Skip to main content
x
ለክቡር ሚኒስትሩ የድሮ ጎረቤታቸው ይደውሉላቸዋል

ለክቡር ሚኒስትሩ የድሮ ጎረቤታቸው ይደውሉላቸዋል

[ክቡር ሚኒስትሩ  ከውጭ አገር እንደተመለሱ የፋይናንስ ኃላፊውን አስጠሩት]

  • እንኳን ደህና መጡ ክቡር ሚኒስትር፡፡
  • እንኳን ደህና ቆየኸኝ፡፡
  • ፈለጉኝ እንዴ?
  • በመጀመርያ እንኳን አደረሰህ?
  • ለምኑ? በዓል አለ እንዴ?
  • በጣም የምትገርም ሰው ሆነሃል፡፡
  • እንዴት ክቡር ሚኒስትር?
  • ይኼን ያህል ዓመት ስናከብረው የነበረውን በዓል ረሳኸው?
  • የበዓታን ክብረ በዓል ነው?
  • ምንድነው የምታወራው?
  • ያው የገብርኤል በዓልም ገና ሁለት ሳምንት ይቀረዋል፡፡
  • አንተ ሰውዬ ልትመንን አስበሃል እንዴ?
  • አልገባኝም ክቡር ሚኒስትር?
  • እንኳን አደረሰህ ስልህ አንዴ በዓታ አንዴ ገብርኤል ትለኛለህ፡፡
  • እንዲህማ ሊሉኝ አይችሉም ክቡር ሚኒስትር፡፡
  • እንዴት?
  • ሕገ መንግሥቱ ካጐናፀፈኝ አንደኛው መብት እኮ የፈለግኩትን ሃይማኖት መከተል መቻሌ ነው፡፡
  • እኔም የምልህ እኮ እሱን ነው፡፡
  • ምንድነው የሚያወሩት?
  • ሕገ መንግሥቱ ያመጣልህን ሌላኛውን ክብረ በዓል ረስተሃል፡፡
  • የትኛው ነው?
  • አብዮታዊ ዴሞክራሲ፡፡
  • እሱን እናንተው ተከተሉት፡፡
  • ታዲያ እንዲህ እንድትፈነጭ ያስቻለህ ሕገ መንግሥት ያጐናፀፈህን የብሔር ብሔረሰቦች በዓል ረስተኸዋል?
  • እንኳን አደረሰህ ያሉኝ ለዚያ ነው እንዴ?
  • በዓሉን እንዲህ አቅልለህ ነው እንዴ የምታየው?
  • ክቡር ሚኒስትር እኔ በብሔር ብሔረሰቦች በዓል የብሔረሰቦችን እኩልነት ሳይሆን ያየሁት የሕዝቦችን ውዝግብ ነው፡፡
  • ምንድነው ያልከው?
  • የብሔር ብሔረሰቦችን ውዝግብ፡፡
  • ምን እያልክ ነው?
  • ይኸው የዩኒቨርሲቲ ተማሪዎች ሳይቀሩ አይደለም እንዴ በብሔር ተከፋፍለው የሚጋጩት?
  • እንደ አንተ ዓይነቱ ናቸው እኮ ለሥርዓቱ እንቅፋት የሚሆኑት፡፡
  • እንደፈለጉ ማሰብ ይችላሉ፡፡
  • ለማንኛውም ለበዓሉ ያለህ አመለካከት ሊቀየር ይገባል፡፡
  • ክቡር ሚኒስትር የበዓሉ አከባበር ደግሞ በተለያዩ ምክንያቶች ቀዝቅዟል፡፡
  • ለምንድነው የሚቀዘቅዘው?
  • እንደ ድሮው ቲሸርት ማሳተም አይቻል፣ ኮፍያ ማሠራት አይቻል፣ አበሉም ቢሆን ትንሽ ነው፡፡
  • ማን ነው ያስቀረው?
  • ባለፈው የወጣውን መመርያ ረሱት እንዴ?
  • ዛሬ የፈለግኩህ ስለዚህ ጉዳይ ላወራህ ነው፡፡
  • ስለምን ክቡር ሚኒስትር?
  • እኔ ውጭ ብዙ ሥራ ስሠራ ነበር፡፡
  • እሱማ ለሥራ እንደሄዱ አውቃለሁ፡፡
  • ከተሰጠኝ ዋና ሥራ ውጪ በራሴ ተነሳሽነት የሠራሁት ሥራ አለ፡፡
  • የምን ሥራ?
  • በነበርኩበት አገር የነበሩ ኢትዮጵያዊያን በብሔራቸው ተከፋፍለው ነው ያሉት፡፡
  • እሺ?
  • የክፍፍላቸው መነሻ ደግሞ የብሔሮች እኩልነት የለም የሚል ነው፡፡
  • ታዲያ እርስዎ ምን አደረጉ?
  • ልክ አገራችን እንደተከበረው የብሔር ብሔረሰቦችን እኩልነት ለማስፈን በዓሉ እዚያም እንዲከበር አድርጌያለሁ፡፡
  • በጣም አሪፍ ነው ክቡር ሚኒስትር፡፡
  • በዓሉም ሲከበርም የፓናል ውይይት፣ ባህላዊ ትርዒቶችና የሻይ ቡና ፕሮግራምም ነበር፡፡
  • ምን እያሉኝ ነው ክቡር ሚኒስትር?
  • ለዚህ ሁሉ ወጪ ደረሰኙን ይዤ መጥቻለሁ፡፡
  • የምን ደረሰኝ?
  • ለፓናሊስቶች፣ ለባህላዊ ተወዛዋዦች፣ ለሻይ ቡናና ለአዳራሽ ወጪ የተከፈለ፡፡
  • እየቀለዱ ነው ክቡር ሚኒስትር?
  • የምን ቀልድ ነው የምታወራው?
  • አሁን የሚነግሩኝን ነዋ፡፡
  • ስማ አሁን በአስቸኳይ ደረሰኙን ወስደህ ሒሳቡን አወራርድልኝ፡፡
  • እንዲህ ዓይነት ነገር ውስጥ እኔ አልገባም፡፡
  • አላወራርድም እያልከኝ ነው?
  • አዲሱ መመርያ ይከለክለኛል ክቡር ሚኒስትር፡፡
  • ለዚህ ሥራዬ እኔ እኮ የምሥጋና ደብዳቤ ነበር የሚገባኝ፡፡
  • እኔ እንዲያውም ሌላ ደብዳቤ እንዳይሰጥዎት ነው የምፈራው?
  • የምን ደብዳቤ?
  • የማስጠንቀቂያ ደብዳቤ!

[የክቡር ሚኒስትሩ ሚስት ይደውላሉ]

  • ምንድነው እዚህ አገር ላይ እየተሠራ ያለው?
  • እዚህ አገር ላይ እየተሠራ ያለውን ነገር ደጋግሜ ነግሬሻለሁ፡፡
  • እኮ ምንድነው?
  • አሁንም ልማት፣ ነገም ልማት፣ ወደፊትም ልማት ነው፡፡
  • ይኼ ቀልድህ መቼ እንደሚቆም ነው ያልገባኝ?
  • መቀለጃ ጊዜ የለንም ሴትዮ?
  • ዜጎች ሠርተው መለወጥ አይችሉም እያልከኝ ነው?
  • ዜጎች ሠርተውም ሰርቀውም መበልፀግ የሚችሉባት አገር እንደሆነች በሚገባ ጠንቅቀሽ ታውቂያለሽ፡፡
  • አሁን ግን መስረቅም መሥራትም አልተቻለም፡፡
  • ምን ተፈጠረ?
  • እኔ መኪና እያስመጣሁ እሸጣለሁ፡፡
  • አታስመጪ ተባልሽ?
  • እኔ ያው አፕ ዳውን እያልኩ ነበር የማስመጣው፡፡
  • የምን አፕ ዳውን ነው የምታወሪው?
  • የመኪናው ሒሳብና የሚቆረጠው ደረሰኝ እኩል አይደለማ?
  • Under Invoice እና Over Invoice ለማለት ፈልገሽ ነው?
  • እኔ ስሙ በደንብ ስለማይገባኝ ነው፡፡
  • ምን ሆነ ታዲያ?
  • እኔ ያው ዳውን እያደረግኩ ነበር የምጠቀመው፡፡
  • Under Invoice ማለትሽ ነው?
  • አዎን፡፡
  • እሺ፡፡
  • አሁን እሱ ተከልክሎ ባንኮች የመኪናውን ትክክለኛ ዋጋ አስቀምጠውልናል፡፡
  • ምን ማለት ነው እሱ?
  • ሌላ ዶላር ከብላክ ማርኬት ገዝቼ መሄድ አልችልማ፡፡
  • ምን እያልሽ ነው?
  • በፊት ባንኮቹ በሚፈቅዱልኝ ዶላር አሥር መኪና አስጭኜ እመጣ ነበር፡፡
  • አሁንስ?
  • ከአንድ በላይ ማስጫን አልችልም፡፡
  • ለምን ተብሎ?
  • ይኸው መንግሥት ይኼን ሁላ መንገድ እየሠራና ስንትና ስንት ሰው መኪና እየፈለገ እኔ ግን ማስመጣት አልቻልኩም፡፡
  • በአሁኑ ወቅት ግን አገሪቱ ውስጥ ብዙ ችግር ስላለ የአንቺ ጉዳይ አስቸኳይ አይመስለኝም፡፡
  • መልስህ ይኼ ነው?
  • አዎን፡፡
  • እንደዚያ ከሆነ የማደርገውን አውቃለሁ፡፡
  • ምን ልታደርጊ?
  • እገለብጠዋለሁ፡፡
  • መኪናሽን ነው?
  • አይደለም፡፡
  • ታዲያ ማንን ነው የምትገለብጪው?
  • መንግሥትን!

[ለክቡር ሚኒስትሩ የድሮ ጎረቤታቸው ይደውሉላቸዋል]

  • ሄሎ ክቡር ሚኒስትር፡፡
  • ማን ልበል?
  • የቀድሞ ጎረቤትዎ ነኝ፡፡
  • እንዴት ነህ ወዳጄ?
  • አለን ክቡር ሚኒስትር ያው ከተሾሙ በኋላ ተገናኝተን አናውቅም፡፡
  • ሁሉ ነገር ሰላም ነው?
  • ያው ሰላም ነው ለማለት እንኳን ይከብደኛል፡፡
  • ምን ተፈጠረ?
  • አገሪቱ ውስጥ ያለውን ነገር ያያሉ አይደል ክቡር ሚኒስትር?
  • ምን ሆነ?
  • ከአዲስ አበባ ውጪ የሚሰማው ነገር እኮ ደስ አይልም፡፡
  • ከአዲስ አበባ ውጪ ምን ተፈጠረ?
  • ይኸው በየዩኒቨርሲቲዎቹ አካባቢ የሚሰማው ግጭት በጣም አሥጊ ሆኗል፡፡
  • ኧረ ሁሉም ሰላም ነው፡፡
  • ክቡር ሚኒስትር እኔ ግን የደወልኩት የዩኒቨርሲቲዎቹ ጉዳይ በጣም አሳስቦኝ ነው፡፡
  • ምኑ ነው የሚያሳስብህ?
  • የመጀመርያ ልጄ ዩኒቨርሲቲ ገብታለች፡፡
  • እንኳን ደስ አለህ፡፡
  • ደስ የሚያሰኘው በፊት ነበር አሁን የተረፈኝ ሥጋትና ሰቆቃ ነው፡፡
  • ምን እያልክ ነው?
  • ይኸው በየዩኒቨርሲቲው ተማሪዎች በብሔር ተከፋፍለው እየተጋጩ ተማሪዎች እየሞቱ እኮ ነው፡፡
  • ይኼ እኮ ፀረ ሰላም ኃይሎች የሚያናፍሱት ወሬ ነው፡፡
  • ክቡር ሚኒስትር ይኼ ወሬ ሳይሆን የአሁኒቷ ኢትዮጵያ የፖለቲካ ሥርዓት እውነታ ነው፡፡
  • ምን እያልክ ነው?
  • እኔ የምፈራው ልጄ አገሪቷ የደረሰችበት የብሔርተኝነት ፖለቲካ ሰለባ እንዳትሆን ነው፡፡
  • እንዴት?
  • ይኸው የብሔር ፖለቲካው ጦዞ ጦዞ ተማሪዎቻችን ዘንድ ደርሷል፡፡
  • ይኼ እኮ በዕድገት ላይ ያለች አገር ከሚገጥሟት ፈተናዎች አንዱ ስለሆነ ብዙ መጨነቅ የለብህም፡፡
  • ክቡር ሚኒስትር እርስዎማ ልጅዎን ውጭ ልከው ስለሚያስተምሩ ምንም ላይመስልዎት ይችላል፡፡
  • ምን እያልክ ነው ታዲያ?
  • አገሪቱ ውስጥ ባለው የብሔር ፖለቲካ ሳቢያ መፍትሔው አንድና አንድ ነው፡፡
  • ምንድነው እሱ?
  • ልጆቻችን አጠገባችን ሆነው ይማሩልን፡፡
  • ምንድነው የምትለው?
  • ዩኒቨርሲቲ እዚሁ ይሠራልን፡፡
  • የት?
  • በየቀበሌያችን!

[ክቡር ሚኒስትሩ አገሪቱ በገባችበት ቀውስ ላይ ፓርቲያቸው ባደረገው ስብሰባ አስተያየት እየሰጡ ነው]

  • እኔ የሚታየኝ አንድና አንድ ነገር ነው፡፡
  • ምንድነው ክቡር ሚኒስትር?
  • አገሪቱ በየቀኑ እየባሰባት እየመጣ ነው፡፡
  • በደንብ ያብራሩት እስቲ ?
  • የብሔር ፖለቲካው ተለጥጦ ሄዶ የዩኒቨርሲቲ ተማሪዎች ሳይቀሩ እየተገዳደሉበት ነው፡፡
  • ምን ማድረግ እንችላለን ታዲያ?
  • እሱማ 26 ዓመት የዘራነውን እያጨድን ነው፡፡
  • ምን እያሉ ነው ክቡር ሚኒስትር?
  • ይኼ የብሔር ፖለቲካ ለአገሪቷ ችግር አዋጪ አይደለም ብዬ ነው የማስበው፡፡
  • ክቡር ሚኒስትር ብሔር ብሔረሰቦች እኩል የሆኑት እኛ በፈጠርነው የፖለቲካ ሥርዓት ነው፡፡
  • አገሪቷ ለገባችበት ቀውስ ግን መፍትሔ ያመጣል ብዬ አላስብም፡፡
  • ሕዝቡ በቋንቋው እንዲማር ተደረገ፣ በቋንቋው እንዲዳኝ ተደረገ፣ ከዚህ በላይ እኩልነት እንዴት ይመጣል?
  • ሕዝቡ ፌዴራሊዝሙን የተረዳው በዚህ መልክ አይመስለኝም፡፡
  • እንዴት ነው የተረዳው?
  • አንድ ብሔር የበላይ፣ ሌላው ደግሞ ተጎጂ፣ እንዲሁም ሌላው ደግሞ ጥገኛ ነው ብሎ ነው የሚያስበው፡፡
  • እ…
  • ለማንኛውም አሁን የእናንተን ትንተናና ዲስኩር ለመስማት ፍላጎቱ ቢኖረኝም ጊዜው ግን የለኝም፡፡
  • የት ሊሄዱ ነው?
  • መሥሪያ ቤት ጋዜጠኞች እየጠበቁኝ ነው፣ የተያዘልኝ ፕሮግራም አለ፡፡
  • የምን ፕሮግራም ነው?
  • ሰሞኑን የከተማ አስተዳደሩ ለጀመረው የፅዳት ዘመቻ አርዓያ ለመሆን የአካባቢዬን ቆሻሻ አፀዳለሁ፡፡
  • አሁን መፅዳት ያለበት የጎዳና ቆሻሻ ሳይሆን ሌላ ቆሻሻ ነው፡፡
  • የምን ቆሻሻ?
  • የፓርቲያችን!