Skip to main content
x
ብሔራዊ የተማሪዎች ምገባ ፕሮግራም ስትራቴጂ በመረቀቅ ላይ ነው

ብሔራዊ የተማሪዎች ምገባ ፕሮግራም ስትራቴጂ በመረቀቅ ላይ ነው

ድርቅ በተንሰራፋባቸው አካባቢዎች ከአራት ሚሊዮን በላይ ተማሪዎች የምገባ ተጠቃሚ ሆነዋል

በግል ተቋማትና በግለሰብ ደረጃ በተወሰኑ አካባቢዎች እየተከናወነ የሚገኘውን የተማሪዎች ምገባ ፕሮግራም ብሔራዊ የሚያደርግና መንግሥትንም የሚያሳትፍ ብሔራዊ የትምህርት ቤት ምገባ ፕሮግራም ስትራቴጂ በመረቀቅ ላይ መሆኑ ተገለጸ፡፡

ባለፉት ሁለት ዓመታት ድርቅ በስፋት በተንሰራፋባቸው አካባቢዎች በተቋቋሙት የቅድመ መደበኛና የመጀመሪያ ደረጃ ትምህርት ቤቶች ውስጥ ለሚገኙ 4.9 ሚሊዮን ተማሪዎች በ798 ሚሊዮን ብር ወጪ የምገባ ፕሮግራም ማከናወኑን የገለጸው ትምህርት ሚኒስቴር፣ አያይዞም የተማሪዎች ምገባን ቀጣይና በብሔራዊ ደረጃ ለማድረግ እየተሠራ መሆኑን አስታውቋል፡፡

የሚኒስቴሩ የትምህርት ቤት ማሻሻያ ፕሮግራም ዳይሬክተር አቶ ያስቡ ብርቅነህ እንደገለጹት፣ በደቡብ ብሔር ብሔረሰቦችና ሕዝቦች፣ በኢትዮጵያ ሶማሌ፣ በአፋርና በሐረሪ ክልሎች በሚገኙና ድርቁ ክፉኛ በጎዳቸው ልዩ ልዩ አካባቢዎችና በድሬዳዋ ከተማ አስተዳደር በተወሰኑ ሥፍራዎች ላሉት የቅድመ መደበኛና የመጀመሪያ ደረጃ ተማሪዎች የምገባ ፕሮግራም ተከናውኗል፡፡

ቀደም ባሉት ዓመታት በድርቅ ለተጎዱት ወገኖች የዕለት ደራሽ ዕርዳታ ከማቅረብ በተጨማሪ ትምህርትን ማዕከል ያደረገ የምግባ ፕሮግራም እንዳልተካሄደ፣ ይህን መሰል አዲስ ፕሮግራም በመካሄዱም በተጠቀሱት ሥፍራዎች የሚገኙት የቅድመ መደበኛና የመጀመሪያ ደረጃ ተማሪዎች የተከሰተው ድርቅ ሳያደናቅፋቸው ትምህርታቸውን ለመከታተል እንደቻሉ ዳይሬክተሩ ገልጸዋል፡፡

የትምህርት ቤት የምገባ ፕሮግራም በሁሉም አካባቢ በመደበኛነት ለማከናወን እንዲቻል ሚኒስቴሩ ‹‹ብሔራዊ የትምህርት ቤት ምገባ ፕሮግራም ስትራቴጂ›› በማርቀቅ ላይ ነው ያሉት አቶ ያስቡ፣ ጤና ጥበቃ ሚኒስቴር ያዘጋጀው የትምህርት ቤት የጤናና ኒውትሬሽን ፕሮግራም ደግሞ ትግራይ ውስጥ በሙከራ ደረጃ በመከናወን ላይ መሆኑን ጠቁመዋል፡፡

በሌላ በኩል ደግሞ በግሉ ዘርፍና በሃይማኖት ተቋማት ባለቤትነት ተይዞና በከተማ ብቻ ተወስኖ ለዘመናት የቆየው የቅድመ መደበኛ ትምህርት (መዋለ ሕፃናት) በመንግሥትም ከተጀመረ ወዲህ የሽፋን መጠኑ እያደገ መምጣቱን ገልጸዋል፡፡

በግሉ ዘርፍና በሃይማኖት ተቋማት ብቻ ተይዞ የነበረው የዚሁ ትምህርት ሽፋን አራት በመቶ ብቻ ነበር፡፡ መንግሥት የመዋለ ሕፃናት ትምህርት ከጀመረበት ከ2002 ዓ.ም. ወዲህ ግን የሽፋን መጠኑ ወደ 46 በመቶ ከፍ ብሏል፡፡

ሽፋኑ ከፍ ሊል የቻለውም መንግሥት የተለያዩ ዘዴዎችን (ሞዳሊቲዎችን) አካትቶ በመንቀሳቀሱ ሲሆን፣ ከተካተቱም መካከል አንዱና ዋንኛው ‹‹ተማሪ ለተማሪ›› (ቻይልድ ቱ ቻይልድ) የሚባለው ፕሮግራም ነው፡፡

ይህ ፕሮግራም እንደ በፊቱ ከአፀደ ሕፃናት እስከ መዋለ ሕፃናት ባሉት የተለያዩ ደረጃዎች (ነርሰሪ፣ ሎወር ኤንድ አፐርኬጂ) የሚንቀሳቀስ ሳይሆን ወደ ትምህርት ቤት መምጣት ያልቻሉ ሕፃናትን አምስተኛና ስድስተኛ ክፍል በሚማሩ ታላላቆቻቸው እንዲማሩ የሚያደርግ ነው፡፡

ታላላቆቻቸው ትምህርቱን የሚሰጡት በዛፍ ጥላ ሥር ወይም በአቅራቢያቸው በሚገኙ ዳሶች ወይም ባዶ ክፍሎች ውስጥ ሊሆን እንደሚችል ዳይሬክተሩ ጠቁመው፣ የትምህርት ቤት መደበኛ መምህራን ደግሞ የሚሰጠውን ትምህርት በቅርበት  እንደሚቆጣጠሩ አስረድተዋል፡፡