Skip to main content
x
76ኛው የድል በዓል

76ኛው የድል በዓል

በአምስቱ ዓመታት (1928 - 1933) የፋሺስት ጣሊያን ወረራ በኢትዮጵያ ድል አድራጊነት የተጠናቀቀበት 76ኛ ዓመት፣ ሚያዝያ 27 ቀን 2009 ዓ.ም. ተከብሯል፡፡ በአዲስ አበባ ሚያዝያ 27 አደባባይ፣ ፕሬዚዳንት ሙላቱ ተሾመ (ዶ/ር)፣ የተለያዩ አገሮች ሚሊቲሪ አታሼዎች በተገኙበት ሥነ ሥርዓት ላይ አባትና እናት አርበኞች በሽለላ ቀረርቶና ፉከራ በዓሉን አድምቀውታል፡፡ ታዳጊ ወጣቶችም በየዓመቱ እንደሚያደርጉት በዓሉን እንደ አርበኞቹ በሽለላና በፉከራ አክብረውታል፡፡ ፎቶዎቹ በአዲስ አበባና በጎንደር የነበረውን አከባበር ገጽታ ያሳያሉ፡፡ በሌላ በኩልም በፋሺስት ወረራ ጊዜ ዱር ቤቴ ብለው የከተቱ አርበኞች የዚያ ዘመን ፎቶዎችና ከድል በኋላ የነበረው የሰልፍ ትርዒት የሚያሳዩም ይታያሉ፡፡

***

የጥበብ ውትድርና

በአፌ መትረየስ ውስጥ-አነጣጠርኩና-ፊደላት ብተኩስ

ሐረግ ባከታትል-ርእስ ብሰልስ

በምላሴ እርሳስ ላይ-የነጥብን ጥይት-ብለቀው እሩምታ

ዓላማዬ ሰምሮ-አንዷ የቃል ቀለህ-ልብሽን አድምታ

ሳትሞች አንደቆሰልሽ-ደምሽ ፈሶ ሳይያልቅ

                       ደረስኩልሽና

በአንቀጽ ኮሮጆዬ-ዐረፍተ ነገር-ውኃ መያዣያ

                        ኮዳዬን ከፍቼ

ከምዕራፍ ሬንጀር- ከዩኒፎርሜ ላይ-ፋሻዬን ቀድጄ

አቆምኩና ደሙን-ማርኬሽ ወስጄ

ግዳይ ጥዬ ፎከርኩ-አንችን ይዤ በእጄ፡፡

ታዲያ ወዲያውኑ

የድርሰት ጦርነት-የውጊያ አልባሳቴን-መሣሪያዬን ሁላ

ሸካክፌ አስሬ-ወርውሬ ጣልኩና-ከድሉ በኋላ

ክፍል ላበጅለት-ምዕራፍ ላወጣ-ታሪኩን ብገልጠው

ለካ ልቦለድ ነሽ- ገፀ ባሕርዬ-ምንሽን ልጨብጠው!?

  • ደመቀ ከበደ ‹‹አንድ ክንፍ››፣ (2003)