር ዓመት የኢትዮጵያ ንግድ ባንክና የአዲስ አበባ እግር ኳስ ቡድኖችን ተከትሎ ወደ ከፍተኛ ሊግ የወረደው የጅማ አባቡና እግር ኳስ ቡድን ‹‹እንድወርድ የተደረገው በ30ኛው የኢትዮጵያ ፕሪሚየር ሊግ መርሐ ግብር ሐዋሳ ከተማና ኢትዮጵያ ኤሌክትሪክ ባደረሱብኝ የጨዋታ ማጭበርበር ነው፤›› በሚል ክለቡ የ‹‹ይመርመርልኝ›› አቤቱታ ለብሔራዊ ፌዴሬሽኑ ማስገባቱ ይታወሳል፡፡ ይሁንና አቤቱታው እስካሁን ድረስ ምንም ዓይነት ውሳኔ ሳይሰጠው የ2010 የፕሪሚየር ሊጉም ሆነ የከፍተኛው ሊግ የውድድር መርሐ ግብር ሊጀመር እየተጠበቀ ይገኛል፡፡ የኢትዮጵያ እግር ኳስ ፌዴሬሽን በበኩሉ ለውሳኔው መዘግየት ተጠያቂ እንዳልሆነ፣ ይልቁንም ጉዳዩ ውሳኔ ማግኘት እንዳለበት እምነቱ መሆኑን ይናገራል፡፡

የብሔራዊ ፌዴሬሽኑ ጽሕፈት ቤት ኃላፊ አቶ ወንድምኩን አላዩ እንደሚናገሩት ከሆነ፣ ‹‹በሁለቱ ክለቦች ማለትም በሐዋሳ ከነማና በኢትዮጵያ ኤሌክትሪክ መካከል የተደረገው ጨዋታ የ‹‹ጨዋታ ማጭበርበር›› ተፈጽሟል? አልተፈጸመም? የሚለው ጉዳይ እስካሁን ድረስ በፌዴራል ፖሊስ የምርመራ ቢሮ እየታየ ያለ ጉዳይ ነው፡፡ ከዚህ ባለፈ ፌዴሬሽኑ እጁ ላይ ባለው ነገር ውሳኔ መስጠት አይችልም፤›› በማለት የጅማ አባቡና አቤታቱ የዘገየበትን ምክንያት ግልጽ አድርገዋል፡፡

የሁለቱ ክለቦችን የሐዋሳ ጨዋታ አስመልክቶ በሐዋሳ ከተማ በኩል የክለቡን ፕሬዚዳንት ጨምሮ ሌሎችም ኃላፊዎች ጨዋታው ከመጀመሩ አስቀድሞ ከኤሌክትሪክ ተጨዋቾች ጋር ስለጨዋታው ሲነጋገር ደርሰንበታል ያሉት የክለባቸው ተጨዋች ላይ የዲሲፕሊን ደንቡ በሚያዘው መሠረት ዕርምጃ ወስደናል ማለታቸው ቀደም ሲል ተገልጿል፡፡ በኢትዮጵያ ኤሌክትሪክ በኩል ግን በዕለቱ በጨዋታው በዳኞችና በጨዋታ ታዛቢ ዳኛው የቀረበውን ሪፖርት መነሻ በማድረግ ክሱንና ውንጀላውን እንደማይቀበሉት መግለጻቸው አይዘነጋም፡፡

በሌላ በኩል ጥቅምት 4 ቀን 2010 ዓ.ም. እንደሚጀመር ፕሮግራም ተይዞለት የቆየው የኢትዮጵያ ፕሪሚየር ሊግ፣ በክረምቱ ምክንያት ለአንድ ሳምንት እንዲራዘም መደረጉ ፌዴሬሽኑ አስታውቋል፡፡ ይህንኑ አስመልክቶ አቶ ወንድምኩን እንደተናገሩት፣ ክረምቱ አሁን በያዘው ሁኔታ የሚቀጥል ከሆነ ፕሪሚየር ሊጉን ጨምሮ ሌሎችም የውድድር መርሐ ግብሮች በተያዘላቸው ፕሮግራም መጀመራቸው ያጠራጥራል፡፡ ምክንያቱም የአዲስ አበባ ስታዲየምን ጨምሮ ሁሉም የክልል  ሜዳዎች ለመገመት በሚያስቸግር መልኩ በዝናቡ ምክንያት በውኃና በጭቃ እንደተያዙ ናቸው፡፡