Skip to main content
x
ለክቡር ሚኒስትሩ ዳያስፖራ ወዳጃቸው ይደውልላቸዋል

ለክቡር ሚኒስትሩ ዳያስፖራ ወዳጃቸው ይደውልላቸዋል

[ክቡር ሚኒስትሩ አማካሪያቸውን ቢሮ አስጠሩት]

  • ፈለጉኝ ክቡር ሚኒስትር?
  • እንደምታውቀው በርካታ ሥራዎችን እንደምንሠራ ይታወቃል፡፡
  • ትክክል ነው ክቡር ሚኒስትር፡፡
  • የሕዝቡን ጥያቄ ለመመለስም ደፋ ቀና እያልን ነው፡፡
  • እሱማ አውቃለሁ፡፡
  • አየህ ሕዝቡ ጥያቄ የሚያነሳው ሥራ እየሠራን ባለመሆናችን አይደለም፡፡
  • ታዲያ ለምንድነው?
  • የምንሠራውን ሥራ ሕዝቡ ስለማያውቀው ነዋ፡፡
  • ምን ይሻላል ታዲያ?
  • አንተ አማካሪዬ አይደለህ እንዴ?
  • ምነው ክቡር ሚኒስትር?
  • በዚህ ጉዳይ ላይ እንድታማክረኝ መስሎኝ የጠራሁህ?
  • ለምን ብሮሸር አናሳትምም ታዲያ?
  • አቤት እሱማ ቢሆን እኔም እጠቀም ነበር፡፡
  • እንዴት ክቡር ሚኒስትር?
  • ሰሞኑን ማተሚያ ቤቴ አፉን ከፍቶ ነው የሚውለው፡፡
  • ስለዚህ እዛ እናሳትመዋ?
  • ለእንደዚህ ዓይነቱ ወጪ በጀት እንደሌለን አታውቅም?
  • እንደዛ ከሆነ ሌላ ሐሳብ አለኝ፡፡
  • ምንድነው እሱ?
  • ለምን ዶክመንተሪ ፊልም አንሠራም?
  • ሰውዬ ጤነኛ አይደለህም እንዴ?
  • ምነው ክቡር ሚኒስትር?
  • ለእንደዚህ ዓይነት ነገር በጀት የለንም፡፡
  • ምን ተሻለ ታዲያ ክቡር ሚኒስትር?
  • አንተን ብሎ አማካሪ?
  • ግራ ገብቶኝ ነዋ ክቡር ሚኒስትር፡፡
  • እኔ እንዲያውም ሐሳብ መጥቶልኛል፡፡
  • የምን ሐሳብ?
  • ጋዜጣዊ መግለጫ እሰጣለሁ፡፡
  • ጥሩ ሐሳብ ነው፣ አሁኑኑ እጠራቸዋለሁ፡፡
  • ቆይ ቆይ ቆይ፣ የትኞቹን ሚዲያዎች ልትጠራ ነው?
  • ሁሉንም ሚዲያ ነዋ፡፡
  • የምትጠራቸው ሚዲያዎች የሕዝብ የሆኑትንና የእኛ የልማት አጋሮችን ብቻ ነው፡፡
  • የግሎቹስ?
  • እንዳይጠሩ፡፡
  • ለምን ክቡር ሚኒስትር?
  • ቦታ ስለሌለን ነዋ፡፡
  • ለማን?
  • ለኪራይ ሰብሳቢዎች!

[ክቡር ሚኒስትሩ ጋዜጣዊ መግለጫ ሊሰጡ ሲሉ ከግል ሚዲያ የመጣ ጋዜጠኛ ያያሉ]

  • አንተ ምን ልታደርግ መጣህ?
  • ልዘግብ ነዋ ክቡር ሚኒስትር?
  • አልተጠራህም እኮ?
  • ከልጅ ልጅ ቢለዩ ሲባል አልሰሙም እንዴ?
  • ስማ የአንተን ተረት ለመስማት ጊዜ የለኝም፡፡
  • ስለዚህ በቀጥታ ወደ መግለጫው ይግቡዋ?
  • አሁን የምሰጠው መግለጫ እኮ ስለወቅታዊ የአገሪቱ ሁኔታ ነው፡፡
  • እኔም መግለጫውን ለሕዝብ ለማስተላለፍ ነው እዚህ የተገኘሁት፡፡
  • እንዲያውም አዳራሹን ለቀህ ውጣ፡፡
  • ለምን ሲባል?
  • አንተ ካልወጣህ መግለጫውን አልሰጥም፡፡
  • እንግዲያውስ እኔም አልወጣም፡፡
  • ካልወጣህማ እኔማ ሰርዤዋለሁ፡፡
  • ምኑን?
  • ጋዜጣዊ መግለጫውን!

[ለክቡር ሚኒስትሩ ደላላ ወዳጃቸው ደወለላቸው]

  • ኧረ በጣም ጠፉብኝ ክቡር ሚኒስትር፡፡
  • ሰሞኑን ያለሁበትን ስብሰባ ታውቀው የለ እንዴ?
  • እኔስ ያስጨነቀኝ የስብሰባው ውጤት አይደል እንዴ?
  • ምኑ ነው የሚያስጨንቅህ?
  • የእኛ ዕጣ ፈንታ ምንድነው የሚሆነው?
  • የእኛ ስትል?
  • የእኔና የእርስዎ ነዋ፡፡
  • እኔ ምን እንዳልሆን?
  • ስንትና ስንት ወንጀል አይደል እንዴ የሠራነው?
  • ስማ አንተ ወንጀለኛ ልትሆን ትችላለህ፡፡
  • እርስዎስ?
  • እኔማ አገሬን ለማልማት ደፋ ቀና የምል ታታሪ ዜጋ ነኝ፡፡
  • ምን?
  • ያን ሁሉ መሬት የቸረቸሩት ለአገር ልማት ነው?
  • ሰውዬ አሁን ራስህን ችለህ ቁም፡፡
  • ያኔ መሬት ስንቸበችብ ምነው እንዲህ አላሉ?
  • አሁን ለምንድነው እንደዚህ የፈራኸው?
  • አዲሱ ጠቅላይ ሚኒስትር ሲመጣ ማኖ እንዳያስነካን ነዋ፡፡
  • እንግዲህ ለራስህ አስብ፡፡
  • እርስዎንም እኮ ይመለከታል፡፡
  • ሰውዬ እኔ ላይ ምንም አይመጣም፡፡
  • ለምን አይመጣም?
  • ግፋ ቢል ሒስና ግለሒስ ባደርግ ነው፡፡
  • እኔን አሳልፈው ሊሰጡኝ?
  • እሱን ሲደርስ እናየዋለን፡፡
  • እየቀለዱ መሆን አለበት፡፡
  • እኔ ቀልድ እንደማልወድ ታውቃለህ?
  • ስለዚህ ምን እናድርግ ክቡር ሚኒስትር?
  • እኔማ ነገርኩህ የራሴን ስትራቴጂ ተግባራዊ አደርጋለሁ፡፡
  • የምን ስትራቴጂ?
  • ቆዳዬን መቀያየር ነዋ፡፡
  • እኔንስ ለማን ሊተውኝ ነው?
  • አንተንማ ሥራህ ነው የሚያወጣህ?
  • ለነገሩ እርስዎ ለዚህ የበቁት ቆዳዎትን እየቀያየሩ መሆኑን አውቃለሁ፡፡
  • የቅፅል ስሜን ረሳኸው እንዴ?
  • ማን ነበር?
  • እስስቱ!

[ለክቡር ሚኒስትሩ ዳያስፖራ ወዳጃቸው ይደውልላቸዋል]

  • ጤና ይስጥልኝ ክቡር ሚኒስትር?
  • እንዴት ነህ ወዳጄ?
  • ኧረ ክቡር ሚኒስትር ምንድነው?
  • ምን ሆንክ ደግሞ?
  • ይኸው እዚህ በጥፍራችን ቆመን እኮ ነው የምንጠብቀው?
  • ምኑን ነው የምትጠብቁት?
  • የስብሰባውን ውጤት ነዋ፡፡
  • ምነው ቸኮልክ?
  • ሁላችንንም ቁርጠት ይዞናል፡፡
  • የምን ቁርጠት ነው?
  • እንዲያውም አገር ቤት የቁርጠት መድኃኒት ጠፍቷል እየተባለ ነው፡፡
  • ቀልደኛ ነህ በእናትህ፡፡
  • ሆዳችንን አጮሃችሁት እኮ?
  • ለምን ይጮሃል?
  • እኛም ጠቅላይ ሚኒስትሩ መልቀቂያቸውን ካስገቡ እኮ አርባ ቀን ሞላቸው፡፡
  • ይኸው የጠቅላይ ሚኒስትሩን መልቀቂያ በአርባኛው ቀን ተቀበልናቸው፡፡
  • መቼም በባህላችን አርባኛ ቀን በጣም እንደሚከበር ያውቃሉ?
  • አልገባኝም?
  • ያው በሐዘንም ሆነ በደስታ አርባኛው ቀን ይከበራል፡፡
  • እንዴት እንዴት ማለት?
  • ለሐዘን የአርባ ቀን መታሰቢያ ሲኖር፣ ለደስታ ደግሞ ክርስትና በአርባ ቀን ነው የሚነሳው፡፡
  • ታዲያ ለእኛ የሐዘን ነው የደስታ?
  • ፍቺውን እንግዲህ ለእርስዎ ትቸዋለሁ፡፡
  • ለማንኛውም ነገረኛ ሆነሃል፡፡
  • ሰሞኑን በጣም ያዝናናኝን ነገር ግን ላጫውትዎት፡፡
  • ምንድነው እሱ?
  • ሰሞኑን በፌስቡካችሁ የለቀቃችሁት ፎቶ ነዋ፡፡
  • የምን ፎቶ?
  • አንቨርሰሪ ስታከብሩ የለቀቃችሁት ፎቶ ነዋ፡፡
  • ምን ሆነ ደግሞ?
  • አለቆቻችሁ ኬክ እየቆረሱ የተነሱትን ነዋ፡፡
  • ለምን ዳቦ አልሆነም ነው ጥያቄህ?
  • እናንተም ውስጥ ኒዮ ሊብራሎች ገብተዋል ማለት ነው?
  • መቼ ይጠፋሉ ብለህ ነው?
  • ለማንኛውም ቤቢ ሻወራችሁን እያከበራችሁ ነው የሚመስለው፡፡
  • ምንድነው እሱ ደግሞ?
  • ያው ሴቶች ከመውለዳቸው በፊት ስጦታ የሚሰጥበት ባህል ነው፡፡
  • ልጁ ሳይወለድ እንዴት ስጦታ ይሰጣል?
  • ያው የፈረንጆች ባህል ነው፡፡
  • በእኛ ባህል ግን ከተወለደ በኋላ ነው ስጦታ የሚሰጠው፡፡
  • እሱንማ አውቃለሁ፡፡
  • እኛም ኬክ የቆረስነው ለቤቢ ሻወር አይደለም፡፡
  • ታዲያ ለምንድነው?
  • ለአራስ ጥሪ!

[ክቡር ሚኒስትሩ ለሌላ ሚኒስትር ይደውላሉ]

  • ሰላም ክቡር ሚኒስትር፡፡
  • አገር እየመራን ነው ወይስ ቀልድ ነው የተያዘው?
  • ምን ሆኑ ክቡር ሚኒስትር?
  • ምንድነው እየተሠራ ያለው?
  • ሥራ ነዋ ክቡር ሚኒስትር፡፡
  • እኔ ግን አልመሰለኝም፡፡
  • ምን እያሉ ነው ክቡር ሚኒስትር?
  • እንዴት ነው ወሳኝ መረጃን እየተደባበቅን ሥራ እየሠራን ነው የምንለው?
  • የምን መረጃ ነው?
  • አገሪቱ ላይ እንዲህ ዓይነት ትልቅ ክስተት እያለ እንዴት ልሰማ አልችልም?
  • የምን ክስተት ነው?
  • ነዳጅ መገኘቱን ነዋ፡፡
  • ክቡር ሚኒስትር ሁሉን ነገር ማወቅ አለብዎት ብዬ አላስብም፡፡
  • ችግሩ እኮ ይኼ ነው፡፡
  • የምን ችግር ነው?
  • እንዲህ ዓይነት አለመተማመን በመካከላችን እያለ እንዴት አገር ልንመራ እንችላለን?
  • ክቡር ሚኒስትር እርስዎ እኮ ማወቅ ያለብዎትን ብቻ ነው የሚያውቁት፡፡
  • ስለነዳጅ መገኘት ማወቅ የለብኝም?
  • ጊዜው ሲደርስ ያውቁታል፡፡
  • አሁንማ አወቅኩት፡፡
  • ማን ነገረዎት?
  • ሚዲያ ላይ ወጥቷል እኮ?
  • ኧረ ወሬው ለሚዲያም አልተነገረም፡፡
  • ከሚዲያ ነው የሰማሁት ስልህ?
  • እነሱ ከየት እንደሰሙት አላውቅም ክቡር ሚኒስትር፡፡
  • ለማንኛውም እኔ በዜናው በጣም ተደስቻለሁ፡፡
  • እሱማ በጣም አስደሳች ዜና ነው፡፡
  • እኔ እኮ መዘጋጀት ፈልጌ ነው ወሬውን ለምን ደበቅከኝ ያልኩህ?
  • ምንድነው ነው የሚዘጋጁት?
  • ይኼ ዜና እኮ የእኔን ሕይወት በጣም ይቀይረዋል፡፡
  • አልገባኝም ክቡር ሚኒስትር?
  • የነዳጅ ማስተላለፊያ ቱቦ ፕሮጀክት አልተጀመረም አይደል?
  • እሱማ ገና ነው፡፡
  • ስለዚህ እኔም ምን እንደማደርግ አውቃለሁ፡፡
  • ምን ሊያደርጉ ነው?
  • ወሳኝ የኢንቨስትመንት ዕድል ታይቶኛል፡፡
  • የምን ዕድል ነው?
  • በአፋጣኝ ነው የማስመጣው፡፡
  • ምንድነው የሚያስመጡት?
  • ነዳጁን ማመላለሻ ነዋ፡፡
  • እኮ ምን?
  • ቦቴ!