Skip to main content
x
የመኢአድና የሰማያዊ አመራሮች የሰሜን አሜሪካ ቆይታቸው ውጤታማ እንደነበር አስታወቁ
የመኢአድና የሰማያዊ ፓርቲ አመራሮች ጋዜጣዊ መግለጫ ሲሰጡ

የመኢአድና የሰማያዊ አመራሮች የሰሜን አሜሪካ ቆይታቸው ውጤታማ እንደነበር አስታወቁ

የኢትዮጵያ ሕዝብ የጋራ ትግል ሸንጎ (ሸንጎ) ባደረገላቸው ጥሪ መሠረት በሰሜን አሜሪካ የተለያዩ ግዛቶች ያደረጉት ፖለቲካዊ እንቅስቃሴ ውጤታማ እንደነበር፣ የመላው ኢትዮጵያ አንድነት ድርጅት (መኢአድ) ሊቀመንበር በዛብህ ደምሴ (ዶ/ር) እና የሰማያዊ ፓርቲ (ሰማያዊ) ሊቀመንበር አቶ የሺዋስ አሰፋ አስታወቁ፡፡

ሁለቱ ሊቀመናብርት ይህን ያስታወቁት በሰሜን አሜሪካ ያደረጉትን የአራት ወራት ቆይታና ፖለቲካዊ ሥራዎችን አስመልክቶ ሰኞ ታኅሳስ 23 ቀን 2010 ዓ.ም.፣ ‹‹በውጭ አገሮች የሚገኙ ኢትዮጵያዊያን ደጀን ሆነው ድጋፍ በመስጠት ለሰላማዊ ትግሉ ድል እንደሚያበረክቱ ጥርጥር የለንም›› በሚል ርዕስ በመኢአድ ዋና ጽሕፈት ቤት በሰጡት ጋዜጣዊ መግለጫ ወቅት ነው፡፡

የፓርቲዎቹ ሊቀመናብርት ወደ ሰሜን አሜሪካ ሲያቀኑ በዋነኝነት ሦስት ተልዕኮዎች ለማሳካት አቅደው የነበረ መሆኑን፣ እነዚህም ተልዕኮዎች በአመራሮቹ ዕይታ ውጤታማ እንደነበሩ ተገልጿል፡፡

ሊቀመናብርቱ ይዘዋቸው የተጓዙት ሦስት አጀንዳዎች በሰሜን አሜሪካ የሚገኙ የመኢአድ፣ የቀድሞው አንድነትና ሰማያዊ ፓርቲ ደግፊዎችን በማሰባሰብ አንድ ጠንካራ የድጋፍ ሰጪ ቻፕተር ማጠናከር፣ ሰላማዊ ትግሉን በገንዘብ የሚደግፉ ኢትዮጵያዊያንን በማፈላለግና በስብሰባዎች ላይ የገቢ ማስገኛ ፕሮግራሞችን ማድረግ፣ እንዲሁም በኢትዮጵያ ወቅታዊ የፖለቲካ ሁኔታና ሰብዓዊ መብት አያያዝ ላይ በየግዛቱ ለሚገኙ የኢትዮጵያዊያን ማኅበረሰብ አባላት፣ ለሴኔትና ለተወካዮች ምክር ቤት አባላት፣ እንዲሁም ለኢትዮጵያ ወዳጆች ማብራሪያ መስጠት ነበር ብለዋል፡፡

በዚህም መሠረት የድጋፍ ሰጪ ማኅበራትን ማቋቋምን በተመለከተ ካናዳን ጨምሮ በሰሜን አሜሪካ ወደፊት ለሚደረገው ሰላማዊ ትግል ድጋፍ የሚያደርጉ ማኅበራት ዋሽንግተን ዲሲ መቋቋማቸውንና ገንዘብን በተመለከተም መጠነኛም ቢሆን ድጋፍ ማግኘታቸውን አቶ የሺዋስ ለሪፖርተር ገልጸዋል፡፡

ከዚህ በተጨማሪም የኢትዮጵያን ወቅታዊ ሁኔታና የሰብዓዊ መብት አያያዝ በተመለከተ ለኢትዮጵያ ማኅበረሰብ፣ ለኮንግረስ አባላት፣ ለአሜሪካ የውጭ ጉዳይ መሥሪያ ቤትና ለኢትዮጵያ ወዳጆች ማብራሪያ መስጠታቸውን፣ በዚህም ላይ ገለጻና ማብራሪያ ከተሰጣቸው አካላት ጋር መግባባት መፈጠሩን ገልጸዋል፡፡

ከእነዚህ አጠቃላይ ተልዕኮዎች በተጨማሪም ጥሪ ካደረገላቸው ከሸንጎ ጋር አብሮ የመሥራት ስምምነት ማድረጋቸውን፣ በዚህ ስምምነት መሠረት ኢትዮጵያዊያን የውጭና የውስጥ ሳይባባሉ በጋራ የሚሠሩበትን ዕድል መፍጠራቸውን አቶ የሺዋስ አመልክተዋል፡፡