ከእነዚህም መካከል የሥራ ፈቃድ የተሰጣቸው 675 ባለሙያዎች፣ 96 ኮንትራክተሮችና 15 አማካሪ ድርጅቶች ሲሆኑ ሌሎች 12 ድርጅቶች እና 54 ባለሙያዎች ደግሞ የውሃ ጉድጓድ ቁፋሮና ጠረጋ ሥራ የሙያ ብቃት ማረጋገጫ ሰርቲፊኬት ማግኘታቸውን አስረድቷል፡፡

በሌላ በኩል ደግሞ የ15 አነስተኛ ከተሞች የውኃ ተቋማት ጥናትና ዲዛይን፣ እንዲሁም የ30 ከተሞች ዲዛይን፣ የስምንት ከተሞች ውኃ ተቋማት ማስፋፊያና ማሻሻያ ጥናትና የ60 ከተሞች አዳዲስ የውኃ ተቋማት ግንባታ ማስፋፊያ ሥራዎች መከናወናቸውን ገልጿል፡፡

ከ15 ሺህ ሕዝብ በታች ያላቸው የ31 ከተሞች አስቸኳይ መልሶ ማቋቋም፣ ጥገናና ማስፋፊያ ሥራዎች ለማጠናቀቅና ሌሎች የ56 ከተሞች የፊዚቢሊቲ ጥናትና የቢዝነስ ፕላን ዝግጅት፣ እንዲሁም የዲዛይን ሥራዎች ለማካሄድ ታቅዶ የ31 ከተሞች የአስቸኳይ መልሶ ማቋቋም ጥገናና የማስፋፊያ ሥራዎች መጠናቀቃቸውን ሚኒስቴር መሥሪያ ቤቱ አመልክቷል፡፡

በተጠናቀቁ የውኃ ተቋማት በአጠቃላይ 105 ሺህ 600 ነዋሪዎች ተጠቃሚ መሆናቸውን፣ 1 ሺህ 538 የገጠር የውኃ ተቋማትን ለመገንባት ታቅዶ የ1 ሺህ 400 ተቋማት ግንባታ ሥራ መከናወኑንና በዚህም 454 ሺህ 639 ነዋሪዎች የንጹህ መጠጥ ውኃ ማግኘታቸውን ሚኒስቴሩ አስረድቷል፡፡