Skip to main content
x
መንግሥት በአሠሪና ሠራተኛ ረቂቅ አዋጁ ላይ ከኢሠማኮ ጋር ሊወያይ ነው

መንግሥት በአሠሪና ሠራተኛ ረቂቅ አዋጁ ላይ ከኢሠማኮ ጋር ሊወያይ ነው

የኢትዮጵያ ሠራተኛ ማኅበራት ኮንፌዴሬሽን (ኢሠማኮ) በአሠሪና ሠራተኛ ረቂቅ አዋጅ ላይ ባለው ተቃውሞ መንግሥት የማያወያየው ከሆነ እስከ ሥራ ማቆም የደረሰ ዕርምጃ እንደሚወሰድ ካሳወቀ በኋላ፣ መንግሥት ከኢሠማኮ አመራሮች ጋር ለመነጋገር የውይይት መድረክ እንዲዘጋጅ መወሰኑ ተገለጸ፡፡

አዲሱ ረቂቅ አዋጅ የሠራተኞችን መብት የሚነካና የኢንዱስትሪ ሰላምን የሚያናጋ በመሆኑ መጽደቅ እንደሌለበት፣ ባለፈው ሳምንት ኢሠማኮ የአቋም መግለጫ አውጥቶ ነበር፡፡ የኢሠማኮ ጠቅላይ ምክር ቤት ረቂቅ አዋጁን በተመለከተ የደረሰበትን ድምዳሜ ለጠቅላይ ሚኒስትር ኃይለ ማርያም ደሳለኝና ለሌሎች የመንግሥት ባለሥልጣናት በድጋሚ በማሳወቁ፣ የጠቅላይ ሚኒስትር ጽሕፈት ቤት ከኢሠማኮ ጋር ለመነጋገር መግባባት ላይ መድረሱን ሪፖርተር ያገኘው መረጃ ያስረዳል፡፡

የውይይት መድረኩ በሚቀጥለው ሳምንት በአንዱ ቀን እንዲካሄድ በቃል የተገለጸላቸው መሆኑን ሪፖርተር ያነጋገራቸው የኢሠማኮ የሥራ ኃላፊዎች ገልጸው፣ ጠቅላይ ሚኒስትር ኃይለ ማርያም ደሳለኝ የኢሠማኮ ፕሬዚዳንት አቶ ካሳሁን ፎሎን በስልክ ማነጋገራቸውን አረጋግጠዋል፡፡