Skip to main content
x
[ክቡር ሚኒስትሩ ከቀድሞ ጓደኛቸው ጋር ተገናኝተው እያወሩ ነው]

[ክቡር ሚኒስትሩ ከቀድሞ ጓደኛቸው ጋር ተገናኝተው እያወሩ ነው]

  • አንተ ሰውዬ አለህ እንዴ?
  • አለሁ ክቡር ሚኒስትር፡፡
  • ምንድነው ዓይቼህ አላውቅም?
  • ያው ሥራ ስለሚበዛብኝ ነው፡፡
  • ድሮም የአስተማሪ ነገር ይኼ ነው ትርፉ፡፡
  • የአስተማሪ ነገሩን እንኳን ተውት፡፡
  • ምንድነው እንደዚህ ያጠፋህ?
  • እርስዎም ሚኒስትር ሲሆኑ ተራራቅን፡፡
  • ከእኔ በላይ የጠፋኸው ግን አንተ ነህ፡፡
  • አዲስ ዘርፍ ውስጥ ገብቼ ነዋ፡፡
  • ማስተማሩን ተውኩት እንዳትለኝ?
  • እሱን ካቆምኩ ቆየሁ ክቡር ሚኒስትር፡፡
  • ምን ተገኘ?
  • ነጋዴ ሆኛለሁ ክቡር ሚኒስትር፡፡
  • ነጋዴ ሆነህ ሸቀጥ ማስመጣት ጀመርክ?
  • የሸቀጥ ንግድ ሳይሆን በሙያዬ የማማከር ሥራ ጀምሬያለሁ፡፡
  • እሱን ቢዝነስ ነው እስካሁን ያልደፈርኩት፡፡
  • ያው ዝም ብሎ የሚሠራ ቢዝነስ አይደለም፡፡
  • እንዴት ማለት?
  • ዕውቀት ይፈልጋል ሥራው፡፡
  • አንተ ዕውቀቱ የለህም እያልከኝ ነው?
  • እርስዎማ ይመከራሉ እንጂ አያማክሩም፡፡
  • አንተ አሁንም ቀልደኛ ነህ ማለት ነው፡፡
  • ወድጄ አይደለም ቀልደኛ የሆንኩት፡፡
  • እንዴት ነው የማማከር ሥራው ግን?
  • ትንሽ ከባድ ነው ክቡር ሚኒስትር፡፡
  • ለምን ይከብዳል?
  • የእኛ ሥራ በእናንተ ፖሊሲ ላይ መሠረት ያደረገ ነዋ፡፡
  • ታዲያ የእኛ ፖሊሲ ምን ይወጣለታል?
  • እኔ በዋናነት የምሠራው ከውጭ ኩባንያዎች ጋር ነው፡፡
  • ታዲያ አገራችን እኮ ለውጭ ኢንቨስተሮች ምቹ ናት፡፡
  • ክቡር ሚኒስትር ኩባንያዎች የሚቀጥሩዋቸውን ሰዎች ለማግኘት በጣም ይቸገራሉ፡፡
  • ምን እያልክ ነው ሰውዬ?
  • ምነው ክቡር ሚኒስትር?
  • ስንትና ስንት ሥራ አጥ ባለበት አገር የሚቀጠር ሰው ጠፋ ስትል አታፍርም?
  • እንደ እሱ አይደለም ክቡር ሚኒስትር፡፡
  • ስማ አገሪቱ እኮ ከ100 ሚሊዮን በላይ ሕዝብ እንዳላት ረሳኸው?
  • እሱንማ አውቃለሁ፡፡
  • በዚያ ላይ ከሁለት ሦስተኛ በላይ ወጣት የተሰበሰበባት አገር ነች፡፡
  • እነሱ ለመቅጠር የሚፈልጉት መሥፈርት ወጣት መሆን ብቻ አይደለም፡፡
  • ምን እያልክ ነው?
  • ኩባንያዎቹ የሚፈልጉት የተማረ የሰው ኃይል ነው፡፡
  • ሥራ አጡ ሁላ የተማረ አይደል እንዴ?
  • እ. . .
  • ያውም ዩኒቨርሲቲ ድረስ ያስተማርነው ሥራ አጥ እኮ ነው ያለን፡፡
  • ክቡር ሚኒስትር ተማረ የሚባለው ወጣት እኮ በጣም ያሳፍራል፡፡
  • እንዴት?
  • እኔም ዩኒቨርሲቲ ማስተማር ያቆምኩት በዚህ ምክንያት ነው፡፡
  • የምትለው አልገባኝም?
  • የዩኒቨርሲቲ ተማሪዎች ዕውቀታቸው እኮ አሳፋሪ ነው፡፡
  • ስማ በዓለም አቀፍ ደረጃ ሳይቀር የተመሰገንበትን የትምህርት ስኬት ስታጣጥለው አታፍርም?
  • ክቡር ሚኒስትር በየመንደሩ የተቋቋሙት ዩኒቨርሲቲዎች የሚያወጡት ትውልድ የተማረ የሰው ኃይል ነው ማለት ይከብዳል፡፡
  • ታዲያ ምን ይባል?
  • የተማረረ የሰው ኃይል!

[ክቡር ሚኒስትሩ ለአንድ ደላላ ወዳጃቸው ይደውላሉ]

  • አንተ ሰውዬ ትንሽ አልጠገብክም?
  • ምን አደረኩ ክቡር ሚኒስትር?
  • ብደውል ብደውል አታነሳም፡፡
  • ስብሰባ ውስጥ ሆኜ ነው ክቡር ሚኒስትር፡፡
  • የትኛው ስብሰባ?
  • መቼም የኢሕአዴግ ሥራ አስፈጻሚ ወይም ምክር ቤት ስብሰባ አልልዎትም፡፡
  • እሱን ስብሰባም ለመካፈል አስበሃል?
  • ኧረ ከውጭ ከመጡ ኢንቨስተሮች ጋር ስብሰባ ይዤ ነው፡፡
  • እኔም የደወልኩልህ ስለኢንቨስትመንት ላወራህ ፈልጌ ነው፡፡
  • ምን ዓይነት ኢንቨስትመንት ክቡር ሚኒስትር?
  • ሰሞኑን ከተዋማ እንዴት በዋጋ ንረት እየታመሰች መሆኑን መቼም ሰምተሃል?
  • የምን የዋጋ ንረት?
  • ይኸው የብረት ዋጋ በእጥፍ ጨምሯል፡፡
  • እሱን እንኳን ሰምቻለሁ፡፡
  • የሲሚንቶንም ነገር እየተከታተልከው ነው፡፡
  • የኮንስትራክሽን ዘርፉ ሊቃወስ ይችላል፡፡
  • ስማ ቢዝነሱ ውስጥ እንደዚህ ዓይነት ቀውስ ሲመጣ ለእኛ ይመቻል አላልኩህም?
  • እንዴት ክቡር ሚኒስትር?
  • ለሕዝቡ አማራጭ ሐሳቦችን ይዘን መቅረብ እንችላለን፡፡
  • ምን ዓይነት አማራጭ?
  • ለምሳሌ የብረት ዋጋ አይነኬ እየሆነ ነው፡፡
  • ታዲያ ምን ማድረግ እንችላለን?
  • አየህ አሁን በአንድ ለአምስት ማደራጀት እንችላለን፡፡
  • ማንን?
  • ቆራሌዎችን፡፡
  • ምን?
  • ቆራሌዎችን አደራጅተን ውድቅዳቂ ብረቶችን ማሰባሰብ እንችላለን፡፡
  • ከዚያስ ክቡር ሚኒስትር?
  • ከዚያማ ይኼንን ውድቅዳቂ ብረት አቅልጠን ለብረት እጥረቱ ጥሩ መፍትሔ ማምጣት እንችላለን፡፡
  • ክቡር ሚኒስትር እኔ እኮ ሁሌም አደንቅዎታለሁ፡፡
  • ሁሌም በችግር ውስጥ የሚፈጠረውን አጋጣሚ ነው ማየት ያለብህ፡፡
  • እኔ ግን የሚገርመኝ አንድ ነገር ብቻ ነው፡፡
  • ምንድነው የሚገርምህ?
  • እንደ እርስዎ ዓይነት አባ መላ ኢሕአዴግ ውስጥ እያለ እንዲህ መተራመሱ ይገርመኛል፡፡
  • አይሰሙማ፡፡
  • እ. . .
  • ሁሌም የምነግራቸውን ነገር አይሰሙም፡፡
  • ለዚህች አገር ችግር እኮ እንደ እርስዎ ዓይነት አባ መላ ነው የሚያስፈልገው፡፡
  • ብዬ ነበር ሰሚ አጥቼ ነው፡፡
  • እርስዎን ጠቅላይ ሚኒስትር ቢያደርጉዎት እኮ ሁሉም ጥያቄ መፍትሔ ያገኝ ነበር፡፡
  • እኔም አድርጉኝ ብዬ ነበር፡፡
  • እርስዎማ ቢሆኑ እኛም እንከብር ነበር፡፡
  • ምን ታደርገዋለህ?
  • ለእኛ ግን ሁሌም ጠቅላይ ሚኒስትራችን እርስዎ ነዎት፡፡
  • እናንተ እነማን ናችሁ?
  • ልማታዊ ደላሎች!

[ክቡር ሚኒስትሩ ቢሮ አንድ ብሎገር ይመጣል]

  • ክቡር ሚኒስትር እርስዎን ለማግኘት እኮ በጣም ተቸገርኩ፡፡
  • ለመሆኑ ለምን ፈልገኸኝ ነው?
  • ያው በወቅታዊ የአገሪቷ ሁኔታ ላይ ለማውራት ነዋ፡፡
  • ስለአገሪቱ ወቅታዊ ሁኔታ ስትል አልገባኝም?
  • ክቡር ሚኒስትር እኔ እኮ ቀንደኛ ደጋፊ ነኝ፡፡
  • የማን?
  • የሥርዓቱ ነዋ፡፡
  • ታዲያ ምን ይጠበስ?
  • እንዴ ክቡር ሚኒስትር አገሪቷ በቀጣይ ስለምትጓዝበት መንገድ እንድናወራ ብዬ ነው?
  • አገሪቷ የምትጓዝበትን መንገድ ቀያሽ ማን አደረገህ?
  • እኔን አያውቁኝም እንዴ ክቡር ሚኒስትር?
  • በሚገባ ነው ጠንቅቄ የማውቅህ፡፡
  • ይኸው ክቡር ብሎገር ለመባል ትንሽ የቀረኝ ሰው ነኝ፡፡
  • በነገራችን ላይ ሁላችሁም ያው ናችሁ፡፡
  • እንዴት ማለት ክቡር ሚኒስትር?
  • ጭፍኖችና ጽንፈኞች፡፡
  • አልገባኝም ክቡር ሚኒስትር?
  • ደጋፊዎቹም ሆናችሁ ተቃዋሚዎቹ ሁላችሁም ጭፍኖችና ጽንፈኞች ናችሁ፡፡
  • እሱማ እኔም በጭፍን ነው የምደግፋችሁ፡፡
  • አየህ ችግሩ እሱ ነው፡፡
  • ምን እያሉ ነው ክቡር ሚኒስትር?
  • በሬ ወለደ የሆነ ወሬ እያወራችሁ መንግሥት እንዲጠላ የምታደርጉት እናንተ ናችሁ፡፡
  • እ. . .
  • ደግሞ ሁላችሁም ተንታኝ ነን ባዮች፣ አዋቂ ነን ባዮች፣ ኤክስፐርት ነን ባዮች ናችሁ፡፡
  • ምን ነካዎት ክቡር ሚኒስትር?
  • ይኸው እንደ አንተ ዓይነቱ ደጋፊም ሆነ ተቃዋሚ ሕዝቡን በመከፋፈል ጥላቻ እየዘራችሁበት ነው፡፡
  • አላበዙትም ክቡር ሚኒስትር?
  • ሁላችሁም የምትጽፉት ውሸትና በሬ ወለደ መሆኑ ደግሞ ያሳዝናል፡፡
  • ኧረ እኔ ውሸት ጽፌ አላውቅም፡፡
  • ስማ እኔ ራሱ ስለነበርኩባቸው በርካታ ስብሰባዎች የጻፍካቸው ምንም እውነት የላቸውም፡፡
  • እ. . .
  • የሚገርመው ግን ተቃዋሚዎቹም ልክ እንደ እናንተ ከአንድ ወንዝ ነው የተቀዱት፡፡
  • አልገባኝም?
  • ሁላችሁም ቀዳዳዎች ናችሁ፡፡
  • እንግዲህ እንከባበር ክቡር ሚኒስትር?
  • አንተ ክብር አይገባህም፡፡
  • እንግዲያው ከሰሞኑ ይጠብቁኝ፡፡
  • ምን ልታደርግ?
  • አብዮት ነው የማስነሳብዎት፡፡
  • የምን አብዮት?
  • የፌስቡክ አብዮት፡፡
  • እኔን ደግሞ ተረቱን አስታወስከኝ፡፡
  • የትኛውን?
  • ብሎገር ቢንጫጫ. . .
  • እ. . .
  • በአንድ ሙቀጫ!

[ክቡር ሚኒስትሩ ለጠቅላይ ሚኒስትርነት ከታጩ ባለሥልጣን ጋር እያወሩ ነው]

  • ክቡር ሚኒስትር እንዴት ነዎት?
  • በእርግጠኝነት አንተን ማስመረጥ እችላለሁ፡፡
  • እንዴት አድርገው?
  • የአራቱም ፓርቲዎች ቁልፍ ሰዎች በእጄ ናቸው፡፡
  • ጥሩ ነው ክቡር ሚኒስትር፡፡
  • ስለዚህ አይደለም በአገር አቀፍ ደረጃ በዓለም አቀፍ ደረጃ ተቀባይነት እንዲኖርህ ማስደረግ እችላለሁ፡፡
  • ሁሌም እኮ ያስገርሙኛል ክቡር ሚኒስትር፡፡
  • እኔ በሁሉም ነገር ስኬታማ መሆኔን ታውቃለህ አይደል?
  • በሁሉም ነገር ሲሉ?
  • ይኸው በቢዝነሱም ከዜሮ ተነስቼ አንቱ የተባልኩ ሀብታም ሆኛለሁ፡፡
  • እሱን እንኳን አውቃለሁ፡፡
  • ስለዚህ በእርግጠኛነት አስመርጥሃለሁ፣ እኔም ከአንተ የምፈልገው ነገር አለኝ፡፡
  • ከእኔ ምንድነው የሚፈልጉት?
  • ወሳኝ የሆነ የሚኒስቴር መሥሪያ ቤት ትሰጠኛለህ፡፡
  • ክቡር ሚኒስትር እኔን እኮ የሚያስመርጠኝ ብቃቴ ነው፡፡
  • ከብቃትህ በላይ እኔ አስፈልግሃለሁ፡፡
  • እንደተረዳሁት በሚቀጥለው ካቢኔ በጣም መግባት የፈለጉ ይመስለኛል፡፡
  • መግባቴማ የማይቀርና ግዴታ ነው፡፡
  • ስለዚህ አንድ የሚኒስቴር መሥሪያ ቤት ያስተዳድራሉ፡፡
  • የምን ሚኒስትር ነው የምሆነው?
  • የሽንኩርትና የድንች ሚኒስትር!