በዩኒቨርሲቲው የመጻሕፍት ዝግጅት ተቋም ዳይሬክተር ኘሮፌሰር ማስረሻ ፈጠነ በሰጡት መግለጫ በዓይነቱ ልዩ የሆነው ዐውደ ርዕይ የአዲስ አበባ ዩኒቨርሲቲ መጻሕፍት ማዕከልና ሌሎች በሀገር ውስጥና በውጭ ሀገር የሚገኙ አሳታሚዎች በቅርብ ያሳተሟቸው መጻሕፍት ለእይታ የሚቀርቡበት፣ ደራስያን፣ መጻሕፍት አሳታሚዎች፣ አታሚዎች፣ የመጻሕፍት ሽያጭ መደብሮች፣ የቤተ መጻሕፍት ሠራተኞች ተማሪዎችና ኅብረተሰቡ የሚገናኝበት መድረክና ትልቅ የመጻሕፍት ግብይት የሚደረግበት ዝግጅት መሆኑን አስታውቀዋል፡፡

ከመጋቢት 1 እስከ 7 በአዲስ አበባ ዩኒቨርሲቲ ዋናው ግቢ (6 ኪሎ) በሚኖረው ዝግጅት የዘመኑ ደራስያን ከመጻሕፍቶቻቸው የሚያነቡበት፣ አንጋፋ ደራስያን የሕይወት ገጠመኞቻቸውን የሚያጋሩበት እንደሚሆን ያወሱት ዳይሬክተሩ፣ በመጻሕፍት ሕትመትና ሥርጭት፣ በንባብ ባህል ዙሪያ ጥናታዊ ጽሑፎች የሚቀርቡበት የውይይት መርሐ ግብር እንደሚኖር አስረድተዋል፡፡ በ1960 ዓ.ም. የተመሠረተውና ያልታተሙ ጽሑፎችን ተቀብሎ ለትምህርትና ለልዩ ልዩ ጥናት ጠቃሚነታቸውን በመመዘን የመማሪያና የማጣቀሻ መጻሕፍትን፣ የምርምር ሥራ ውጤቶችንና የተለያዩ የታሪክ፣ የማኅበራዊና ኢኮኖሚያዊ ጉዳዮችን የያዙ ጽሑፎችን በማሳተም በርካታ መጻሕፍትን ለሥርጭትና ለግብይት ማቅረቡን ገልጸዋል፡፡

የቆዩና ፈርጥ የተባሉ ጽሑፎች ከወራሾቻቸው ጋር በመስማማት በማሳተም ላይ የሚገኘው ተቋም በአገሪቱ ከፍተኛ ትምህርት ተቋማት ያለውን የመማሪያና የማጣቀሻ መጻሕፍት እጥረትና ክፍተት ለማሟላት እየሠራ ይገኛል፡፡

በታላላቅ የአውሮፓና የአፍሪካ ከተሞች በየጊዜው የመጻሕፍት ዐውደ ርዕይና ሽያጭ (ቡክ ፌር) የሚካሄድ በመሆኑ የአፍሪካ መዲና በሆነችው አዲስ አበባ ለወደፊት ዓለም አቀፍ በሆነ ይዘት በየዓመቱ በቋሚነት ለማካሄድ ዝግጅት መኖሩን ኘሮፌሰር ማስረሻ ጠቁመዋል፡፡

በሔኖክ ያሬድ