በተስፋዬ ሁንዴ፣ ከደን ምርምር ማዕከል

ውኃ በምድራችን ላይ ሕይወት ያለው ፍጡር ሁሉ ከሚያስፈልገው መሠረታዊ ነገሮች አንዱና ዋነኛ ነው፡፡ ውኃ ለሕይወት አስፈላጊ እንደመሆኑ መጠን፣ ለሕይወትና ለልማት መጥፋትም ከፍተኛ ሚና ይጫወታል፡፡ ይህም አሉታዊ ገጽታው የሚከሰተው ውኃ ከመጠን በላይ በሚበዛበትና ወይም እጥረት በሚያጋጥምበት ወቅት ነው፡፡ ባለፉት ዓመታት በሀገራችን በተደጋጋሚ በደረሰው ድርቅና የጎርፍ አደጋዎች የተቀጠፈውን የሰው ሕይወትና ያጠፉትን የልማት አውታሮችን ማስታወስ በቂ ማስረጃ ነው፡፡ እንዲሁም በመዲናችን በየዓመቱ በክረምት ወራት ብቻ በልማት አውታሮች እና በሰው ሕይወት ላይ የሚደርሰውን ጥፋት ከምናየው እና ከምንሰማው ሁኔታ በጣም የሚያስደነግጥና የሚያስፈራ ነው፡፡