Skip to main content
x
ክቡር ሚኒስትሩ ማታ ቤት ሲገቡ ልጃቸውን ያስጠሩታል

ክቡር ሚኒስትሩ ማታ ቤት ሲገቡ ልጃቸውን ያስጠሩታል

  • አቤት ዳዲ?
  • የፈተና ወረቀትህን አምጣ እስቲ?
  • የትኛውን የፈተና ወረቀት?
  • የሒሳብ የፈተና ወረቀትህን፡፡
  • ባለፈው የተፈተንኩትን ነው?
  • አዎን አምጣና አሳየኝ፡፡
  • ይኼው ዳዲ፡፡
  • ይኼ እኮ የእንግሊዝኛ ነው፡፡ እኔ ያልኩህ የሒሳብ ፈተናህን ነው?
  • ለምን ፈለግከው ዳዲ?
  • ከትምህርት ቤት ተደውሎልኝ ነበር፣ በአስቸኳይ አምጣው?
  • እሱንማ ትምህርት ቤት ረስቸዋለሁ፡፡
  • ከእኔ ጋር እንዳትጣላ በአስቸኳይ አምጣው፡፡
  • እሺ ይኼው ዳዲ፡፡
  • እንዴ? እንዴ? እንዴ?
  • ምነው ዳዲ?
  • እንዲህ ታዋርደኛለህ?
  • ምን ላድርግ ዳዲ?
  • ያገኘኸውን ውጤት አይተኸዋል?
  • ፈተናው ከባድ ነበር፡፡
  • ለመሆኑ ክፍል ውስጥ ገብተህ ተምረህ ታውቃለህ?
  • ምን እያልክ ነው ዳዲ?
  • ክፍል ውስጥ ገብተህ ተምረህ ቢሆንማ፣ እንደዚህ ዓይነት ውጤት ልታመጣ አትችልም?
  • በጣም ከብዶኝ ነው ዳዲ፡፡
  • ሁለት ከመቶ ታመጣለህ?
  • ፈተናው ለየት ባለ መልኩ ነበር የወጣው፡፡
  • ለየት ባለ መልኩ ማለት ምንድነው?
  • በፊት ምርጫ ነበር የሚወጣው፡፡
  • ምርጫ ቢሆንስ?
  • እሱማ ለማጭበርበር ይቀላል፡፡
  • የአሁኑስ ምንድነው?
  • የአሁኑማ ካልኩሌሽን ነው፡፡
  • ካልኩሌሽን ቢሆንስ?
  • ትምህርቱ ካልገባህ እንደዚህ ትዋረዳለሃ?
  • አሁን አንተ የእኔ ልጅ ስትባል አታፍርም?
  • ምነው ዳዲ?
  • እኔ ለአንተ ምንድነው ያስተማርኩህ?
  • ምን አስተማርከኝ ዳዲ?
  • መድፈንና መድፈን ብቻ አይደል እንዴ ያስተማርኩህ?
  • እ. . .
  • ይኸው ባለፈው ምርጫ ፓርላማውን መቶ በመቶ አይደለም እንዴ የተቆጣጠርነው?
  • የእሱንማ ውጤት አየነው እኮ?
  • ምን?
  • አይ ሁሌ መቶ በመቶ መድፈን ጥሩ አይደለም ሲሉ ሰምቼ ነው፡፡
  • ለመሆኑ አንተ ብቻ ነህ የወደቅከው?
  • አብዛኛው ሰው ተረፍርፏል፡፡
  • እና ሁሉም ወድቀዋል?
  • አንዱማ መቶ ደፍኗል፡፡
  • እሱ ነው ቆራጥ፣ ሌላስ?
  • ሁለት ልጆች ሃምሳ ቤት አምጥተዋል፡፡
  • ሌላስ?
  • ቀጥሎ እኔ ነኝ ሁለት ያመጣሁት፡፡
  • እኔ ፈጽሞ ይኼን ውጤት አልቀበልም፡፡
  • እንዴ ዳዲ ከእኔም የባሰ እኮ አለ?
  • ዜሮ ያመጣ ነው?
  • ኧረ ከነጭራሹ ያልተፈተነ፡፡
  • ለምን?
  • ፈርቶ!

[ለክቡር ሚኒስትሩ አንድ የቀድሞ ወዳጃቸው ይደውልላቸዋል]

  • ክቡር ሚኒስትር በጣም ነው የኮራሁባችሁ፡፡
  • እንዴት?
  • ያየሁትን ነገር በሕይወት ዘመኔ ኢትዮጵያ ውስጥ አየዋለህ ብዬ አላምንም ነበር፡፡
  • በምንድነው እንደዚህ የምትገረመው?
  • አፋችንን እኮ ነው ያስከፈተን፡፡
  • ምኑ?
  • ያን የመሰለ ንግግር ስሰማ ኢትዮጵያ ውስጥ የሆነ አልመሰለኝም፡፡
  • ሰውዬ ምነው አካበድክ?
  • እውነት ክቡር ሚኒስትር፣ የሠለጠኑ የምዕራባውያን አገሮች ውስጥ የሚነገር ንግግር እኮ ነው የሰማነው፡፡
  • ለመሆኑ የት ነው የሰማኸው?
  • በኢትዮጵያ ቴሌቪዥን ላይ ነዋ፡፡
  • ስማ በቃ የአገሪቷ ችግር ተፈታ እያልከኝ ነው?
  • ያው ችግሩን ለመፍታት የለውጥ ጉዞ መጀመሩን የሚያበስር ንግግር ነው ባይ ነኝ፡፡
  • ሰውዬ ለውጥ ዝም ብሎ የሚመጣ ነገር አይደለም፡፡
  • ክቡር ሚኒስትር እኔ ግን በኢትዮጵያዊነቴ እንድኮራ አድርጎኛል፡፡
  • ለምን ትቸኩላለህ?
  • እንዴት ክቡር ሚኒስትር?
  • ፓርቲው እኮ በአንድ ግለሰብ ላይ የተመሠረተ አይደለም፡፡
  • ምን እያሉ ነው ክቡር ሚኒስትር?
  • ፓርቲያችን የተመሠረተው በአብዮታዊ ዴሞክራሲ ላይ ነው፡፡
  • ክቡር ሚኒስትር አሁን ግን የምትከተሉት ርዕዮተ ዓለም ምናምን እየተሸረሸረ ይመስላል፡፡
  • እንዴት ማለት?
  • ይኸው በአንድ ንግግር በአገሪቱ ላይ የፍቅር፣ የሰላምና የተስፋ መንፈስ ፈሰሰ እኮ፡፡
  • ሰውዬ ተምታቶብሃል ልበል?
  • ይኸው ተቃዋሚ ፓርቲዎችን ተፎካካሪ ወንድሞቻችን ማለት ጀመራችሁ እኮ?
  • ባትሳሳት ጥሩ ነው፡፡
  • እንዴት ክቡር ሚኒስትር?
  • ሁሉም ወደነበረበት ይመለሳል፡፡
  • አልገባኝም ክቡር ሚኒስትር?
  • ሕዝቡን ትንሽ ማስተንፈስ ፈልገን ነው፡፡
  • ክቡር ሚኒስትር የፈለገ ቢሆንም ግን ከኢሕአዴግ እንደዚህ ዓይነት ቃላት ተሰምተው አይታወቅም፡፡
  • ነገርኩህ እኮ ሁሉም ወደነበረበት ይመለሳል፡፡
  • ይኼ ግን የእርስዎ ብቻ ፍላጎት ይመስለኛል፡፡
  • ቢሆንስ ምን ችግር አለው?
  • አሁንማ ምን እንደሆኑ ገባኝ?
  • ምንድን ነኝ?
  • የድሮ ሥርዓት ናፋቂ!

[ክቡር ሚኒስትሩ አማካሪያቸውን ቢሮ አስጠሩት]

  • ክቡር ሚኒስትር ከትናንት ወዲያ እኮ የሚገርም ነገር ነው ያየነው፡፡
  • ምኑ ነው የሚገርመው?
  • አዲሱ ጠቅላይ ሚኒስትር ያደረጉት ንግግር በጣም ልቤን ነካው፡፡
  • እንዴት?
  • ራሴን መቆጣጠር አቅቶኝ ነበር፡፡
  • ምን እያልክ ነው?
  • የሚገርምዎት ከታላቁ መሪ ሞት በኋላ በአዲሱ ጠቅላይ ሚኒስትር ንግግር ነው ለመጀመርያ ጊዜ ያለቀስኩት፡፡
  • ሁለቱን ለንፅፅር እያቀረብክ ባልሆነ?
  • ክቡር ሚኒስትር ፓርላማ አልነበሩም እንዴ?
  • ነበርኩ እንጂ?
  • ታዲያ ስንት የፓርላማው አባላት በእንባ ሲራጩ አልነበረ እንዴ?
  • እኔ ማንም ሲያለቅስ አላየሁም፡፡
  • ለማንኛውም ትልቅ ተስፋ በልቤ ተጭሯል፡፡
  • የአንተ መነፋረቅና አለመነፋረቅ ዋናው ጉዳይ አይደለም፡፡
  • ዋናው ጉዳይማ እንደ ኢትዮጵያ አንድ ሆነን መቀጠላችን ነው፡፡
  • አንቀጠልም ብለህ ታስብ ነበር?
  • እንደ አያያዛችንማ የምንበታተን ነበር የሚመስለው፡፡
  • ስማ እኔን የሚያስጨንቀኝ አንድነት ምናምን የምትለው ዝባዝንኬ አይደለም፡፡
  • ምን እያሉ ነው ክቡር ሚኒስትር?
  • ከዚያ በላይ የሚያስጨንቁኝ ጉዳዮች አሉ፡፡
  • እኮ ምን?
  • አዲስ ጠቅላይ ሚኒስትር መሾሙን ረሳኸው እንዴ?
  • እሱማ አውቃለሁ፡፡
  • አየህ ሁሌም አዲስ ነገር ሲመጣ መፍራትና መበርገግ አለብህ፡፡
  • ምን ያለበት ምን አይችልም አሉ?
  • ምን አልክ አንተ?
  • ምኑን ነው የፈሩት ክቡር ሚኒስትር?
  • አዲስ ለውጥ ሊመጣ ይችላል፡፡
  • እሱማ ብዙ አዳዲስ ለውጦች መኖራቸው አይቀርም፡፡
  • እሱ ነው አሳሳቢው ጉዳይ፡፡
  • ምኑ ነው ያሳሰበዎት?
  • ቢዝነሶቼ፡፡
  • እ. . .
  • ከዚያም አልፎ ተርፎ ሌላ የሚያሳስበኝ ጉዳይ አለ፡፡
  • ምን?
  • መቀጠሌ!

[ክቡር ሚኒስትሩ ከሌላ ሚኒስትር ጋር እያወሩ ነው]

  • ስማ ወዳጄ?
  • አቤት ክቡር ሚኒስትር?
  • እኔ አንድ ሐሳብ መጥቶልኛል፡፡
  • ምን ዓይነት ሐሳብ?
  • ትናንት ቴሌቪዥን ላይ የቀድሞ ጠቅላይ ሚኒስትር ሲሸኙ ዓይተሃል?
  • እኔማ በቦታው ነበርኩ፡፡
  • እንደዚህ ዓይነት ክብር ያየ መሪ በአገራችን አለ?
  • እሱማ ትልቅ ታሪክ ነው የሠራነው፡፡
  • ታዲያ ምን ተሰማህ?
  • ትልቅ ደስታ ነዋ ክቡር ሚኒስትር፡፡
  • እንደ እሳቸው መሆን አልተመኘህም?
  • ጠቅላይ ሚኒስትር መሆን?
  • ኧረ እንደዚህ በክብር መሸኘት?
  • እሱማ ሁላችንም የምንፈልገው ነው፡፡
  • አሁን እኮ እሳቸው ሁሉ ነገር ተሟልቶላቸው ነው የተሸኙት፡፡
  • ማለት?
  • ቤት፣ መኪና፣ ጥበቃ በቃ ሁሉ ነገር፡፡
  • የአገር መሪ ነበሩ እኮ?
  • በዚያ ላይ የቀድሞ ጠቅላይ ሚኒስትር መባላቸው ያስደስታል፡፡
  • እኛም አንድ ቀን የቀድሞ ሚኒስትር መባላችን አይቀርም፡፡
  • የቀድሞ ብቻ መባል ምን ያደርጋል?
  • ምን እያሉ ነው ክቡር ሚኒስትር?
  • ቤቱ፣ መኪናው፣ ጥበቃው የት አለ?
  • እየቀለዱ ነው ክቡር ሚኒስትር?
  • የምን ቀልድ ነው?
  • አሁን እርስዎ በየክፍለ ከተማው አይደል እንዴ ቤት ያለዎት?
  • የማከራያቸው ናቸዋ፡፡
  • ታዲያ ምን ፈልጉ?
  • የምኖርበት ነዋ፡፡
  • መኖሪያዎትማ ተሠርቶ አልቋል፡፡
  • የት?
  • እስር ቤት!