መነሻ ገጽ - ሌሎች አምዶች - ልዩ ልዩ - ይድረስ ለሪፖርተር - የማስመሰያ መድረኮችን ማን ያስቀርልን?
Buy Valtrex Online Buy Albuterol inhaler Online Buy Prinivil Online
07 April 2013 ተጻፈ በ 

የማስመሰያ መድረኮችን ማን ያስቀርልን?

በበዓላት አከባበርና ሕዝባዊ መድረኮች ላይ ብዙኃኑ ተሳታፊዎች ብቻ ሳይሆኑ የመንግሥት ኃላፊዎች፣ የሚዲያ ተወካዮችና እንግዶች የአከባበሩ ዋነኛ ባለቤቶችን ወይም ሥነ ሥርዓቱ የሚካሄድበትን አካባቢ ለመምሰል በአለባበስና በሌሎችም ማንፀባረቂያዎች የሚያደርጉት ጥረት የሚያነጋግር ሆኖ አግኝቼዋለሁ፡፡

በመሠረቱ አንዱ ወገን የሌላውን የአክብሮትና የደስታ ስሜት መጋራቱን ለመግለጽ ባልባሳትም ሆነ በሌላ የወቅቱ ባለጉዳዮች መገለጫ ሊሆን በሚችል መልኩ መሳተፉ መከባበርንና ድጋፍን (ሶሊዳሪቲ) ስለሚያመለክት በጎ አሠራር ነው ሊባል ይችላል፡፡ ለምሳሌ በኪነትና ባህላዊ ዝግጅቶች ወቅት ያንድን ክልል ወይም ማኅበረሰብ ገጽታ ለማሳየት የማደረገው ጥረት ተገቢ ይሆናል፡፡ በአንፃሩ ግን እበዛኞቹ የበዓሉን መንፈስ ወይም በዓሉ የሚመለከተውን ክልል በተሟላ መልኩ ካለማንፀባረቃቸውም በላይ አሠራራቸው እጅግ የተንዛዛ በመሆኑ ለነቀፌታ ይዳረጋሉ፡፡

ለምሳሌ ባለፈው የኢድ አል ፈጥር በዓልን በማስመልከት፣ የፖሊስ ቴሌቪዥን ፕሮግራም ላይ እንስቷ አቅራቢ የለበሰችው የየትኛውን አካባቢ ሙስሊሞች አለባበስ እንደሚወክል ግልጽ አይደለም፡፡ ምናልባት ከሐረሬዎች ጥቂቱን! ለማስመሰል ይሆናል፡፡ ወንዶቹ የፖሊስ ጋዜጠኞች የራሳቸውን የደምብ ልብስ (ዩኒፎርም) ስለለበሱ ጥያቄው አይነሳባቸውም፡፡በሌሎችም የመንግሥት ሚዲያዎች፣ በበዓላት ስም እንዲሁ ሲያደርጉ ማየት የተለመደ ነው፡፡

ነገሩን ሰፋ አድርገን ለመመልከት፣ ከዚህ ባሻገር ያሉ ነጥቦችን ማንሳት ይቻላል፡፡ ለመሆኑ የየሃይማኖቱ አለባበሶች የትኞቹ ናቸው? የሃይማኖት መሪዎችን ወይም የተወሰኑ ወገኖችን እንጂ ተራውን አማኝ ወይም የክልሉን ብዙኅን የማይወክሉ  አለባበሶችና አልባሳት ይዘወተራሉ፡፡ ሃይማኖትን በተመለከተ፣ ሃይማኖቶቹ ከተጀመሩባቸው አካባቢዎች ጋርለማያያዝ ቢሞከር እንኳ ፣ አይሁድ ነኝ የሚለው ሁሉ እንደእስራኤላውያን፣ ክርስቲያኑ እንደ ቤተልሔም ሰዎች፣ (በኋላ ደግሞ ኦርቶዶክሱ እንደግሪኮች፣ ካቶሊኩ እንደሮማውያን፣ ፕሮቴስታንቱ እንደሰሜን አውሮፓውያን)፣ ሙስሊሙ እንደ መካና መዲና ሰዎች ወይም እንደሌሎች ዓረቦች ወዘተ ካልለበስክ ሊባል ነው? ቀደምት ክርስቲያኖችና ሙስሊሞች እንደመኖራቸው በየበዓላቱ ዝግጅት የሚያቀርቡ የሚዲያ ሰዎች፣ በየትኛው የሃይማኖት አለባበስ ሊቀርቡ ነው? በተለይ ሁሉን ወካይ የሆኑት የመንግሥት ሚዲያዎች እንዳሰኛቸው ከሚንጸባርቁት ማንኛውም ወገንተኝነት፣ፖለቲካዊም ጭምር መቆጠብ ይገባቸዋል፡፡ የእነሱ ኃላፊነት ሁሉንም ያለ አድልዎ ማገልገል ነውና!

ሰው እንሚኖርበት አገር፣ ኅብረተሰብና እንደሙያው መስክ ለብሶ የተለያዩ ሃይማኖቶችን ሊከተል ይችላል፡፡ የራሱን ማኅበረሰብ አለባበስ ትቶ በዘወትር እንቅስቃሴው ጭምር በሃይማኖት ይመስሉናል የሚላቸውን ወገኖች አለባበስ በመቅዳት ልዩነትን ለማንፀባረቅ መጨነቅ፣ ከዚህም የተነሳ በውጭ ገጽታ ሌላውን ወገን የማግለል አዝማሚያ የማያስፈልግ አክራሪነት ይሆናል፡፡

ልብሱ ሃይማኖትን አይመለከትም ከተባለም፣  በሃይማኖት በዓል ላይ ብቻ ለምን ይለባሳል? የሚል ጥያቄ ያስነሳል፡፡ ሃይማኖትን ይወክላል ከተባለም የሚዲያ አቅራቢዎቹ ምን ቤት ናቸው? ያሰኛል፡፡ መቼም ለባሾቹ በአጋጣሚ ሙስሊም ሆነው ስላቀረቡ ነው አይባልም፡፡ እንግዲያው ለማስመሰል ጊዜያዊ ሃይማኖተኞች መሆናቸው ማለት ነው? የዚያን ዓይነቱ አስመሳይነት ደግሞ በየሃይማኖቶቹ የተነቀፈ ነው፡፡

ፖለቲካዊና ማኅበራዊ መድረኮች ላይ ስናተኩርም ከዚሁ ያላነሰ፣ በልብስና በቅርፅ የመለየት አባዜ እየተስፋፋ ይታያል፡፡ በፓርቲ ስብሰባዎች፣ በክልል በዓላትና በመሳሰሉት የሚታየው የካኒቴራ፣ የአንገት ልብስ (ስካርፍ)ና የቆብ (ኮፍያ)፣ የሻማና አርቲፊሺያል ችቦ እንዲሁም የኬክ ጋጋታው፣ የሚያስገርም ብቻ ሳይሆን ጤናማ ያልሆነ የማስመሰል መፎካከርያ ሆኗል፡፡ በወጭም ረገድ አባካኝቱ በቀላል የሚገመት አይደለም፡፡ ለነገሩ ይህ አሠራር በተወሰነ መልኩ በደርጉ፣ የኢትዮጵያ ሠራተኞች ፓርቲ (ኢሠፓ) በዓላት አከባበር ወቅት በተለይ፣ በካኪ የደምብ አልባሳቱ ይንፀባረቅ ነበር፡፡  ያኔ ግን ‹‹ቀን በካኪ ማታ ግን በውስኪ›› የሚለውን መሳለቂያ እንዳስከተለባቸው እናስታውሳለን፡፡ አሁን ደግሞ ኢሕአዴግና አጋር ፓርቲዎቹ በዓይነትና በብዛት  አስፋፍተው ተያይዘውታል፡፡

እንግዲህ በተሽቆጠቆጠ ሱፍና ክራቫት ላይ በሴቶቹም ሙሉ ልብስ ላይ፣ እንጥልጥል ካኒቴራ መደረብ፣ በከፍተኛ መድረኮች ላይ የሚታደሙ የክብር ንግግር አድራጊዎች ጭምር የስፖርትና የመስክ ኮፍያዎችን መድፋት፣ በሞቃት አዳራሽ ውስጥ ሳይቀር በአንገት ልብሶችና በጋቢዎች መታፈን፣ ለዕይታም ቢሆን የሚመረጥ አይደለም፡፡ ሲያልፍም ከማስመሰል በላይ ለጤናም የማይበጅና ለአውዶቹ የሚገባቸውን ክብርና ሞገስም የሚነፍግ ይመስለኛል፡፡ ለየት ቢልም በስፖርት፣ በመከላከያ ወይም በፖሊስና በሌሎች በዓላትም ላይ የሚታየው የሰንደቅ ዓላማና የዓርማዎች ጋጋታ አስፈላጊነት አጠያያቂ ነው፡፡ ለምልክትና ለአክብሮት መግለጫ ከሆነ የተወሰነ መጠንና ቁጥር በቂ ሆኖ ሳለ ለከት አልባ ማቴሪያል ማባከን፣ ወጭንም ማብዛት፣ ብርቅና ድንቅ የሆነውን ስሜት ከመቀነስ ባሻገር የሚያስገኘው ፋይዳ አይታየኝም፡፡ እንዲያው ለመሆኑ  በበዓላት ስም የሚግበሰበሱ አልባሳትና ቁሳቁሶች እንደዚህ በገፍ እያመረቱና እየቸበቸቡ የሚጠቀሙት እነማን ይሆኑ? ማለትን እንድንደፍር ያደርገናል፡፡

ይህን ስል ተሰብሳቢዎችም ሆኑ ዘጋቢዎች በየመድረኩ በሱፍ ልብስ ወይም በሌሎች ውድ አልባሳት ይኮፈሱ ለማለትም አይደለም፡፡ እንዲያውም የሕዝብ በተሰበሰበበት ቦታ፣ በተቻለ መጠን እንደየአካባቢው የአየር ሁኔታ ለመሥራት፣ ለመንቀሳቀስና ለመወያየት የሚያመቹ ቀለል ያሉ ልብሶችን፣ ለምሳሌ በሞቃት ቦታዎች በክራቫት አለመታነቅ፤ ይልቁን ጉርድ ሸሚዝ መልበስን ወይም በነጠላ ጫማ መጠቀምን መልመዱ የሚመከር ነው፡፡ ከዚህ ባሻገር በማያስፈልግ ፉክክር የተከበሩ መድረኮችን በቀለማት ማዥጎርጎር፣ ከሰዓታት፣ ቢበዛም ከጥቂት ቀናት ለማያልፍ ሥነ ሥርዓት ብዙ መድከምና ወጭ ማባከን ሊታሰብበት የሚገባ ይመስለኛል፡፡ የተቀላጠፈ አሠራርንና ቁጠባን ማስተማreያ ዘዴውም የሚጀምረው ከዚህ ነው፡፡ በአገራችን በአመዛኙ ‹‹ተከተል አለቃህን . . . ›› በሚል ብሂል እንዳየነው መሆንን ስለምናበዛ፣ በተለይም በሃይማኖቱም ሆነ በማኅበራዊ መስኮች የአመራሩን ቦታ የያዙ ወገኖች መልካም አርአያ ቢሆኑ ጥሩ ነው እላለሁ፡፡

ይበይን ተግባሩ፤ ከአዲስ አበባ  
**  **  **


የኢትዮጵያ ንግድ ባንክ ምላሽ ቢሰጥበት
ባለቤቴና ጓደኞቹ የቀድሞ ሪቬራ ሆቴል ሠራተኞች በነበሩበት ሰዓት በወቅቱ የድርጅቱ ዋና ሥራ አስኪያጅ በነበሩት አሳሳቢነት ለኢትዮጵያና ሕዝቧ ማህተም ብሎም መኩሪያችን ለሆነው ለህዳሴው ግድብ ማሠሪያ የቦንድ ግዥ የአንድ ወር ደመወዛቸውን በዓመት ከፍለው ከጨረሱ ረጅም ጊዜያት ተቆጥሯል፡፡


ይሁንና ሆቴሉ ለመከላከያ ኢንጂነሪንግ ከመሸጡ በፊትም ሆነ ከተሸጠ በኋላ የቦንድ ግዥ ሠርተፍኬቱ ወይም ማስረጃ እንዲሰጣቸው አንጋፋዎቹን የሆቴሉን ሹሞች በተደጋጋሚ ሲጠይቁ የሚሰጣቸው ምላሽ ‹‹ለቡ የሚገኘው የኢትዮጵያ ንግድ ባንክ ቅርንጫፍ የቦንድ ግዥን ሠርተፍኬቱን ለመስጠት የተለያዩ ስንኩል ምክንያቶችን እየሰጡ እንደነበር በኋላም ለመስጠት ፍላጎት እንደሌለው ተገልጾላቸዋል›› ስለሆነም የነዚህ በመቶ የሚቆጠሩ በዝቅተኛ ገቢ የሚተዳደሩ ሠራተኞችን ጥያቄ ጉዳዩ የሚመለከተው የኢትዮጵያ ንግድ ባንክ ምክንያቱን ግልጽ ያደርግ ዘንድ በሪፖርተር ጋዜጣ አማካይነት ለመጠየቅ ወደድኩ፡፡


በነገራችን ላይ ባለቤቴና ጥቂት ጓደኞቼ በአሁኑ ሰዓት በተለያዩ ሌሎች ድርጅቶች ውስጥ እየሠሩ የሚገኙ ሲሆን፣ በግላቸው በየ3 ወሩ የቦንድ ግዥ በመፈጸም እያንዳንዳቸው ከአራት በላይ የቦንድ ግዥ ሠርተፍኬት ተቀብለዋል፡፡
ለህዳሴው ግድብ መሳካት ሁላችንም ሌት ተቀን ተግተን እንሥራ
አወቀ አድገ፣ ከአዲስ አበባ


**  **  **
የአቶ አበራ ገሙን አምላክ አይፈሩምን?
በራሱ በኢሠማኮ (በኢትዮጵያ ሠራተኞች ማኅበር ኮንፌዴሬሽን) በሥሩ በተደራጁ አንዳንድ ፌዴሬሽኖች ውስጥ በሙያቸው ተቀጥረው አገልግሎት በሚሰጡ ሠራተኞች በአስተዳደር ስም በሠራተኞቹ ላይ ከደመወዝ ቅጣት እስከመጨረሻ የጽሑፍ ማስጠንቀቂያ የሚፈጸምባቸው ውርጅብኝ በጣሙን ያሳዝናል፡፡

እንደተረዳሁት ለመብታቸው ማስከበሪያ የመሠረቱትና ያቋቋሙት የሠራተኛ ማኅበር ተመራጮች የሥራ ደረጃቸውንና ደመወዛቸውን ለራሳቸው እያስጠበቁ ከዚያም አልፈው የሥራ ቦታ እዛው ግቢ እያቀያየሩ የፌዴሬሽን ሥልጣን ድረስ እያማረጡ ለሠራተኞቹ ዱላ አቀባይ ሆነውባቸው የበለጠ ችግራቸውን አወሳስቦባቸዋል፡፡ የሌላ ድርጅት ሠራተኞች የመብት ጥሰት ሲገጥመው ቢያንስ ወደነዚህ የሠራተኛ ማኅበራት ሄዶ አቤት ይላል፡፡ የዚህ ግቢ ሠራተኞች ግን አቤት የሚሉበት ቦታ ተቸግረው ሰብዓዊ መብቶቻቸው ጭምር የሠራተኛ ውክልና ባህሪ በሌላቸው አምባገነን ግለሰቦች እየተጣሰ በእነዚህ ግለሰቦች እንደአሠሪዎቻቸው ትባረራላችሁ ጫማችሁን ጨርሳችሁ ትመጣላችሁ እየተባሉ ዛቻና ማስፈራሪያ እየተፈጸመባቸው አድፍጠው ቁጭ ብለዋል፡፡ ምነው ለኢትዮጵያ ሠራተኞች መብትና ጥቅም መከበር ሲሉ ሕይወታቸውን የሰውት የእነ አቶ አበራ ገሙና ጓደኞቻቸው አጽም አይፋረዳቸው ይሆን?


ለማንኛውም ሰሚ ከተገኘ ብዬ እንጂ ይህቺ ደብዳቤ በጋዜጣ ከወጣችበት ጊዜ አንስቶ የግቢው ሠራተኛ በጋራም ይሁን በተናጠል ማስፈራሪያና ዛቻው ብሎም በየምክንያቱ የሚፈጸምበት ሕገወጥ የአስተዳደር ዕርምጃ ከወዲሁ እየታየኝ እግዚአብሔር ጽናቱን እንዲሰጣቸው እፀልያለሁ፡፡
ታዛቢው፣ በኢሠማኮ ግቢ የቢሮ ተከራይ ነኝ