Skip to main content
x
2.5 ሚሊዮን ኩንታል ስኳር የሚያመርተው ኦሞ ኩራዝ ሁለት ፋብሪካ ሥራ ጀመረ
የኦሞ ኩራዝ ሁለት ፕሮጀክት ከስኳር ባሻገር የኢታኖልና የኤሌክትሪክ ኃይል የማመንጨት አቅም አለው

2.5 ሚሊዮን ኩንታል ስኳር የሚያመርተው ኦሞ ኩራዝ ሁለት ፋብሪካ ሥራ ጀመረ

ከ6.67 ቢሊዮን ብር በላይ ወጪ እንደወጣበት የተገለጸው የኦሞ ኩራዝ ሁለት ስኳር ፋብሪካ የምርት ሥራ መጀመሩ ተገለጸ፡፡

ባለፈው ዓመት ፋብሪካው የምርት ሙከራ ጀምሮ ነበር፡፡ ሆኖም በድንገተኛ ዝናብ ምክንያት ሙከራው ቢቋረጥም፣ ከታኅሳስ 22 ቀን 2010 ዓ.ም. ጀምሮ ሙሉ ለሙሉ ማምረት እንደጀመረ የስኳር ኮርፖሬሽን የሕዝብ ግንኙነት ዳይሬክተር አቶ ጋሻው አይችሉህም ለሪፖርተር ገልጸዋል፡፡ ፋብሪካው መጋቢት 14 ቀን 2009 ዓ.ም. የሙከራ ምርት መጀመሩ ይታወሳል፡፡

ከምርት ሙከራ በኋላ ወቅቱን ባልጠበቀ ዝናብ ምክንያት ለረዥም ወራት ስኳር ማምረት ሳይችል መቆየቱት የገለጹት አቶ ጋሻው፣ ከ2009 ዓ.ም. ሰኔ አጋማሽ ጀምሮ ስኳር ማምረት እንዲጀምር መታቀዱን አስታውሰዋል፡፡ ሆኖም ላለፉት ስድስት ወራት ሥራ ሳይጀምር ቆይቷል፡፡ ባለፈው ዓመት በኦሞ አካባቢ ባልተለመደ አኳኋን በጣለው ከፍተኛ ዝናብ ሳቢያ፣ ለፋብሪካው ግብዓት እንዲሆን የተተከለውን የሸንኮራ አገዳ ከማሳ  ወደ ፋብሪካ መውሰዱ አዳጋች እንደነበር ጠቅሰው፣ በአሁኑ ወቅት ግን የአገዳ መፍጨት ሥራ መጀመሩን አስታውቀዋል፡፡  

ኮምፕላንት በተባለ የቻይና ኩባንያ የተገነባው ፋብሪካ፣ በቀን 12 ሺሕ ቶን ስኳር የመፍጨት አቅም ያለው ሲሆን፣ በሙሉ አቅሙ ማምረት ሲጀምር በዓመት 2.5 ሚሊዮን ኩንታል ስኳር ለገበያ ማቅረብ ይችላል፡፡ ለአሁኑ ግን ፋብሪካው በግማሽ አቅሙ ያመርታል ተብሏል፡፡ ፋብሪካው ከስኳር ባሻገር፣ 28 ሚሊዮን ሊትር ኤታኖል ማምረት ይችላል፡፡

የኦሞ ኩራዝ ቁጥር ሁለት ስኳር ፋብሪካ የግንባታ ኮንትራቱ የተፈረመው በ2006 ዓ.ም. ቢሆንም፣ ግንባታው የተጀመረው ግን በ2007 ዓ.ም. እንደነበር ይታወሳል፡፡ የግንባታ ወጪው ከቻይና ልማት ባንክ በተገኘ ብድር ተሸፍኗል፡፡ ከስኳር ተረፈ ምርት ከሚያመነጨው 60 ሜጋ ዋት የኤሌክትሪክ ኃይል ውስጥ 20 ሜጋ ዋት ለራሱ ተጠቅሞ ቀሪውን 40 ሜጋ ዋት ወደ ብሔራዊ ቋት እንደሚልክ ይጠበቃል፡፡

በኦሞ ኩራዝ የስኳር ልማት ፕሮጀክት ሥር እየተገነቡ ከሚገኙ አራት ፋብሪካዎች ውስጥ፣ ሥራ የጀመረው የኩራዝ ሁለት ፋብሪካ አንዱ ሲሆን፣ ከወንጂ ሸዋ፣ መተሐራ፣ ፊንጫኣ፣ ከሰምና ተዳንሆ ጋር ሲደመር፣ በምርት ተግባር ውስጥ የሚገኙ ስድስት የስኳር ፋብሪካዎች በአገሪቱ እንዲገኙ አስችሏል፡፡

የአርጆ ዴዴሳ ስኳር ፋብሪካ በመጪው ወር መጨረሻ ወደ ሥራ እንደሚገባ የኮርፖሬሽኑ መረጃ አመላክቷል፡፡ በሥራ ላይ የሚገኙት ፋብሪካዎች በአጠቃላይ አራት ሚሊዮን ኩንታል ገደማ የሚገመት ስኳር ያመርታሉ፡፡ በኢትዮጵያ ካለው የስኳር ፍላጎት አኳያ፣ ከ2.5 ሚሊዮን ኩንታል በላይ የአቅርቦት ክፍተት በመኖሩ፣ ከውጭ በማስገባት ሲገዛ ቆይቷል፡፡ እንደ አቶ ጋሻው ገለጻ ግን በዚህ ዓመት ወደ ምርት የሚገቡትን ጨምሮ ፋብሪካዎቹ በአጠቃላይ 6.9 ሚሊዮን ኩንታል እንዲያመርቱ ታቅዷል፡፡ የአገሪቱ ዓመታዊ የስኳር ፍጆታ 6.5 ሚሊዮን ኩንታል ገደማ በመሆኑ፣ ትርፍ ምርት እንደሚጠበቅ መረጃዎች ያሳያሉ፡፡