Skip to main content
x
ክቡር ሚኒስትሩ ከሌላ ሚኒስትር ጋር እያወሩ ነው

ክቡር ሚኒስትሩ ከሌላ ሚኒስትር ጋር እያወሩ ነው

[ክቡር ሚኒስትሩ አንድ ስብሰባ ተካፍለው በሻይ ሰዓት ከአንድ ተመራማሪ ጋር እያወሩ ነው]

  • ስለተገናኘን በጣም ደስ ብሎኛል ክቡር ሚኒስትር፡፡
  • እኔም በጣም ደስ ብሎኛል፡፡
  • ስብሰባውን እንዴት አገኙት?
  • ችግር ብቻ ነው እየተወራ ያለው፡፡
  • የኢትዮጵያ ችግር እኮ ሥር የሰደደ ነው፡፡
  • የምን ችግር ነው የምታወራው?
  • ይኸው እዚህ የደረስነው እኮ ከችግራችን ጥልቀት የተነሳ ነው፡፡
  • ምን እያልክ ነው?
  • ችግሩ በሁሉም ሰው አመለካከት ውስጥ ነው ያለው፡፡
  • ምን እያወራህ እንደሆነ አልገባኝም?
  • በምሳሌ ባስረዳዎት ይሻላል ክቡር ሚኒስትር፡፡
  • እሺ አስረዳኝ፡፡
  • የኢትዮጵያን ነጋዴ መመልከት እንችላለን፡፡
  • ነጋዴው ምን ሆነ?
  • በአገራችን ውስጥ ያሉ ነጋዴዎች በአቋራጭ መክበር ነው የሚፈልጉት፡፡
  • ምን ነካህ ዘመኑ እኮ በአቋራጭ የመክበሪያ ነው፡፡
  • አዩ ችግሩ ሥር የሰደደ ነው ያልኩዎት ለዚህ ነበር፡፡
  • እንዴት ማለት?
  • እርስዎም የሚያስቡት እንደዚህ ነው፡፡
  • ምንድነው የማስበው?
  • በአቋራጭ መክበር፡፡
  • ችግሩ ግን አልገባኝም፡፡
  • በአቋራጭ የሚያገኙት ምንም ነገር ወዲያው ነው የሚጠፋው፡፡
  • ሀብትህ ቶሎ ይጠፋል እያልከኝ ነው?
  • ክቡር ሚኒስትር በአቋራጭ ያከማቹት ሁሉ እንደ ጤዛ ነው የሚጠፋው፡፡
  • ምን ዓይነት ጣጣ ነው?
  • ለማንኛውም የእኛ አገር ነጋዴዎች አገርን ጠቅመው ከመበልፀግ ይልቅ፣ ራሳቸውን ብቻ በአቋራጭ ነው ማበልፀግ የሚፈልጉት፡፡
  • እ…
  • የአገራችን ነጋዴዎች ፋብሪካ ቢከፍቱ እንኳን የኢትዮጵያን ሕዝብ የምሥራቅ አፍሪካን ሕዝብ መመገብ ይችላሉ፡፡
  • እሱስ አቅም ያላቸው ነጋዴዎች እንዳሉን አውቃለሁ፡፡
  • ሆኖም አገሪቱ ለሌሎች አገሮች ምርቶች ጥገኛ እንድትሆን እያደረጉ፣ እነሱ በአቋራጭ ይከብራሉ፡፡
  • ምን ይደረግ ነው የምትለው?
  • ክቡር ሚኒስትር ይኼ አመለካከት ነጋዴ ዘንድ ብቻ አይደለም ያለው፡፡
  • ሌላ ደግሞ ማን አለ?
  • ሁሉም ሰው እኮ በአቋራጭ የመክበር አመለካከት ነው ያለው፡፡
  • ወይ ጣጣ?
  • ይኸው አዲሱ ጠቅላይ ሚኒስትር ራሳቸው በአንድ ጀንበር ለውጥ እንዲያመጡ እየተጠበቀባቸው አይደል እንዴ?
  • እሳቸውን ወንበር ላይ ያስቀመጠው እኮ ፈጣን ለውጥ ነው፡፡
  • ቢሆንም ክቡር ሚኒስትር፣ የአገሪቱ ችግር ለዘመናት አብሯት የነበረ ነው፡፡
  • ሕዝቡ ለውጥ ስለሚፈልግ ነዋ?
  • ለውጥ ሒደት እንጂ የተቀመመ መድኃኒት አይደለም እኮ፡፡
  • ለውጥ በአቋራጭ መምጣት የለበትም እያልክ ነው?
  • ክቡር ሚኒስትር ለውጥን እየተቃወምኩ ሳይሆን፣ ለውጥ ራሱ በአቋራጭ ከመጣ አይቆይም፡፡
  • ግራ አጋባኸኝ እኮ?
  • ለማለት የፈለኩግት ነገር የለውጦች ለውጥ መምጣት የሚችለው አንድ ነገር ሲለወጥ ብቻ ነው፡፡
  • ምን ሲለወጥ?
  • አመለካከት!

[ክቡር ሚኒስትሩ ደላላ ወዳጃቸው ደወለላቸው]

  • ምንድነው ክቡር ሚኒስትር ተጨንቄ ልሞት ነው?
  • ምን ሆንክ ደግሞ?
  • ይኸው እንቅልፍ ራሱ አልወስድ ካለኝ ሰነባበትኩ፡፡
  • ባለፈው አንድ ጠርሙስ ሙሉ አይደል እንዴ የሰጠሁህ?
  • ምንድነው የሰጡኝ?
  • የእንቅልፍ ኪኒን ነዋ፡፡
  • እሱን ኪኒን ተለማምጄው ጭራሽ ስወስደው እነቃቃለሁ፡፡
  • የግምገማ ሰሞን የምወሰደውን ኪኒን እኮ ነው የሰጠሁህ?
  • ለዚያ ነው እንዴ በህልሜ ራሱ እስር ቤት የማየው?
  • ምን ላድርግህ ታዲያ?
  • ከአገር እንዳልወጣ ዶላር የለም እየተባለ ነው፡፡
  • በአንተ ግን ይኼ አያምርም፡፡
  • ምነው ክቡር ሚኒስትር?
  • ውጭ ያን ሁላ ዶላር አስቀምጠህ ዶላር የለም ስትል አታፍርም?
  • ከሰው ጋር ልመሳሰል ብዬ ነው፡፡
  • ከአንተ ጋር ማን ይመሳሰላል?
  • ለማንኛውም ዕጣ ፈንታችን ምንድነው የሚሆነው?
  • ምን እያልክ ነው?
  • ሥራ ቀዝቅዟል እኮ ክቡር ሚኒስትር፡፡
  • ስማ አሁን አገሪቷ እየተረጋጋች ስለሆነ መስተካከሉ አይቀርም፡፡
  • ምን ነካዎት ክቡር ሚኒስትር?
  • ምነው?
  • የእኛ ሥራ እኮ አገር ስትተራመስ ነው የሚጦፈው፡፡
  • እ…
  • አገር ሲታመስ ነው ሀብት መሸሽ የሚችለው፣ መሬቱ የሚቸበቸበው፣ ሙስናውም የሚጦፈው፡፡
  • ምን እያልከኝ ነው?
  • ይኸው ስንት ኢንቨስተር ነው መሬት እየጠየቀኝ ያለው?
  • መቼም አሁን ያለውን ነገር ታውቀዋለህ?
  • እሱማ አውቃለሁ፡፡
  • ስለዚህ በዚህ ወቅት ሌላ ስትራቴጂ መንደፍ ነው ያለብህ፡፡
  • እሱ እኮ ነው ግራ የገባኝ?
  • በፊት ትሠራ እንደነበረው አሁን መሥራት አትችልም፡፡
  • ፋብሪካ የሚያሠራ ኮሚሽን ለምጄ እንዴት የሱቅ ልቀበል?
  • ከጊዜው ጋር መለወጥ አለብህ፡፡
  • በሰፊው ሥራ የለመደ ሰው እኮ ችግር ነው ክቡር ሚኒስትር፡፡
  • ቂሊንጦ መግባት ካማረህ እንግዲህ ቀጥልበት፡፡
  • ክቡር ሚኒስትር የአዲሱ ሰውዬ ወሬው ራሱ በጣም የሚያስፈራ ነው፡፡
  • ምኑ ነው ያስፈራህ?
  • ባለፈው ከነጋዴዎች ጋር ያወራው ሁሉ አስጨንቆኛል፡፡
  • ምኑ ነው ያስጨነቀህ?
  • ዶላሩን መልሱ ያለው ነዋ፡፡
  • ምን አሰብክ ታዲያ?
  • ልመልስ፣ አልመልስ እያልኩ እየተወዛገብኩ ነው፡፡
  • ምኑ ነው ያወዛገበህ?
  • በነገራችን ላይ እርስዎንም ይመለከታል፡፡
  • ምኑ ነው የሚመለከተኝ?
  • የጠቅላይ ሚኒስትሩ ጥሪ ነዋ፡፡
  • እኔማ ለጥሪው ያለኝ ምላሽ ይታወቃል፡፡
  • ምንድነው ምላሽዎት?
  • ጥሪ አልቀበልም!

[ክቡር ሚኒስትሩ ከሚስታቸው ጋር እያወሩ ነው]

  • ክፍያቸው እንደደረሰብን ታውቃለህ አይደል?
  • የምን ክፍያ?
  • የልጆች ትምህርት ቤት ክፍያ ነዋ፡፡
  • ምን ችግር አለ ይከፈላላ፡፡
  • በዚያ ላይ ቢዝነሶቼ በሙሉ ተቀዛቅዘዋል፡፡
  • እኔ ምን ላድርግሽ ታዲያ?
  • ሰውዬ በፊት በስልክ የሚያልቁልኝ ነገሮች አሁን ሳምንታት እየፈጁ ነው፡፡
  • ያው ቢሮክራሲውን ለማጥፋት እኛም እየታገልን ነው፡፡
  • ስማ እኔ እንደ ሌላው የቢሮክራሲው ገፈታ ቀማሽ መሆን አልፈልግም፡፡
  • ምን እያልሽ ነው?
  • የሚኒስትር ሚስት ስለሆንኩ ነገሮች በአፋጣኝ እንዲያልቁልኝ ነው የምፈልገው፡፡
  • አሁን ነገሮች እንደ ድሮው አይደሉም፡፡
  • እሱንማ ሰምቼ ምን እንደምናደርግ ጨንቆኛል?
  • ምኑ ነው የጨነቀሽ?
  • ስንት ሥራ በአንተ ስም አይደል እንዴ ሲያልቅልኝ የነበረው?
  • አሁን ግን ማስጠንቀቂያ ተሰጥቶኛል፡፡
  • ምን ዓይነት ማስጠንቀቂያ?
  • የያዝኩት ወንበር ሕዝብን ማገልገያ እንጂ ራሴን ማገልገያ እንዳልሆነ ተነግሮኛል፡፡
  • ከዚህ በኋላ ምን ልትሆን ነው ታዲያ?
  • እንዴት ማለት?
  • አንተ ዘመንህን ሙሉ በሥልጣንህ ራስህን አገለገልክ እንጂ መቼ ሕዝብ አገለገልክበት?
  • እኔም ግራ ተጋብቻለሁ፡፡
  • ምን ተሻለ ታዲያ?
  • የተሰጠኝን አቅጣጫ ተከትዬ መሥራት ነዋ፡፡
  • ዕድሜህን ሙሉ ስትሰርቅ የነበርክ ሰው ነህ እኮ?
  • ምን ላድርግ ታዲያ?
  • የማታውቀውን ሥራ ይዘህ ልትዋረድ ነው እኮ?
  • እ…
  • ሰውዬ መዋረጃህ ደርሷል፡፡
  • ዓይኔ እያየማ አልዋረድም፡፡
  • በዚያ ላይ ስንት ወንጀል እንደፈጸምክ ታውቃለህ፡፡
  • እ…
  • የብዙ ሰዎች ደም እጃችን ላይ እንደለ ታውቃለህ?
  • ሴትዮ ለምን ታስፈራሪኛለሽ?
  • ስማ አካሄዱ በዚህ ከቀጠለ ጥሩ አይደለም፡፡
  • ምን እያልሽ ነው?
  • አንድ አማራጭ ብቻ ነው ያለን፡፡
  • ምንድነው እሱ?
  • በአስቸኳይ መጥፋት፡፡
  • ከየት ነው የምንጠፋው?
  • ከአገር!

[ክቡር ሚኒስትሩ ከሌላ ሚኒስትር ጋር እያወሩ ነው]

  • አሉ እንዴ ክቡር ሚኒስትር?
  • የት እንድሄድ ፈለግህ ደግሞ?
  • በዚህኛው ካቢኔ ውስጥ አሉበት አይደል?
  • ይሻራል ብለህ ጠብቀህ ነበር?
  • እንደ እርስዎ ግን ዕድለኛ ሰው ያለ አይመስለኝም፡፡
  • ምን እያልክ ነው?
  • ክቡር ሚኒስትር የእርስዎ ቅሌት መቼ ተወርቶ ያልቃል?
  • ስድቡ ቢቆይስ?
  • እርስዎ መሠረታዊ ችግር እኮ ነው ያለብዎት፡፡
  • የምን ችግር ነው?
  • የስርቆት ነዋ፡፡
  • ምን?
  • የሌብነት ችግር አለብዎት፡፡
  • ሰውዬ መስመር እያለፍክ እኮ ነው?
  • እንዲያውም ስለመስመር ካወሩማ፣ በከባድ ሁኔታ መስመሩን ያለፉት እርስዎ ነዎት፡፡
  • የምን መስመር ነው ያለፍኩት?
  • የጠቅላይ ሚኒስትሩን ቀይ መስመር ነዋ፡፡
  • እ…
  • ይኼን ሁሉ ጥፋት ሠርተው አሁንም በሥልጣን ላይ መሆንዎ ይገርማል፡፡
  • የሰው መውደድ ይስጥህ ነው የምልህ፡፡
  • ለማንኛውም ቀይ መስመሩን በቅርቡ እንደሚጥሱት እርግጠኛ ነኝ፡፡
  • ለምን ቀይ መስመሩን እንደምጥስ ታውቃለህ?
  • ለምንድነው የሚጥሱት?
  • ከለር መለየት አልችልም፡፡
  • ማለት?
  • ከለር ብላይንድ ነኝ!