የተባበሩት መንግሥታት ድርጅት ባስተላለፈው መግለጫ መሠረት ወታደሮቹ ኤርትራን ለቀው መውጣት አልቻሉም፡፡ የኤርትራ መንግሥት በአካባቢው ለተሰማራው የተመድ የሰላም አስከባሪ ኃይል የምግብና የነዳጅ አቅርቦት በማቋረጡ፤ ተመድ ወታደሮቹ ኤርትራን ለቀው ወደ ኢትዮጵያ እንዲገቡ ትዕዛዝ አስተላልፏል፡፡

በዚህም ኤርትራን ለቀው እንዲወጡ የተፈቀደላቸው ስድስት ተሽከርካሪዎች ብቻ መሆኑን ተመድ ገልጿል፡፡

በተመድ የሠላም ማስከበር ክፍል ተጠሪ ጄን ማሪ ጉሄኖ “ኤርትራ የተመድ ወታደሮች በአሳሳቢ ሁኔታ ውስጥ ይገኛሉ” ሲሉ ገልፀዋል፡፡ በመቶዎች የሚቆጠሩ የተመድ ወታደሮች የኤርትራን ድንበር ተሻግረው ወደ ኢትዮጵያ መግባት እንዳልቻሉ የገለፁት ተጠሪው፤ “ጉዳዩ በአፋጣኝ መፍትሔ የሚሻ ነው” ብለዋል፡፡

ባለፈው አርብ የአስቸኳይ ጊዜ ስብሰባ ያደረጉት የተመድ የፀጥታ ምክር ቤት አሥራ አምስት አባል ሀገራት ወታደሮቹ የገጠማቸው የእገታ ሁኔታ አሳሳቢ መሆኑን ገልፀዋል፡፡

በተባበሩት መንግሥታት ድርጅት የኤርትራ አምባሳደር አርአያ ደስታ ኤርትራ ለወታደሮቹ የሀይል ፍጆታ የሚሆን አቅርቦት እንደሌላት ገልፀው፤ “የፀጥታው ምክር ቤት መግለጫ አሳፋሪ ነው” ሲሉ አስታውቀዋል፡፡ “የፀጥታው ምክር ቤት ኤርትራ ተጠቂ ሳለች ተጨማሪ ጥቃት እየሰነዘረ ነው፡፡ ይህም አሳፋሪ ነው” ሲሉ አምባሳደር አርአያ ገልፀዋል፡፡

የኢትዮጵያ መንግሥት የተመድ የሠላም አስከባሪ ወታደሮች ወደ ኢትዮጵያ ቢገቡ አስፈላጊውን አቅርቦት እንዲሁም ድጋፍ የሚያደርግ መሆኑን ገልጿል፡፡

የተመድ ዋና ፀሀፊ ባንክ ኢሙን በበኩላቸው ኤርትራ የሰላም አስከባሪ ኃይል አባላት በኢትዮጵያ የሚያደርጉትን ጊዜያዊ ሰፈራ እያሰናከለች መሆኑን ተናግረዋል፡፡

በጋዜጣው ሪፖርተር