መነሻ ገጽ - ሌሎች አምዶች - ልዩ ልዩ - ሸማች - ዓውደ ዓመትና አጉል ልምዶች
Buy Valtrex Online Buy Albuterol inhaler Online Buy Prinivil Online
25 August 2013 ተጻፈ በ 

ዓውደ ዓመትና አጉል ልምዶች

የዓውደ ዓመት ዋዜማ ላይ ነን፡፡ ሁሌም እንደሚደረገው አዲሱን ዓመት ለመቀበል ከወዲሁ ዝግጅት ተጀምሯል፡፡ ሁሉም ኢትዮጵያዊ በአንድ ቋንቋ እንኳን አደረሰን የሚባባልበት ይህ ዓውደ ዓመት፣ ከሌሎች በዓላት የበለጠ ከፍተኛ ግብይት የሚካሄድበት ነው ማለት ይቻላል፡፡

ከፍተኛ የገንዘብ ዝውውር ጭምር የሚካሄድበት ይህ የዘመን መለወጫ በዓል፣ ለዓውደ ዓመቱ ብቻ ተብሎ ሳይሆን ከአዲሱ ዓመት ጋር ተያይዞ ወጪ የሚያስወጡ ተጨማሪ ክስተቶችን ያስተናግዳል፡፡ በአዲሱ ዓመት ዋዜማና ማግስት ባሉ ጥቂት ሳምንታት ከፍተኛ የገንዘብ ዝውውርና ወጪ የሚታይበት ወቅት ስለመሆኑ፣ የልጆች ትምህርት ቤት፣ የደብተር፣ የዩኒፎርምና የመሳሰሉ ወጪዎች ጥሩ ማሳያዎች ናቸው፡፡ 

ዓውደ ዓመትና ገበያ ሲታሰብ ታዲያ ሁሌም ቀድመን የምናስበው፣ ነጋዴዎች በዓሉን አስታከው የሚጨምሩት ዋጋ ነው፡፡ እርግጥም ዓውደ ዓመት መጣ በተባለ ቁጥር ያልታሰበ የዋጋ ቁልል የሚጠብቀው ሸማች ሲማረር መመልከት አዲስ አይደለም፡፡ 

ከዚህ አንፃር ሁሌም ዓውደ ዓመትን ተከትሎ የሚፈጠሩ የገበያና ተያያዥ ችግሮች እንዲስተካከሉ መጠቆሙ የተገባ ነው፡፡ በተለይ መንግሥትም ሆነ ኅብረተሰቡ ልብ ሊሏቸውና ሊያስተካክሏቸው የሚገቡ ሁለት ጉዳዮችን በዓመት በዓሉ ዋዜማ መጠቆሙ ተገቢ ይሆናል፡፡ 

የዓውደ ዓመት ገበያና ሸመታ

በተደጋጋሚ እንደሚገለጸው በዓውደ ዓመት ሰሞን በግብይት ሒደት ውስጥ ጐልተው ከሚታዩ ችግሮች ውስጥ አንዱ፣ ኅብረተሰቡ ለዓውደ ዓመት የሚሆኑ ግብዓቶችን የሚሸምተው በዓሉ ጥቂት ቀናት ሲቀረው መሆኑ ነው፡፡ ይህ የሸመታ ባህል ደግሞ ብዙ ችግሮችን ሲያስከትል አይተናል፡፡ በተለይ ዋጋ እንዲወደድ በማድረግ ገበያውን የማጋጋል አቅሙ ከፍተኛ ነው፡፡ 

በርካታ የአገራችን ነጋዴዎች ለዓውደ ዓመቱ የሚፈለጉ ምርቶችን ያስወድዳሉ፡፡ በርካሽ የተረከቡትን ምርት ሳይቀር በስመ ዓውደ ዓመት ዋጋ ይቆልላሉ፡፡ ሸማቹ ይህንን ያውቃል፡፡ ከልምድ እንደታየውም ዓውደ ዓመቱ በተቃረበ ቁጥር የሚፈለጉ ምርቶች ዋጋቸው እየተወደደ ይሄዳል፡፡ ይህ ግልጽ የሆነ እውነታ እየታወቀ ሸማቾች በራሳቸው ጥፋት የስግብግብ ነጋዴዎች ሰለባ ይሆናሉ፡፡ 

ይህ ከታወቀ ሸማቾች ዓውደ ዓመቱ ከመድረሱ በፊት ሊበላሹ የማይችሉ ምርቶችን ቢያንስ ከአንድና ከሁለት ሳምንት በፊት የመግዛት ባህል ባለማዳበራቸው፣ የዓውደ ዓመት ገበያ እንዲጋጋል በማድረግ የራሳቸውን አስተዋጽኦ ያበረክታሉ፡፡ በእርግጥ ጥቂት የማይባል ሸማች ለዓውደ ዓመት የሚያወጣውን ገንዘብ ሊያገኝ የሚችለው በመጨረሻዎቹ ቀናት ሊሆን ይችላል፤ ነገር ግን አቅም ያለውና ቀድሞ መግዛት የሚችለው ሸማች ሳይቀር ቀድሞ የመግዛት ፍላጐቱ የቀዘቀዘ ነው፡፡ ቀድሞ በመሸመት በዓውደ ዓመት የመጨረሻ ቀናት ላይ ከሚፈጠረው ያልተገባ የዋጋ ጭማሪ ሸማቹ ሊድን እንደሚችል አለማሰቡ ያስገርማል፡፡ በዚህም ዘግይቶ መሸመት ምን ያህል ዋጋ እንደሚያስከፍል አለመረዳቱም ግራ ይገባል፡፡ ሌላው ቀርቶ ለዶሮና ለበግ ማቆያ ስፍራ ሊኖርቸው የሚችሉ ሸማቾች፣ ቀድሞ በመግዛት ማስቀመጣቸው በብዙ አትራፊ ያደርጋቸዋል፡፡ 

ዓውደ ዓመቱ ከመድረሱ ሁለትና ሦስት ሳምንታት በፊት አንድ ኪሎ ቅቤ በ140 ብር መግዛት የሚችል ሸማች፣ ዓውደ ዓመቱ አንድበና ሁለት ቀን ሲቀረው አንዱን ኪሎ ቅቤ በ180 ብር ለመግዛት ለምን እንደሚፈልግ ግራ ያጋባል፡፡ የግብይት ሥርዓታችንን በመለወጥ ቀድሞ የመግዛት ባህል ማዳበር፣ ከወጪ ብቻ ሳይሆን ከትርምስና በጭንቅንቅ ከመግዛት ጭምር ያድናል፡፡ 

እንዲህ ዓይነቱን ልምድ ማዳበር ጥሩ ዕቃ መርጦ ለመግዛትም ያስችላል፡፡ በግርግር ከሚፈጠር አደጋና ከስርቆትም ይጠብቃል፡፡ 

የከብት ግብይት

በዓውደ ዓመት ዋዜማ ከፍተኛ የከብት ገበያ አለ፡፡ የከብት ግብይት ጉዳይ ግን ሥርዓት የያዘ አይደለም፡፡ በተለይ ሸማቾች ከብት ገዝተው የሚያዘዋውሩበት ወይም ወደ መንደራቸው የሚወስዱበት መንገድ ሁሌም አስጊ ነው፡፡ 

በተለይ የአፍሪካ መዲና በምንላት አዲስ አበባ ችግሩ ጐልቶ ይታያል፡፡ አንድ የተገዛ ከብት የሚጓጓዘው በጥቂት ሰዎች እየተነዳ ነው፡፡ ይህ ደግሞ ተሽከርካሪዎችንና መንገደኞችን በሚገባ ለማስተናገድ ባልቻለው የከተማዋ ጐዳና ጭንቅንቁን በእንቅርት ላይ ጆሮ ደግፍ ያደርገዋል፡፡

ለከብት ማጓጓዣ ተብሎ የተለየ መንገድ ባለመኖሩ፣ በዓውደ ዓመት ሰሞን ከብቶች በከተማው ጐዳና ላይ መፈንጨታቸው የትራፊክ እንቅስቃሴው ላይ የበለጠ ችግር ፈጥሯል፡፡ የአደጋ መንስዔም እየሆኑ ነው፡፡ 

በእንዝላልነት በሚነዱ ከብቶች በየጊዜው ጉዳት የሚደርስባቸው የከተማው ነዋሪዎች ቁጥር እየጨመረ መጥቷል፡፡ በከብቶች ተወግቶ የጓጓለትን ዓውደ ዓመት ሳያከብር የቀረ፤ አልጋ ላይ የዋለ ጭምር እናውቃለን፡፡ 

ከዚህ አንፃር የከብቶች ዝውውርን ወግ እንዲኖረው ማድረግ ያስፈልጋል የሚለውን አስተያየት ተቀብሎ ተግባራዊ ማድረግ አልተቻለም፡፡ በከተማ ውስጥ ከብቶች እንዳይዘዋወሩ ወይም የከብት ዝውውሩን ለዚሁ ተብለው በሚዘጋጁ ተሽከርካሪዎች ይደረግ የሚለውን ሐሳብ የተቀበለ ባለመኖሩ፣ በየዓመቱ በእንዝላልነት በሚነዱ ከብቶች ሕይወትና ንብረት እየጠፋ ነው፡፡ ሌላው የከብት ዝውውርን በሚመለከት ሸማቾች ሊያጤኑ የሚገባቸው ጉዳዮች፣ ከብት ለመሸመት አቅራቢያቸው ካለ ገበያ ርቀው መጓዛቸው ነው፡፡ ይህ ልምድ አሁንም ይታያል፡፡ ርቀው ሄደው የመሸመት ልምዳቸውን መግታት ካልቻሉ ደግሞ ያወጡትን ያህል አውጥተው፣ በተሽከርካሪ በማጓጓዝ አደጋውን ለመቀነስ ተባባሪ መሆን ይገባቸዋል፡፡ 

እውነተኛ ቅናሽ

የዓውደ ዓመትን መምጣት ከዋጋ ውድነት ጋር አያይዘን እንመለከታለን፡፡ ሸማቹም ምን አባቱ ዓውደ ዓመት አይደል ብሎ ያልተገባ የዋጋ ጭማሪ የተደረገበትን ምርት ለመግዛት ይደፍራል፡፡ 

የሆነ ሆኖ የዓውደ ዓመት ገበያ የሚገለጽበት ሌላው ጉዳይ ደግሞ በዓሉን ምክንያት በማድረግ የሚዘጋጁ የመዝናኛ፣ የኤግዚቢሽንና ለመሳሰሉት አገልግሎቶች የሚጠየቀው ዋጋ ሰማይ የነካ መሆኑ ነው፡፡ አንዳንድ ምርቶችና አገልግሎቶች ዓውደ ዓመቱን ተንተርሶ ቅናሽ ተደርጐባቸው፤ የማጣሪያ ሽያጭ የማይፈጸምባቸው ለምንድን ነው? 

ቢያንስ አዲስ ዓመት በመጣ ቁጥር ዓመቱን በሙሉ ነጋዴው ከሚሸጥበት ዋጋ ቀንሶ ለአንድ ሳምንት እንኳን ሸማቹን ቢያስብ ምናለ? የምንልበት ጊዜ አለ፡፡ ነገር ግን ይህ ሲሆን አይታይም፡፡ ዓውደ ዓመቱን በማስመልከት ቅናሽ አድርገናል የሚል ማስታወቂያ ያስነገሩ ሳይቀሩ፣ ማስታወቂያቸው የውሸት እየሆነብን እንቸገራለን፡፡ ስለዚህ ቢያንስ በዓመት አንድ ጊዜ እውነተኛ ቅናሽ በማድረግ ሸማቾችንና ተገልጋዮችን በቅናሽ ዋጋ እንዲስተናገዱ የማድረግ ልምድ ቢኖረን ተገቢ ነው፡፡ ስለዚህ ዓውደ ዓመት ዋጋ የሚሰቀልበት ብቻ ሳይሆን በቅናሽ የሚቸበቸብበት እንዲሆን ምሳሌ በመሆንም የምንጠቅሳቸው ድርጅቶች ይኑሩን፡፡