Skip to main content
x
አቶ በቀለ ገርባ በተከለከሉት የዋስትና መብት ላይ በይግባኝ ተከራከሩ

አቶ በቀለ ገርባ በተከለከሉት የዋስትና መብት ላይ በይግባኝ ተከራከሩ

ተከሰውበት ከነበረው የሽብር ተግባር ወንጀል ክስ አንቀጹ ተቀይሮ እንዲከላከሉ ብይን የተሰጠባቸው የኦፌኮ ምክትል ሊቀመንበር አቶ በቀለ ገርባ፣ በዋስትና ጉዳይ ከዓቃቤ ሕግ ጋር ጥቅምት 9 ቀን 2010 ዓ.ም. ክርክር አደረጉ፡፡

ተጠቅሶባቸው የነበረው የፀረ ሽብርተኝነት አዋጅ ቁጥር 652/2001 አንቀጽ (3) ወደ ወንጀል ሕግ አንቀጽ 257(ሀ) ማለትም ግዙፍ ያልሆነ መሰናዳት በመቀየሩ፣ አቶ በቀለ በጠበቃቸው አቶ አመሐ መኰንን አማካይነት ዋስትና እንደማይከለክላቸው ተናግረው ሕገ መንግሥታዊ የዋስትና መብታቸው እንዲከበርላቸው ጠይቀው ነበር፡፡

ዓቃቤ ሕግ የዋስትና ጥያቄውን በመቃወም፣ ግለሰቡ ከእስር ቢለቀቁ በውጭ አገር ከሚኖሩ ሰዎች ጋር ግንኙነት ስላላቸው ከአገር ሊወጡ እንደሚችሉና ተከላከሉ የተባሉበትን ክርክር በአግባቡ ቀርበው ሊከላከሉ እንደማይችሉ በመግለጽ ተቃውሞውን አቅርቦ ነበር፡፡ የሥር ፍርድ ቤት የዓቃቤ ሕግን ክርክር በመቀበል የአቶ በቀለን የዋስትና ጥያቄ ውድቅ አድርጎታል፡፡

አቶ በቀለ በጠበቃቸው አማካይነት ለፌዴራል ጠቅላይ ፍርድ ቤት ይግባኝ ሰሚ ችሎት ይግባኝ ብለው ነበር፡፡ ችሎቱ ይግባኙን ያስቀርባል በማለት ሐሙስ ጥቅምት 9 ቀን 2010 ዓ.ም. እንዲከራከሩ አድርጓል፡፡

የአቶ በቀለ ጠበቃ ባቀረቡት ክርክር እንደገለጹት፣ በአቶ በቀለ ላይ ዓቃቤ ሕግ ያቀረበው ክስና የጠቀሰው የሕግ (አዋጅ) አንቀጽ ሲቀየር፣ የክሱ ፍሬ ነገርም ተቀይሯል፡፡ ይህ አዲስ አንቀጽም (የወንጀል ሕግ አንቀጽ 257(ሀ)) ዋስትና አይከለክልም፡፡

አቶ በቀለ ተከላከሉ የተባሉት አገር ውስጥ ያለ አንድ ሰው ደውሎላቸው፣ ሕዝቡ ተቃውሞውን ወጥቶ እየገለጸ መሆኑ ሲነግራቸው፣ ‹‹ጥሩ ነው፡፡ እንደዚህ ነው ማድረግ ያለበት፤›› በማለታቸው ሕገ መንግሥታዊ ሥርዓቱን በኃይል ወጥቶ ሊጥስ ያሰበን ሰው ደግፈሃል ተብለው መሆኑን አስረድተዋል፡፡

ነገር ግን አቶ በቀለ የተፎካካሪ ፓርቲ መሪ በመሆናቸው የተናገሩት ሁሉ ይፈጸማል ማለት እንደማይቻል አስረድተው፣ ሰበር ሰሚው ችሎት በሰጠው የሕግ ትርጉም አንድ ሕግ መተርጎም ያለበት በጠባቡ መሆን አለበት ማለቱን በማስታወስ፣ አቶ በቀለ ያሉትም ከዚያ አንፃር ሊታይ እንደሚገባው በመጠቆም ተከራክረዋል፡፡ አቶ በቀለ ውጭ ሄደው ሊቀሩ ይችላሉ የሚለው የዓቃቤ ሕግ ማከራከሪያ አሳማኝና ማስረጃ የሚቀርብበት እንዳልሆነም አመልክተዋል፡፡ በመሆኑም ዋስትና ሊከበርላቸው እንደሚገባም አስረድተዋል፡፡

ዓቃቤ ሕግ በበኩሉ የሥር ፍርድ ቤት ዋስትና የከለከላቸው ብዙ ማስረጃዎችን አይቶና ግምት ወስዶ ከመሆኑ አንፃር፣ ይህም ችሎት ሊፈቅድላቸው አይገባም ሲል ተቃውሞ ተከራክሯል፡፡ ችሎቱ የሁለቱንም ወገኖች ክርክር ካዳመጠ በኋላ መርምሮ ውሳኔ ለመስጠት ለጥቅምት 20 ቀን 2010 ዓ.ም. ቀጠሮ ሰጥቷል፡፡