Skip to main content
x
ለ400 ሺሕ ቶን ስንዴ ግዢ 3.2 ቢሊዮን ብር የመጫረቻ ዋጋ ቀረበ

ለ400 ሺሕ ቶን ስንዴ ግዢ 3.2 ቢሊዮን ብር የመጫረቻ ዋጋ ቀረበ

መንግሥት 400 ሺሕ ቶን ስንዴ ለመግዛት ባወጣው ጨረታ ኢንትሬድ የተባለ የእንግሊዝ ኩባንያ ለአንድ ቶን ስንዴ 296 ዶላር ዝቅተኛ ዋጋ ሰጠ፡፡

ማክሰኞ ጥቅምት 14 ቀን 2010 ዓ.ም. ረፋድ ላይ በተከፈተው ጨረታ ስድስት የዓለም አቀፍ የስንዴ አቅራቢዎች የተሳተፉ ሲሆን፣ ከእነዚህ ውስጥ ኢንትሬድ ያቀረበው አነስተኛ የመሸጫ ዋጋ የአጠቃላይ ስንዴውን መግዣ ዋጋ 3.19 ቢሊዮን ብር አድርሶታል፡፡

በዚህ በሦስት የተለያዩ ሎቶች ተከፋፍሎ ለወጣው ዓለም አቀፍ ጨረታ 43 አቅራቢዎች የመጫረቻ ሰነድ ገዝተው የነበሩ ቢሆንም፣ ስድስቱ ብቻ ሰነዳቸውን ማስገባታቸውን ለማወቅ ተችሏል፡፡

በሦስት ሎቶች ማለትም ሎት አንድ 200 ሺሕ ቶን፣ ሎት ሁለት 100 ሺሕ ቶን፣ እንዲሁም ሎት ሦስት 100 ሺሕ ቶን እንዲይዙ ተደርገው በወጣው በዚህ ጨረታ ተጫራቹ የመሸጫ ዋጋቸውን አቅርበዋል፡፡

በዚህ መሠረት ኢንትሬድ ለሦስቱም ሎቶች ከ296 ዶላር እስከ 312 ዶላር ዋጋዎችን ለአንድ ቶን ስንዴ ሰጥቷል፡፡ ከእነዚህ ውስጥ ዝቅተኛ የተባሉት ዋጋዎች 296 ዶላር፣ 297 ዶላርና 298 ዶላር ናቸው፡፡

ሌላው በዚህ ጨረታ የተሳተፈው ፕሮሚሲንግ ኢንተርናሽናል የተባለ ኩባንያ በበኩሉ፣ 297.30 ዶላርና 298.05 ዶላር ዝቅተኛ ዋጋዎችን ለአንድ ቶን ስንዴ መሸጫ አቅርቧል፡፡

በዚህ ጨረታ ላይ የተሳተፉት ፊኔክስ ኮምዲቲና ቦንጅ የተባሉ ሁለት ተጫራቾች ያቀረቡት የመሸጫ ዋጋ ላይ የመገባበያ ገንዘቡን ዓይነት አለመግለጻቸውን፣ በጨረታ መክፈቻ ወቅት ለተጫራቾች ተገልጿል፡፡

‹‹ሁለቱም ኩባንያዎች የመገባበያ ገንዘቡን ዓይነት የመጫረቻ ሰነዶች ላይ አልገለጹም፡፡ እኛም በመመዝገባችን በቀጣይ ውሳኔ እንሰጥበታለን፤›› ሲሉ ግዥውን እየፈጸመ ያለው የመንግሥት ግዥና ንብረት ማስወገድ አገልግሎት የግዥ ሥራ ሒደት ባለቤት አቶ ሰለሞን በትረ ተናግረዋል፡፡  

የግዥ አገር ውስጥ የሚገባው 400 ሺሕ ቶን ስንዴ በአሁኑ ወቅት በአገሪቱ ባለው ድርቅ ምክንያት ተረጂ ከሆኑት 8.5 ሚሊዮን ሰዎች ውስጥ 5.4 ሚሊዮን ለሚሆኑት የዕለት ደራሽ ዕርዳታ ይውላል ተብሏል፡፡

ግዥው ከተፈጸመ በኋላ ስንዴው ናዝሬት፣ ኮምቦልቻ፣ ደሴ፣ መቀሌና ድሬዳዋ ለሚገኙ የእህል መጋዘኖች ይከፋፈላል፡፡ አሸናፊው ኩባንያ ስንዴዎቹን በራሱ የትራንስፖርት አገልገሎት ማለትም በመርከብ ወደ ጂቡቲ ወደብ ያደርሳል፡፡

‹‹የጨረታ ውጤቱን በቅርቡ ገምግመን እናሳውቃለን፤›› ሲሉ አቶ ሰለሞን ተናግረዋል፡፡