Skip to main content
x
የኢትዮ ጂቡቲ የባቡር ትራንስፖርት አገልግሎት ታሪፍ ይፋ ሆነ

የኢትዮ ጂቡቲ የባቡር ትራንስፖርት አገልግሎት ታሪፍ ይፋ ሆነ

የኢትዮ ጂቡቲ የባቡር ትራንስፖርት አገልግሎት ዛሬ ታህሳስ 23 ቀን 2010 ዓ.ም. ለቡ ከሚገኘው ጣቢያ ሥራውን በይፋ ሲጀምር፣ ከለቡ አንስቶ የጂቡቲ መዳረሻው ነጋድ ድረስ 1,341 ብር እንደሚያስከፍል ተገለጸ፡፡

በ3.8 ቢሊዮን ዶላር ወጪ የተገነባው የባቡር መስመር ለመንገደኞች አገልግሎቱን ሲጀምር፣ የትራንስፖርት ታሪፉን በወንበርና በባለመኝታ ከፋፍሎ ነው፡፡ በዚህም መሠረት በወንበር ለሚጓዙ ከመነሻው አዳማ ድረስ 68 ብር፣ ድሬዳዋ ድረስ 308 ብር፣ አልሳቤህ ድረስ 459 ብርና ነጋድ ድረስ የሚጓዙ መንገደኞች 503 ብር ይከፍላሉ፡፡ የባቡር ትራንስፖርት አገልግቱም በኪሎ ሜትር 0.68 ብር ክፍያ ይጠየቃል ማለት ነው፡፡

የባለመኝታው ጉዞ በሦስት የተከፋፈለ ሲሆን ከላይ፣ ከመሀልና ከታች ተብሏል፡፡

ከላይ ባለው መኝታ ለመሄድ አዳማ ድረስ 91 ብር፣ ድሬዳዋ ድረስ 410 ብር፣ አልሳቤህ ድረስ 612 ብርና ነጋድ ድረስ 671 ብር ያስከፍላል፡፡ ለተመሳሳይ ጉዞ በመሀል ባለው መኝታ ለመሄድ 125 ብር፣ 564 ብር፣ 841 ብርና 922 ብር ያስከፍላል፡፡ እንዲሁም ለተመሳሳይ ጉዞ ከታች ያለው መኝታ ለተመሳሳይ ጉዞ 137 ብር፣ 616 ብር፣ 918 ብርና 1,006 ብር ያስከፍላል፡፡

በተጨማሪም የባቡር ትራንስፖርት አገልግሎቱ ባለመኝታ ልዩ ክፍል የሚባል ሲኖረው፣ ይህም ከላይና ከታች ተብሎ ተከፍሏል፡፡ በባለ መኝታ ልዩ ክፍል ከላይ ሆኖ ለመጓዝ አዳማ ድረስ 171 ብር፣ ድሬዳዋ ድረስ 769 ብር፣ አልሳቤህ ድረስ 1,147 ብርና ነጋድ ድረስ 1,258 ብር ያስከፍላል፡፡ በተመሳሳይ የጉዞ መስመር በባለመኝታ ልዩ ክፍል ከታች ሆኖ ለመጓዝ 182 ብር፣ 821 ብር፣ 1224 ብርና 1,341 ብር ያስከፍላል፡፡

በባቡሩ ጭነት ለማጓጓዝ በኪሎ ሜትር 0.051 ዶላር በቶን የሚያስከፍል ሲሆን፣ በብር ደግሞ ይህ ዋጋ በ22.5 ብር ይሰላል፡፡

የባቡር መስመሩ ሥራ መጀመሩን በማስመልከት እስከ ጥር 10 ቀን 2010 ዓ.ም. ለሚጓዙ መንገደኞች በሁሉም የትራንስፖርት ታሪፍ ላይ የ50 በመቶ ቅናሽ መደረጉ ታውቋል፡፡