Skip to main content
x

ሕወሓት አዳዲስ ሊቃነ መናብርት መረጠ

የሕዝባዊ ወያነ ሓርነት ትግራይ (ሕወሓት) ማዕከላዊ ኮሚቴ ሲያካሂድ የነበረውን ስብሰባ አዳዲስ ሊቀመንበርና ምክትል ሊቀመንበር በመምረጥ አጠናቀቀ፡፡
በዚህም መሠረት የመገናኛ፣ ኮሙዩኒኬሽና ኢንፎርሜሽን ሚኒስትሩ ደብረጽዮን ገብረሚካኤልን (ዶ/ር) ሊቀመንበርና ወ/ሮ ፈትለወርቅ ገብረእግዚአብሔርን ምክትል ሊቀመንበር አድርጎ መረጠ፡፡ 

ሕወሓት በስብሰባው አቶ ጌታቸው አሰፋን፣ አቶ ዓለም ገብረዋህድን፣ አዲስ ዓለም ባሌማን (ዶ/ር)፣ አቶ አስመላሽ ወልደሥላሴን፣ አቶ ጌታቸው ረዳን፣ ወ/ሮ ኬሪያ ኢብራሂምና የገንዘብና ኢኮኖሚ ትብብር ሚኒስትር አብራሐም ተከስተን (ዶ/ር) ለሥራ አስፈጻሚ ኮሚቴ አባልነት መርጧቸዋል፡፡

ማዕከላዊ ኮሚቴው ከትናንት ወዲያ ባስተላለፈው ውሳኔ የቀድሞ ቀዳማዊት እመቤት ወ/ሮ አዜብ መስፍንን ከማዕከላዊ ኮሚቴ ሲያግድ፣ የቀድሞው የሥራ አስፈጻሚው ኮሚቴ ሰብሳቢና የትግራይ ክልል ፕሬዚዳንት አቶ ዓባይ ወልዱንና የኤፈርት ምክትል ሥራ አስፈጻሚ የነበሩትን አቶ በየነ ምክሩን ከሥራ አስፈጻሚ ኮሚቴ ወደ ማዕከላዊ ኮሚቴ ዝቅ ብለው እንዲሠሩ መወሰኑ የሚታወስ ነው፡፡

ከዚህ ግምገማ ቀጥሎ የሚጠበቀው የሕወሓት ድርጅታዊ ጉባዔ ሲሆን፣ ከሥራ አስፈጻሚው የታገዱት የወ/ሮ አዜብ የመጨረሻ ዕጣ ፈንታ ይወስናል ተብሎ ይጠበቃል፡፡