Skip to main content
x
የ2017 የአትሌቲክስ ትውስታዎች

የ2017 የአትሌቲክስ ትውስታዎች

ዓለም ታኅሣሥ 22 ቀን 2010 ዓ.ም. በተጠናቀቀው የአውሮፓውያኑ 2017 በአትሌቲክሱ አዳዲስ ክስተቶችን አስተናግዳለች፡፡ የተከናወኑት የረዥም ርቀት ውድድሮች የሁሉንም ቀልብ መግዛት ችለዋል፡፡ በተለይ በ5ሺሕ ሜትር ርቀት ላይ ፉክክሩ ልዩ ነበር፡፡ ዓለም አቀፉ የአትሌቲክስ ማኅበር ኤይኤኤኤፍ የ2017 የአትሌቲክስ ቅኝት መሠረት በተለይ ረዥም ርቀቱን ይበልጥ ተመልክቶታል፡፡

በ2017 ከተከናወኑት ዓለም አቀፍ አትሌቲክስ ውድድሮች የለንደኑ የዓለም ሻምፒዮና ትልቁን ድርሻ ይወስዳል፡፡ በተለይ በ5ሺሕ ሜትር የነበረው ፉክክር የብዙኃኑን ቀልብ የገዛ ነበር፡፡ በሞ ፋራ እና በኢትዮጵያኑ አትሌቶች ዘንድ ሙክታር እድሪስ፣ ዮሚፍ ቀጀልቻ እንዲሁም የወጣቱ ሰለሞን ቢረጋ መካከል የነበረው ፉክክር የሚረሳ አልነበረም፡፡

የ10ሺሕ ሜትር ርቀት አሸናፊ የሆነው የወቅቱ የሩጫው ፈርጥ ሞ ፋራ ሁለተኛውን ድል እንዳያሳካ ኢትዮጵያውያኑ ትልቅ ተጋድሎ በማድረግ ሙክታር እድሪስ ርቀቱን 13፡32.79 በመጨረስ ለአገሩ ወርቅ ማምጣት ችሏል፡፡ በውድድሩም ላይ የነበረው የቡድን ሥራ የሚረሳ አልነበረም፡፡ ሻምፒዮናውን በሁለት ወርቅ ማጠናቀቅ ለፈለገው ሞ ፋራም አጋጣሚው ያስቆጨ ነበር፡፡ የዓለም ሻምፒዮና በተጠናቀቀ በ12ኛው ቀን በዙሪክ ዳይመንድ ሊግ ሞ ፋራ 0.04 ሴኮንድ ቀድሞ በመግባት ሙክታር እድሪስን መበቀል ችሏል፡፡

በዓለም ሻምፒዮናው ወጣቶቹ ዮሚፈ ቀጀልቻና ሰሎሞን ቢረጋ አራተኛና አምስተኛ ሆነው ሲያጠናቅቁ በዳይመንድ ሊጉ ሦስተኛና አራተኛ ሆነው ጨርሰዋል፡፡

በወንዶች 10ሺሕ ሜትር ኢትዮጵያ በአባዲ ሐዲስ፣ አንድ አምላክ በልሁና ጀማል ይመር ነበር የተወከለችው፡፡ ሻምፒዮናውም ቅድሚያውኑ ትልቅ ትኩረት በተሰጠው እንግሊዛዊ ሞ ፋራ 26፡49፡51 በመግባት ድል ተጎናጽፏል፡፡

እ.ኤ.አ. በ2012 በቤጂንጉ ዓለም ሻምፒዮና በወንዶች 10ሺሕ ሜትር ከፍተኛ እንቅስቃሴ የነበራት ኬንያ በለንደኑ ግን ትንሽ ቀዝቀዝ ብላለች፡፡ በአንፃሩ በለንደኑ ሻምፒዮና ዑጋንዳ፣ ኤርትራና ኢትዮጵያ ተፎካካሪ ነበሩ፡፡ በዚህም መሠረት ከመጀመሪያው ዘጠኝ ኪሎ ሜትር ሦስቱ 2፡40 ፈጣን እንደነበር አይኤኤኤፍ በድረ ገጹ አስታውሷል፡፡

የዓለም የ10ሺሕ ሜትር ክብረ ወሰን ባለቤቷ አልማዝ አያና ከሰባት ወራት የጉዳት ቆይታ በኋላ ወደ ውድድር መመለሷ ለሻምፒዮናው ትልቅ ድምቀትን መስጠት ችሎ ነበር፡፡ አልማዝ አያና ርቀቱን 30፡16፡36 ስታጠናቅቅ ጥሩነሽ ዲባባ 31፡02፡69 በመግባት ወርቅና የብር ሜዳሊያ ማስገኘታቸው ይታወሳል፡፡

በ2017 የውድድር ወቅት ገለቴ ቡርቃ 30፡40፡87 በሄንግሎ የገባችበት ሰዓት ሁለተኛው የዓመቱ ሁለተኛ ሰዓት ሆኖ ተመዝግቦላታል፡፡ ነገር ግን ገለቴ በለንደኑ ሻምፒዮና መካተት አልቻለችም ነበር፡፡ ሰምበሬ ተፈሪም ገለቴ ቡርቃን ተከትላ 30፡41፡68 ማጠናቀቅ የቻለች ሲሆን፣ በለንደኑ ሻምፒዮና ግን በ5 ሺሕ ሜትር አገሯን መወከል ችላለች፡፡

በሴቶች 10ሺሕ ሜትር አሸናፊ የሆነችው አልማዝ አያና በ2016 የሪዮ የኦሊምፒከ ሻምፒዮና ላይ የሠራችውን ስህተት በለንደኑም ደግማዋለች፡፡ ርቀቱን እስከመጨረሻው መምራት ብትችልም በኬንያዊቷ ሄለን ሁብሬ ወርቁን ተነጥቃለች፡፡ ኬንያዊቷ 14፡34፡86 በሆነ ሰዓት ርቀቱን አጠናቃለች፡፡

በተለያዩ ድራማዎች ታጅቦ የነበረው የ2017  የዓለም አትሌቲክስ ሻምፒዮና ሞ ፋራን ከትራክ ወደ ጎዳና ሩጫ ሲያሸጋግር፣ የዓለም የአጭር ርቀት ንጉሡን ዩዜን ቦልትንም አሰናብቷል፡፡

ኢትዮጵያ በሁለት ወርቅና ሦስት የብር ሜዳሊያ ከዓለም ሰባተኛ ደረጃን በመያዝ ማጠናቀቋ ይታወሳል፡፡