Skip to main content
x
የገቢዎችና ጉምሩክ ባለሥልጣን የቀድሞ መምርያ ኃላፊና ሦስት ሠራተኞች ክስ ተመሠረተባቸው

የገቢዎችና ጉምሩክ ባለሥልጣን የቀድሞ መምርያ ኃላፊና ሦስት ሠራተኞች ክስ ተመሠረተባቸው

በኢትዮጵያ ገቢዎችና ጉምሩክ ባለሥልጣን የቀድሞ የቀረጥ ነፃ ማስፋፊያ መምርያ ኃላፊ፣ የቀረጥ ነፃ ማስፈጸሚያ መምርያ ቡድን መሪ፣ የቀረጥ ነፃ ጉዳዮች ቡድን አስተባባሪና የቀረጥ ነፃ ኦፊሰር የነበሩ ሠራተኞች በከባድ ሁኔታ ሥልጣናቸውን ያላግባብ በመገልገል በድምሩ ከ21.2 ሚሊዮን ብር በላይ በመንግሥት ላይ ጉዳት አድርሰዋል ተብለው የሙስና ወንጀል ክስ ተመሠረተባቸው፡፡

ተከሳሾቹ ከላይ በተገለጸው የሥራ ድርሻ ቅደም ተከተል መሠረት ዓለም ፀሐይ ግርማይ (ዶ/ር)፣ አቶ ወንድወሰን ጀማነህ፣ ምሥራቅ ሥዩምና አቶ ኃይለ ማርያም መዝገቡ ሲሆኑ፣ ተጠርጥረው የተከሰሱበት ጉዳይ ኮማንድ ኢንኮርፖሬሽን ጠቅላላ ኢንዱስትሪ ንግድና ጠቅላላ ኮንስትራከሽን ሥራ ተቋራጭ ኃላፊነቱ የተወሰነ የግል ማኅበር ከራማ ሕንፃ ተቋራጭ፣ ከቻይና ሲአርቢሲ ኢንጂነሪንግ ጠቅላላ ኮንስትራክሽን ሥራ ተቋራጭ ድርጅቶች ጋር የተያያዘ መሆኑን የፌዴራል ጠቅላይ ዓቃቤ ሕግ የመሠረተባቸው ክስ ያስረዳል፡፡

ዓቃቤ ሕግ በክሱ እንደገለጸው ዓለም ፀሐይ (ዶ/ር) እና አቶ ኃይለ ማርያም የወንጀል ሕግ አንቀጽ 32(1ሀ) እና 407 (1ሀ እና 2) ሥር የተደነገገውን ተላልፈዋል፡፡ በተጨማሪም ተሽከርካሪዎች ከቀረጥ ነፃ ሆነው ስለሚገቡበት ሁኔታ በኢንቨስትመንት ቦርድ ተሻሽሎ የወጣውን መመርያ ቁጥር 1/97 አንቀጽ (5 እና 6)፣ መመርያ 2/99 አንቀጽ (5 እና 6)ንም ተላልፈዋል፡፡ ተከሳሾቹ ከላይ የተጠቀሱትን የሕግ ድንጋጌዎች ተላልፈው ንኮማድ የተባለው ድርጅት ከቀረጥ ነፃ መብት መመርያ መሠረት ከቀረጥና ታክስ ነፃ ተሽከርካሪዎችን ማስገባት የማይችል መሆኑ የሚታወቅ ቢሆንም፣ ሁለቱ ተከሳሾች ማስገባት የሚችል መሆኑን ገልጸው ደብዳቤ በማዘጋጀትና ፈርመው በማቅረብ እንዲያስገባ ማድረጋቸውን ዓቃቤ ሕግ የደብዳቤውን ቁጥርና የዲክላራሲዮንና የተሽከርካሪዎችን ብዛት በመጥቀስ ያቀረበው ክስ ይገልጻል፡፡ በመሆነም ንኮማድ ሰባት ፒክአፕና አንድ ኢቬኮ ትራክተር ከታክስና ከቀረጥ ነፃ እንዲያስገባ በማድረግ መንግሥት ማግኘት የነበረበትን 3,141,394 ብር እንዲያጣ ማድረጋቸውን ዓቃቤ ሕግ አስታውቋል፡፡

በተመሳሳይ መንገድ ራማ ኮንስትራክሽን አራት ቶዮታ ሀይሉክስ ተሽከርካሪዎች ከታክስና ቀረጥ ነፃ እንዲያስገባ በማድረግ መንግሥት ማግኘት የነበረበትን 2,623,093 ብር እንዲያጣ ማድረጋቸውን ክሱ ይጠቁማል፡፡ በርከት ያሉ ተሽከርካሪዎችን ከቀረጥና ታክስ ነፃ እንዲያስገባ አድርገውታል ያለው ዓቃቤ ሕግ ደግሞ ሲአርቢሲ ኢንጂነሪንግ የሚባለው የቻይና ጠቅላላ ኮንስትራክሽን ሥራ ተቋራጭን ነው፡፡ ሲአርቢሲ 49 የተለያዩ ዓይነትና መጠን ያላቸውን ተሽከርካሪዎች ከቀረጥና ታክስ ነፃ በማስገባቱ መንግሥት ማግኘት የነበረበትን 5,917,844 ብር እንዲያጣ ማድረጋቸውን ዓቃቤ ሕግ በክሱ በዝርዝር አስፍሯል፡፡ በአጠቃላይ ሁለቱ ተከሳሾች በድምሩ መንግሥት 18,364,141 ብር ገቢ እንዲያጣ ማድረጋቸውን ዓቃቤ ሕግ በክሱ ገልጿል፡፡

አቶ ወንድወሰን ጀማነህ የተባሉ ተከሳሽም ላይ ሁለቱ ተከሳሾች ፈጽመውታል የተባለውን ዘዴ በመጠቀም ሲአርቢሲ ኢንጂነሪንግ 21 ተሽከርካሪዎችን ከታክስና ቀረጥ ነፃ እንዲያስገባ በማድረግ፣ መንግሥት ማግኝት የነበረበትን 3,994,251 ብር እንዲያጣ ማድረጋቸውን ዓቃቤ ሕግ በክሱ አስረድቷል፡፡

ምሥራቅ ሥዩም የተባሉት ተከሳሽም ንኮማድ የተባለው ድርጅት 28 የተለያዩ ተሽከርካሪዎችን ከታክስና ቀረጥ ነፃ እንዲያስገቡ በማድረግ መንግሥት ማግኘት የነበረበትን 4,575,220 ብር እንዲያጣ ማድረጋቸው በክሱ ተገልጿል፡፡ በአጠቃላይ አራቱም ተከሳሾች በከባድ ሁኔታ ሥልጣናቸውን ያላግባብ በመገልገልና ተገቢ ያልሆነ ድርጊት በመፈጸም መንግሥት ማግኘት የነበረበትን 21,269,631 ብር እንዲያጣ በማድረጋቸው የሙስና ወንጀል ክስ እንደ መሠረተባቸው የዓቃቤ ሕግ ክስ ያስረዳል፡፡