አቶ መስፍን ፓርቲው ከምርጫው ራሱን ስለማግለሉ ባለፈው ረቡዕ ዕለት ይፋዊ ጋዜጣዊ መግለጫ በሰጠበት ወቅት ተቃውሟቸውን አሰምተዋል፡፡

አቶ መስፍን የፓርቲው የሥራ አስፈፃሚ ኮሚቴው ከምርጫ ራሱን ማግለሉ ተገቢ አለመሆኑን አስታውቀዋል፡፡ ኦፌዴን በዛሬ ምርጫ በትንሹ ሦስት ቦታዎች ላይ ማሸነፍ የሚችልበት እድል መኖሩን ጠቅሰው የፓርቲውን ውሳኔ ተቃውመዋል፡፡

የፓርቲው የፓርላማ ተጠሪ የፓርቲው የስራ አስፈፃሚ ኮሚቴ ውሳኔውን አስመልክቶ እንደ ፓርቲ አባልነት ያላማከራቸው መሆኑን ገልፀዋል፡፡ በዚህም የፓርቲው አባላትና ደጋፊዎች ለምርጫው መሰዋዕትነትን ከፍለው ለድምፅ አሰጣጡ በተዘጋጁበት ወቅት ፓርቲው ከምርጫው ራሱን ማግለሉ አግባብ አለመሆኑን ገልፀዋል፡፡ የፓርቲው ውሳኔም ጊዜውን የጠበቀ አለመሆኑን አቶ መስፍን ጠቁመዋል፡፡

የፓርቲው የሥራ አስፈፃሚ ኮሚቴ “አምባገነናዊነት ይታይበታል” ሲሉ አቶ መስፍን አማርረዋል፡፡ በዚህም የፓርቲው አባላት በጉዳዩ ላይ አለመወያየታቸውን ገልፀዋል፡፡

የአቶ መስፍንን ቅሬታ በተመለከተ የፓርቲው ሊቀመንበር አቶ ቡልቻ ደመቅሳ ተጠይቀው በሰጡት ምላሽ ፓርቲውን ከምርጫ መውጣት አለመውጣት ውሳኔ የሚሰጠው የሥራ አስፈፃሚ ኮሚቴው መሆኑን አስታውቀዋል፡፡ የሥራ አስፈፃሚው ኮሚቴው በፓርቲው አባላት የተመረጡ መሆናቸውንና ፓርቲው የሚከተለውን አቅጣጫ የመወሰን ኃላፊነት እንዳለበት አስታውቀዋል፡፡

አቶ ቡልቻ ደመቅሳ አያይዘውም አቶ መስፍን ከፓርቲው ስርዓት ውጪ የልዩነት አመለካከታቸውን በጋዜጣዊ መግለጫ ወቅት መሰንዘራቸው አግባብ እንዳልሆነ ገልፀዋል፡፡ “አቶ መስፍን እንደዚህ ዓይነት ጥፋት ሲያጠፉ የመጀመሪያው ቢሆንም አንዳንድ ጊዜ ያፈነገጠ ሀሳብ ያራምዳል” ሲሉ ተችተዋል፡፡

ለዚህም የፓርቲው የሥራ አስፈፃሚ ኮሚቴ በአቶ መስፍን አድራጐት ላይ ተወያይቶ ውሳኔ እንደሚያስተላልፍ አስታውቀዋል፡፡

በተሾመ ንቁ