ምንጮች እንዳመለከቱት እስካሁን ባለው አሠራርና ደንብ ተፈናቃዮቹ መጠለያ ጣቢያ ከገቡ ከአንድ ሳምንት በኋላ ለመቋቋሚያ የሚሆን በነፍስ ወከፍ 3ሺህ ብር እየተሰጣቸው ወደየዘመዶቻቸው እንዲቀላቀሉ ይደረግ ነበር፡፡ በአሁኑ ጊዜ ግን ያሉት ተፈናቃዮች መጠለያ ከገቡ ሁለት ወር እንደሞላቸው፣ ቁርስ ምሳና ራት ከሚቀርብላቸው በስተቀር እስካሁን መቋቋሚያ እንዳልተሰጣቸው አስረድተዋል፡፡

ኃላፊው አቶ ፍስሀ ታወቀ በበኩላቸው የመቋቋሚያ ገንዘብ እንዲላክ ለፌዴራል አደጋ መከላከልና ዝግጁነት ኤጀንሲ ጥያቄ መቅረቡን፣ በጥያቄው መሰረት ገንዘቡ እንደተላከ ወዲያውኑ የማከፋፈሉ ሥራ እንደሚቀጥል አስረድተዋል፡፡

የፌዴራል አመዝኤ የእርዳታ ፕሮግራም አፈፃፀምና ክትትል መምሪያ ኃላፊ ስለዚሁ ጉዳይ እንዲያነጋግሩን በፀሐፊያቸው አማካይነት በስልክ ጠይቀናቸው ወደ ሕዝብ ግንኙነት አገልግሎት መርተውናል፡፡

አቶ ሲሳይ ታደሰ የፌዴራሉ አመዝኤ የሕዝብ ግንኙነት ቡድን መሪ በበኩላቸው ቀደም ሲል ለመቋቋሚያ የሚሆን ገንዘብ ከማዕከሉ ይላክ እንደነበር አሁን ግን ይህ አይነቱ አካሄድ ቀርቶ ክልሎች ራሳቸው እንዲሸፍኑ መደረጉን አስረድተዋል፡፡