መጋቢት 23 ተጀምሮ እስከ መጋቢት 29 ቀን ድረስ በሚከበረው የልጆች የመጻሕፍት ሳምንት መጻሕፍት ልክ እንደምግብ ሁሉ ለሰው ልጅ ያላቸውን ጠቀሜታ ለማመልከት በመክፈቻው ቀን 5ዐዐ መጻሕፍትና ዳቦ ለሕፃናት ተበርክቷል፡፡

መጋቢት 24 ቀን በታዋቂው ዴንማርካዊ የሕፃናት ታሪክ ጸሐፊ ሃንስ ክርስቲያን አንደርሰን የተሰየመው "የዓለም አቀፍ የሕፃናት ተረቶች (ታሪኮች) ቀን" ሲሆን በዕለቱ ሕፃናቱ የሃንስ ክርስቲያን ድርሰት የሆነውን "የንጉሡ አዲስ ልብስ" በድራማ መልክ አቅርበዋል፡፡

በልጆች መጻሕፍት ሳምንት ክብረ በዓል ከሚስተናገዱት አንዱ በአሊያንስ ኢትዮ ፍራንሴስ "ዘ ኤሌፋንት ኤንድ ዘ ኮክ" በሚል ርእስ የታተመው የብሔረሰቦች የተረቶች ስብስብ መጽሐፍና በሦስት ቋንቋዎች፣ በአማርኛ፣ እንግሊዝኛ፣ ኦሮምኛ እና አማርኛ፣ እንግሊዝኛ፣ ትግርኛ ቋንቋዎች የተዘጋጁ የተረት ሥዕል መጻሕፍት ይመረቃሉ፡፡

"ቡክ-አ-ቶን" ተብሎ የተሰየመ ንባብና የመጻሕፍትን ሥርጭት ለማበረታታትና የባለ ድርሻ አካላትን ትኩረት እንዲያገኝ የሚጠይቅ ለመጽሐፍ የሚደረግ የአምስት ኪሎ ሜትር የእግር ጉዞ መጋቢት 28 የሚደረግ ሲሆን የንባብ ባህልን በኅብረተሰቡ ውስጥ ለማስፋፋት፣ ማኅበረሰቡ ከማንበብ ጎን ለየአብያተ መጻሕፍቱ መጻሕፍት ማሟላት አስፈላጊ መሆኑን አጽንዖት ይሰጣል፡፡

የእግር ጉዞው የሚነሳው ዋናው ዳሸን ባንክ ጀርባ ከሚገኘው ሾላ የሕፃናት ቤተ መጻሕፍት ሲሆን መድረሻው ዋናው ፖስታ ቤት ይሆናል፡፡

የመጻሕፍት ሳምንቱ የሚጠናቀቀው በኢትዮጵያ አንድነት ትምህርት ቤት ቅጥር ግቢ አዲስ በተከፈተ ቤተ መጻሕፍት ምረቃ ይሆናል፡፡

የኢትዮጵያ መጻሕፍት ለልጆችና የትምህርት ድርጅት በኢትዮጵያ ውስጥ ትምህርት፣ የልጆችና የወጣቶች መጻሕፍት ሕትመትን ለማስፋፋት የተቋቋመ ተቋም ሲሆን፣ በኢትዮጵያ ውስጥ ያስተዋወቀው የመጀመሪያው በአህያ የሚጎተት ቤተ መጻሕፍት በአዋሳ ዙሪያ ላሉ ገጠራማ አካባቢዎች እየተዘዋወረ አገልግሎት እንደሚሰጥ ይታወቃል፡፡

የአዲስ አበባው ሾላ የሕፃናት ቤተመጻሕፍት 15"000 መጻሕፍት ያሉት ሲሆን ዕድሜያቸው ከ8 እስከ 18 የሆኑ ልጆች ይስተናገዱበታል፡፡
በሔኖክ ያሬድ