Skip to main content
x
‹‹መላው ዓለም በግልጽ መገንዘብ ያለበት አሜሪካ በአገራችን ላይ ጦርነት ማወጇን ነው››

‹‹መላው ዓለም በግልጽ መገንዘብ ያለበት አሜሪካ በአገራችን ላይ ጦርነት ማወጇን ነው››

 

በተባበሩት መንግሥታት ድርጅት ጉባዔ ላይ የተገኙት የሰሜን ኮሪያ የውጭ ጉዳይ ሚኒስተር ኒውዮርክ ውስጥ ለጋዜጠኞች ከተናገሩት የተወሰደ፡፡ የውጭ ጉዳይ ሚኒስትሩ ሪ ዮንግ ሆ  የአሜሪካ ፕሬዚዳንት ዶናልድ ትራምፕ በትዊተር መልዕክታቸው ያተላለፉትን መልዕክት በተመለከተ፣ ‹‹ትራምፕ እኔንና ፕሬዚዳንታችንን ኪም ጆንግ ኡን ካሁን በኋላ በአካባቢያችን ብዙም አይቆዩም ብለዋል፡፡ ካሁን በኋላ ማን ብዙ እንደሚቆይ ግን የምናየው ይሆናል፤›› በማለት አፀፋ ምላሽ ሰጥተዋል፡፡ ፕሬዚዳንት ትራምፕ የሰሜን ኮሪያ የኑክሌር ማስፈራሪያ በቅርቡ ያበቃል ማለታቸውን ያወገዙት የውጭ ጉዳይ ሚኒስትሩ፣ የሰሜን ኮሪያ የአፀፋ ምላሽ በኮሪያ ልሳነ ምድር የሚያንዣብቡትን የአሜሪካ ቦምብ ጣይ አውሮፕላኖች መትቶ መጣልን ያካትታል ብለዋል፡፡ ‹‹የሰሜን ኮሪያ የአየር ክልል ውስጥ ባይገቡ እንኳን አውሮፕላኖቹን እንመታለን፤›› ሲሉም አክለዋል፡፡ የአሜሪካና የሰሜን ኮሪያ በኑክሌርና በባላስቲክ ሚሳይሎች ፕሮግራሞች ሳቢያ ፍጥጫ ውስጥ ከገቡ ወዲህ፣ የአሜሪካ አየር ኃይል ዘመናዊ ቦምብ ጣይ አውሮፕላኖች በተዋጊ ጄቶች ታጅበው በሰሜን ኮሪያ ምሥራቃዊ አቅጣጫ እየበረሩ በመሆናቸው የበለጠ ውጥረት ተፈጥሯል፡፡ ውጥረቱ በከባድ እሰጥ አገባዎች መባባሱ ደግሞ የኑክሌር ጦርነት እንዳያስነሳ ተፈርቷል፡፡