Skip to main content
x
ለ50 ታካሚዎች የኩላሊት ንቅለ ተከላ ተደረገ

ለ50 ታካሚዎች የኩላሊት ንቅለ ተከላ ተደረገ

የቅዱስ ጳውሎስ ሆስፒታል ሚሌኒየም ሕክምና ኮሌጅ ብሔራዊ የኩላሊት ንቅለ ተከላ ሕክምና ማዕከል ባለፉት ሁለት ዓመታት የኩላሊት ችግር ላለባቸው 50 ታካሚዎች የኩላሊት ንቅለ ተከላ አገልግሎት መስጠቱን አስታወቀ፡፡

የኮሌጁ የውስጥ ደዌ፣ የኩላሊት ስፔሻሊስት ሐኪምና የማዕከሉ ሜዲካል ዳይሬክተር ሞሚና መሐመድ (ዶ/ር) እንደገለጹት፣ በተጠቀሱት ዓመታት ሜቺጋን ዩኒቨርሲቲ ጋር በመተባበር ከተካሄደው የንቅለ ተከላ አገልግሎት መካከል አንዱ ብቻ ውጤት አልባ ሲሆን፣ የቀሩት ግን የተሳካና ውጤታማ ሆነዋል፡፡

አርባ ዘጠኙም ታካሚዎች በጥሩ ሁኔታ ላይ እንደሚገኙ፣ ከእነዚህም መካከል አንዷ ባል አግብታ ልጅ በደህና ሁኔታ እንደተገላገለች አብዛኞቹ ደግሞ የየራሳቸውን ፕሮጀክቶች እየቀረጹ ወደ ተግባር እንደገቡ ተናግረዋል፡፡

የኩላሊት ንቅለ ተከላውም የተካሄው ከታካሚዎች ጋር በጋብቻ ወይም በደም ዝምድና ካላቸው ለጋሾች በፈቃደኝነት በተወሰደ ኩላሊት ሲሆን፣ የተከናወነውም የቀዶ ሕክምና፣ የኩላሊት ስፔሻሊስቶች፣ የሥነ ልቦናና የሥነ አዕምሮ ሐኪሞች እንዲሁም ነርሶችን ባሳተፈ መልኩ ነው፡፡ በእነዚህም ዘርፎች ውስጥ ላሉት ባለሙያዎች ሥልጠና መጠቱን አመልክተዋል፡፡

አራት ባለሙያዎችም በኩላሊት ንቅለ ተከላ ድህረ ምረቃ ሥልጠና ላይ ሲሆኑ፣ በቅርቡም ራሳቸውን ችለው ይሠራሉ ተብሎ ይጠበቃል፡፡ በተጨማሪም በኩላሊት የስፔሻሊቲ ሥልጠና የወሰዱ ሦስት ሐኪሞች በቅርቡ የሚመረቁ ሲሆን፣ ሌሎች ሁለት ሐኪሞች ደግሞ በሥልጠና ላይ ናቸው፡፡

ማዕከሉ ላለፉት ሁለት ዓመታት ንቅለ ተከላውን ያካሄደው በሳምንት አንዴ እንደነበር፣ ወደፊት ግን በየዕለቱ ለማካሄድ መታቀዱን ሞሚና (ዶ/ር) ገልጸዋል፡፡

ማዕከሉ በ18 የዲያሊሲስ ማሽኖች አገልግሎት እየሰጠ ሲሆን፣ በቅርቡም ወደ 33  ለማሳደግ ታቅዷል፡፡

የኩላሊት ንቅለ ተከላ ‹‹የአካል ንቅለ ተከላ›› የሚል የሕግ ማዕቀፍ እንዳለው፣ ሕጉ ሰፊ በመሆኑ የተነሳ አሁን ካለው የአቅምና የሰው ኃይል አንፃር ለማጣጣም ሲባል በመመርያ ጠቦ እንደወጣ፣ በመመርያውም መሠረት ኩላሊት መለገስ የሚቻለው በጋብቻ ወይም በደም ዝምድና ያላቸው ብቻ እንደሆኑም ተናግረዋል፡፡

የቅዱስ ጳውሎስ ሆስፒታል ሚሌኒየም ሕክምና ኮሌጅ የሕክምና አገልግሎት ዘርፍ ምክትል ፕሮቮስት ብርሃኔ ረዳኢ (ዶ/ር)፣ ‹‹የኩላሊት ንቅለ ተከላ ሕክምና መጀመሩ ኮሌጁ የሚሰጠውን የሕክምናና የትምህርት አገልግሎት ወደ ላቀ ደረጃ ከፍ ሊያደርገው ይችላል፤›› ብለዋል፡፡

የንቅለ ተከላው ፕሮግራም አስተባባሪው የሚቻጋን ዩኒቨርሲቲ ፕሮፌሰር ጃፈሪ ባች እንዳሉት፣ ማዕከሉ ከደቡብ አፍሪካ በስተቀር ከሰሃራ በታች ከሚገኙ አገሮች ተመሳሳይ ማዕከላት ጋር ሲነጻጸር በጥሩ ሁኔታ ላይ እንደሚገኝ ተናግረዋል፡፡