Skip to main content
x
ዓይን ያጣው!

ዓይን ያጣው!

ሲኤምሲ ጊብሰን ትምህርት ቤት አካባቢ የእግረኛ መንገድ ላይ የሚገኝ የፍሳሽ ማስወገጃ ቱቦ ክዳን ለፅዳት ተከፍቶ ሳይከደን ተትቷል፡፡ የ2010 ዓ.ም. ትምህርትን የጀመሩ ተማሪዎች በስፍራው ሲያልፉ ይስተዋላሉ፡፡ ሰሞኑን አዲስ አበባን የሚያጥለቀልቃት ጐርፍ ጉድጓዱን ቢሞላው ደግሞ ጉዳቱ አያድርስ ነው፡፡ ብልጭ ድርግም የሚለው የሰሞኑ መብራት ላይ የመንገድ ጉድጓድ ተከፍቶ …. ለሚፈጠረው ነገር ተጠያቂው ምን ሰበብ ያቀርብ ይሆን?

ልብሽን በውስጤ ይዤ እኖራለሁ

ልብሽን በውስጤ ይዤ እኖራለሁ (ልቤ ውስጥ አድርጌ)

መቼም አይለየኝ

(የትም ቦታ ብሄድ አንቺም ትሄጃለሽ

ፍቅሬ ሆይ ውዲቱ፤ ያደርግሁት ሁሉ እኔ ለብቻዬ

ያንቺው ፈጠራ ነው ፍቅሬ ወለላዬ)

አንዳችም አልራራም ዕድል የሚሉትን

(ዕድሌ ነሽና፣ የኔ ወለላዬ)

አልሻም ዓለምም

(ውብ ነሽና ዓለሜ፤ የእኔ ሀቀኛያቱ)

የጨረቃ ትርጉም የመቼውም ቢሆን አንቺው ስለሆንሽ

ፀሐይም ዘወትር ቢዘፍን እንዳሻው አሁንም አንቺው ነሽ

እነሆ ጥልቅ ምሥጢር ማንም የማያውቀው

(የሥሩ ሥርና የምቡጡም እምቡጥ የሰማይ ሰማይ ዛፍም

እንደሆነ ስያሜው ሕይወት፤ ሆኖም

የሚያድግ ከሚመኘው በላይ ነፍስም ሆነ አዕምሮ ከሚደብቀው)

ይህ ነው ዕፁብ ድንቁ ኮከብን ከኮከብ ለይቶ ያኖረው

ልብሽን በውስጤ ይዤ እኖራለሁ (ልቤ ውስጥ አድርጌ)

ከኢ ኢ ካሚንግስ (1894 - 1962) ስድ ትርጉም በዳዊት ዘኪሮስ

* * *

የሰው ገንዘብ መከጀል ከሰው እጅ ይጥላል

የሰው ገንዘብ ስፈልግ ዘዴ ብዬ የያዝሁት ባያዩኝ መስረቅን፣ ቢያዩኝ መሳቅን፣ ብችልም ታግዬ ሲሆን ገድዬ፣ ባይሆንም ማምለጥን ነበርና፤ ሁልጊዜ የታለልሁበት ይህ ዘዴ ዛሬ ከመዓት ላይ ጣለኝ፡፡ ነገር ግን ሞቱ ለእኔም ለእናንተም ደግ አይደለምና እንዳትገድሉኝ፡፡ ብትገድሉኝ ደሜን የሚበቀሉ መሰሎቼ አሉኝ፡፡ ይልቅስ ከፍልጡና ከዱላው ይህንም ከመሳሰለው ከእርግጫውና ከክርኑ፣ ከጥፊውም ጨማምሩልኝና ወደ ሥራዬ ልሂድ አላቸው፡፡

ማን አለህና ዱላህን ቀምሰህ፣ በፍልጥ ቀልጠህ፣ በጥፊ ተወልውለህ፣ ገና ወደ ወህኒ ቤት ትገባለህ ብለው ቢያስፈራሩት፣ ዛሬስ ከወህኒ ቤት አገባችሁኝ፡፡ የደንቡን ተቀጥቼና ታስሬ ከተፈታሁ በኋላ የእናንተ መግቢያ ወዴት ይሆን? የማለት ዛቻ ቢዝትባቸውና በእጃቸው ወድቆ ሳለ ኋላ የተነሳሁ እንደሆነ የማለት ጉራ ቢነዛባቸው ገና ለገና ሳይሆን አይቀርም በማለት ሐሳብ ገባቸውና ሁለተኛ አይልመድህ ብለው ያንኑ ምሱን አቅምሰው ለቀቁት፡፡ መልቀቃቸው ደግ አልሆነም ሌባና ውሻ በትር አያስመርረውም፡፡ 

  • ሰንደቅ ዓላማችን መጋቢት 22 ቀን 1935 ዓ.ም.

* * *

ሦስቶቹ

ሦስት ሰዎች ነበሩ፡፡ አንደኛው ራሰ በራ ነበር፡፡ ሁለተኛው ከመቆሸሹ የተነሳ እከክ ይዞት ነበር፡፡ ሦስተኛውም ንፍጣም ነበር፡፡

እነዚህም ሰዎች ልዩ ባህሪያት እንዳላቸው ተስማምተው፣ ‹‹ስለዚህ አብረን እንሂድ፤›› ተባባሉ፡፡ አብረውም እየሄዱ ሳለ ንፍጣሙ ሰውዬ አውሮፕላን ሲያልፍ፣ ‹‹ሁ ሁ ሁ . . . ፤›› ይላል ብሎ የአውሮፕላኑን አስተላለፍ ያሳየ በመምሰል አፍንጫውን ይጠርጋል፡፡

እከካሙም ሰው እጆቹን በማቆላለፍ፣ ‹‹ኧረ አንድ ቀን ሁለት ፍየሎች እንደዚህ እያደረጉ ሲጣሉ አየሁ፤›› ብሎ የፍየሎቹን ፀብ ያሳየ መስሎ ቁስሉን ያካል፡፡

ራሰ በራውም፣ ‹‹ምን ዓይነት ውሸታሞች ናችሁ!›› ብሎ የተገረመ በመምሰል መላጣውን በእጆቹ ሸፈነ ይባላል፡፡

የወግ ገበታ

* * *

የውሳኔ ሰዓት

‹‹በአንድ የክረምት ወቅት አስታውሳለሁ አባቴ የማገዶ እንጨት ሲፈልግ አንድ የሞተ ዛፍ ያገኝና ይቆርጠዋል፡፡ ፀደይ ሲመጣ በተቆረጠው ዛፍ ግንድ ዙሪያ ማቆጥቆጡን አየ፡፡ እንዲህም አለኝ፣ ‹‹ዛፉ እንደሞተ ቆጥሬ ነበር፣ በክረምቱ ቅጠሎቹ ረግፈው ነበር፣ ቅርንጫፎቹ ሁሉ ከቅዝቃዜው የተነሳ ጭራሮ ሆነው ደርቀው በዛፉ ላይ ሕይወት የሚባል ነገር አይታይም ነበር፡፡ አሁን ግን በዋናው ሥር ላይ እስካሁን ድረስ ሕይወት አያለሁ፤›› አለ፡፡ ከዚያ ቀና ብሎ አየኝና እንዲህ አለኝ፣ ‹‹ቦብ፣ ይህ አስፈላጊ ትምህርት እንዳትረሳ፣ በክረምት ወቅት ዛፍን አትቁረጥ፤ ነገሮች በከፉም ሰዓት አሉታዊ ውሳኔ አትውሰድ፤ ልብህ በወደቀበት ሰዓት በመልካም መንፈስ ውስጥ በሌለህበት ጊዜ አስፈላጊ ውሳኔዎችን አትወስን፡፡ ጠብቅ፤ ታገስ፡፡ ማዕበሉ ያልፋል፡፡ ፀደይም ይመጣልና›› አለኝ፡፡

  • ኃይል ከበደ ‹‹ጉርሻ እና ፌሽታ›› (2006)

* * *