መነሻ ገጽ - ሌሎች አምዶች - ልዩ ልዩ - ሸማች - ማስተር ፕላን
Buy Valtrex Online Buy Albuterol inhaler Online Buy Prinivil Online

በዓለማችን ምርጥ የምንላቸው ከተሞች ምርጥ ለመሰኘት የበቁት ዋነኛ ምክንያት ከትውልድ ወደ ትውልድ የሚሸጋገር ረዥም ራዕይ የሰነቀ ማስተር ፕላን ይዘው የተጓዙ በመሆናቸው ነው፡፡

ይህም ራዕያቸው ከተሞቻቸው ለነዋሪዎች ምቹ እንዲሆኑ፣ ዓይን እንዲስቡ ከማድረግ አልፎ የበርካታ ቱሪስቶችን ቀልብ በመሳብ ጠቀም ያለ ገቢ ምንጭም እንዲሆኑ አስችሏቸዋል፡፡

ከዚህ ዕይታ አዲስ አበባንና ሌሎች ከተሞቻችን ስንመለከት በማስተር ፕላንና በረዥም ጊዜ የከተሞች ዕቅድ ዙሪያ ብዙ ወደኋላ የቀሩ መሆናቸውን እንታዘባለን፡፡ አዲስ አበባም የዚህ ችግር ተምሳሌት ናት፡፡ በተለይ አዲስ አበባ ዘላቂና መጪውን ጊዜ ታሳቢ ያደረገ ራዕይ አላት ቢባልም በአግባቡ ሲተገበር አይታይም፡፡ ለዚህ አመለካከት ጥሩ ምሳሌ የሚሆነን የከተማዋ ማስተር ፕላን አተገባበር ላይ አጋጠሙ የሚባሉ የተለያዩ ችግሮችን ነው፡፡

የከተማዋን ሁለንተናዊ የመሠረተ ልማት አውታሮች በመገንባትና በማሻሻል ረገድ መጠነ ሰፊ የገንዘብ ወጪ እየተደረገ የመሆኑን ያህል፣ ማስተር ፕላኑ እየተተገበረ ያለበት መንገድ አጠያያቂ የሚሆንባቸው ብዙ ክስተቶች አሉ፡፡ አዲስ አበባ አሁንም ድረስ በነዋሪዎችም ሆነ በከተማዋ ለሚኖሩ የውጭ አገር ማኅበረሰብ አርኪ አገልግሎት በበቂ ሁኔታ ለማቅረብ አዳጋች እየሆነባት የመምጣቱ ምክንያት፣ ከረዥም ጊዜ ራዕይ ጋር ተያይዞ በአግባቡ ሊተገበር ያልቻለው ማስተር ፕላን ዋና ጉዳይ ነው፡፡
 
በከተማዋ ማቋቋሚያ ቻርተር መሠረት የተቀመጡትን ራዕይና ማስተር ፕላን መሠረት ያደረገ ትግበራ በአግባቡ አለመታየቱ ነው፡፡ ከተማዋ በተለያየ ጊዜ ለአሥር፣ ለሃያና ከዚህም በላይ ለሆኑ ዓመታት እየተባለ ማስተር ፕላን የሚሠራላት ቢሆንም፣ የማስተር ፕላኑ አተገባበር ሁሌም ችግር ያለባት በመሆኑ የከተማዋ ገጽታ ላይ አሉታዊ ተፅዕኖ ሲፈጠር ይታያል፡፡ ችግሩ በቢሊዮን ለሚቆጠር ንብረት መውደም ምክንያት እየሆነ ነው፡፡

በከተማዋ ውስጥ ለሚፈጠሩ ችግሮች የሚሰጠው ምክንያት በራሱ ከተማዋ በተቀናጀ ሁኔታ ሥራዎች እየተሠሩ እንዳልሆኑ ምልክቶች ናቸው፡፡ በአንድ መንግሥታዊ መሥሪያ ቤት በሚፈጠር ችግር የሚሰጠው ምክንያት፣ ሌላኛውን መሥሪያ ቤት ተጠያቂ የሚያደርግ ነው፡፡ እንዲህ ዓይነት አካሄድ ደግሞ በቀጣይ በከተማዋ የሚተገበሩ ፕሮጀክቶችና ማስፋፊያዎች ከችግር እንዳይወጡ ሲያደርግ ይስተዋላል፡፡ ከማስተር ፕላን ውጭ የሚገነቡ ግንባታዎች የከተማዋ መሪ ማስተር ፕላን አተገባበርን ሲፈታተኑ ይታያል፡፡ በሚሊዮን የሚቆጠሩ ወጪ የተደረገባቸው ግንባታዎች ሲፈርሱ ይስተዋላል፡፡ ለተለያዩ ግንባታዎች የሚሰጡ ቦታዎች ማስተር ፕላኑን ጠብቀው የማይሠሩ ስለመሆናቸውም ወይም በማስተር ፕላኑ መሠረት ስለመሰጠታቸው በቂ ፍተሻ አያደርግም ወይ? የሚል ጥያቄ የሚነሳባቸው ጉዳዮች አሉ፡፡

በሌላ በኩልም ትላልቅ የመሠረተ ልማት ግንባታዎችን የሚያከናውኑ እንደ ቴሌ፣ ውኃና ፍሳሽ፣ መንገዶች ባለሥልጣንና የኢትዮጵያ መብራት ኃይል ኮርፖሬሽን ያሉ ተቋማት የረዥም ጊዜ ዕቅዳቸውን ከከተማዋ ማስተር ፕላን ጋር እንዲጣጣም አለማድረጋቸው ያለመደረጉ ብዙ ችግር እንዲከሰት አድርጓል፡፡

ከቴሌም ይሁን ከውኃና ፍሳሽ እንዲሁም ከአዲስ አበባ መንገዶች የሚደመጡት ምክንያቶች የሚያነጣጥሩት ወደራሳቸው ሳይሆን ወደሌላ ነው፡፡ አንዳንዴም ወደ ሕዝቡ ሲያነጣጥሩ ይስተዋላሉ፡፡ ይህ ዘላቂ መፍትሔ አያመጣም፡፡

ምንም እንኳ ከተማዋ ከተመሠረተችበት ጊዜ ጀምሮ ሲወርድ ሲዋረድ የመጣው ችግር የተወሳሰበ ቢሆንም፣ ይህንን መቅረፍ የሚቻለው፣ ለአንዴና ለመጨረሻ ጊዜ ከተማዋ ባስቀመጠችው ራዕይና ማስተር ፕላን መመራት ሲቻል ነው፡፡ የነገዋ አዲስ አበባ ምን ልትመስል እንደምትችል ጠንቅቆ ሊነግረን የሚችለውን መሪ ማስተር ፕላን በአግባቡ መተግበሩን ሊያረጋግጡ የሚችሉ አሠራሮች መዘርጋት ግድ ይላል፡፡

በቀጣይም ከእንደዚህ ዓይነት አዙሪት ለመውጣት የከተማዋ አስተዳዳሪዎች የሩቅ ዕይታን ታሳቢ ያደረገ የአሠራር ዘይቤን መከተል ብቻ ሳይሆን ማስተር ፕላኑ በአግባቡ ያልተተገበረበትን ምክንያት በማወቅ ዕርምጃ መውሰድንም ይጨምራል፡፡

ዘመናዊ የዓለማችን ከተሞች ልምድ እንደሚያሳየው፣ ከተሞች በማስተር ፕላን የሚመሩ ከመሆናቸውም በላይ የአጭር ጊዜ ሳይሆን የረጅም ጊዜ ራዕይ ያላቸው መሆኑን ነው፡፡

የአዲስ አበባ ከተማ ማስተር ፕላን አተገባበር ብዙ የሚቀረው ብሎም ማስተር ፕላኑ ረዥም ራዕይ አይታይበትም የሚያስብሉ ክስተቶችን ለማየት ከተፈለገ ደግሞ በቅርቡ ተግባራዊ የሆነውን የቀላል ባቡር መስመር ፕሮጀክት መጥቀስ ይቻላል፡፡ ፕሮጀክቱን በመዘርጋት በርካታ ችግሮች እየተፈጠሩ ነው፡፡ በባቡር ፕሮጀክቱ የተነሳ በቅርብ ጊዜ የተገነቡና በሚሊዮኖች የሚቆጠር ወጪን የጠየቁ የመንገድና የሕንፃ ግንባታዎች እየፈረሱ ነው፡፡ በሌላ በኩል ደግሞ ከፍተኛ መዋዕለ ነዋይ የፈሰሰባቸውና ከማስተር ፕላን ውጪ የተገነቡ ሕንፃዎችን ለማዳን ዲዛይን እስቀመቀየር ተደርሷል፡፡

ይህ የሚያሳየን ማስተር ፕላኑን ተከትሎ ግንባታዎችን የማከናወን ችግር መኖሩ ነው፡፡ ምርጫ ከሌለ ግን ለአዳዲስ ግንባታዎች ሲባል ትልልቅ ሕንፃዎች ይፈርሳሉ፡፡ በዚች ድሃ አገር ውስጥ እንዲህ ዓይነት አላስፈላጊ ወጪና ኪሳራ መድረስ ባይገባውም፣ ቀድሞውንም ማስተር ፕላን በአግባቡ ያለመተግበሩ የሚያመጣው ጣጣን በግልጽ ያሳያል፡፡

የከተማ አስተዳዳሪዎች አሁን ከተፈጠረው ችግር ብዙ ሊማሩበት ይገባል፡፡ የውጭውን ተሞክሮ መውሰድም የግድ ይላቸዋል፡፡ በተለይ በአሁኑ ወቅት የከተማዋ የአሥር ዓመት ማስተር ፕላን እየተሠራ በመሆኑ ፕላኑ አሁን የተመለከትነውን ችግር ሊቀረፍ በሚችል ደረጃ መሥራት እንዳለበት ያስገነዝባል፡፡ ማስተር ፕላኑ በአሥር ዓመት መገደብ የሌለበት ቢሆንም፣ ቢያንስ ከዚህ በኋላ ሊኖረን የሚገባው ማስተር ፕላን በደሃ አቅማችን የገነባናቸውንና ብዙ ወጪ የወጣባቸውን የማያፈርስ መሆን አለበት፡፡ በአጭር ጊዜም ባንገነባው ነገ ተነገወዲያ ልንገነባው ለምንችላቸው የተለያዩ መሠረተ ልማቶች ቦታ የሚተውና ይህም እንዲጠበቅ የሚያደርግ ማስተር ፕላን እንዲኖር ሁሉም በእኔነት ስሜት መንቀሳቀስ አለበት፡፡

የአንድ ከተማ ሁለንተናዊ ዕድገት በቀጥታም ሆነ በተዘዋዋሪ መሠረት የሚያደርገው የከተማዋን ነዋሪዎች በመሆኑ፣ በቀጣይ በአዲስ አበባ የመሠረተ ልማት ፕሮጀክት ማስፋፊያ ጉዳይ ላይ ግልጽ ውይይት የሚደረግባቸው የተለያዩ መድረኮች መመቻቸትም አለባቸው፡፡ ማስተር ፕላኖቻችንም በከተማ አስተዳደር ዙሪያ ያካበተ ልምድ ያላቸው፣ የአገራችንም ሆነ የውጭ ምሁራንና ባለሙያዎች ሐሳብና አስተያየት ሊደመጥ የሚችልበት ሥርዓት መዘርጋት ይኖርበታል፡፡

ካለፈው ስንማርም ቀጣዩን ጊዜ ብሩህ ልናደርግ እንችላለን፡፡ በመሆኑም በመወያየት ከሚገኙ ልምዶች ተነስተን የሩቁንም በማሰብ ማቀድ ይገባናል፡፡ ሌሎች የአገሪቱ ከተሞችም የነገ ዕድገታቸውን በማሰብ ቅኝታቸውን ማስተካከል ይገባቸዋል፡፡