Skip to main content
x
የጣና በለስ ስኳር የአገዳ ምርት በጊዜው ባለመሰብሰቡ ከ7 ቢሊዮን ብር በላይ እያሳጣ ነው

የጣና በለስ ስኳር የአገዳ ምርት በጊዜው ባለመሰብሰቡ ከ7 ቢሊዮን ብር በላይ እያሳጣ ነው

ጣና በለስ ስኳር ልማት ፕሮጀክት 12,206.6 ሔክታር ላይ ያለ አገዳ አርጅቶብኛል አለ፡፡ አገዳው ያረጀው ወቅቱን ጠብቆ ባለመሰብሰቡ ነው፡፡ አገዳውን ከማሳው ለማስወገድና መሬቱን ለመንከባከብ 1.06 ቢሊዮን ብር ያስፈልጋል ተብሏል፡፡

የበለስ ስኳር ልማት ፕሮጀክት ምርምር ማዕከል ዋና ሥራ አስኪያጅ አቶ ኪዳኔ ተስፋ ሚካኤል እንደሚሉት በማሳው ከተተከለው 13,147 ሔክታር አገዳ መካከል 12,206.6 ሔክታር ላይ ያለ አገዳ አርጅቷል፡፡

የስኳር ይዘቱ 10.5 በመቶ የነበረ ቢሆንም አገዳው በማርጀቱ ሳቢያ የስኳር ይዘቱ እየቀነሰ ይገኛል ብለዋል፡፡ አገዳው ከተተከለ ከ37 እስከ 51 ወራት የሆነ ሲሆን፣ ከአንድ ሔክታር የአገዳ ማሳ 15 ሺሕ ኩንታል ስኳር ይገኛል፡፡ አሁን ባለው የገበያ ዋጋ አንድ ኩንታል ስኳር 1,400 ብር ይሸጣል ተብሎ ቢታሰብ አገዳው በማርጀቱ የሚታጣው ገንዘብ 7.4 ቢሊዮን ብር እንደሚደርስ ከፕሮጀክቱ አስፈጻሚ አባላት መካከል አንዱ አቶ ሔኖክ በለጠ ገልጸዋል፡፡ በአጠቃላይ ፕሮጀክቱ ያለበትን ሁኔታ ሲገልጹ የጨለማ ዘመን ነው ማለት ይቻላል ብለዋል፡፡

በአገሪቱ የሚታየውን የስኳር እጥረት ለመቅረፍ፣ አለፍ ሲልም ወደ ባህር ማዶ ልኮ የውጭ ምንዛሪ እንዲያመጣ ታስቦ ነበር የበለስ የስኳር ፕሮጀክት ከ6 ዓመታት በፊት የተጀመረው፡፡

ፋብሪካዎቹ ቢጠናቀቁና ወደ ሥራ ቢገቡ በዓመት 7,260,000 ኩንታል ስኳር የማምረት አቅም አላቸው፡፡ ለ61,000 ዜጎችም የሥራ እድል እንደሚፈጥሩ ይነገራል፡፡

ጣና በለስ በአማራ ክልል ጃዊ ወረዳና በቤንሻንጉል ክልል አዊ ወረዳ ውስጥ ይገኛል፡፡ 1,300 ነዋሪዎች ለፕሮጀክቱ ሲባል መነሳታቸውንም የወረዳዎቹ ነዋሪዎች ይናገራሉ፡፡