መነሻ ገጽ - ሌሎች አምዶች - ልዩ ልዩ - ይድረስ ለሪፖርተር - ለተከበሩ አቶ በረከት ስምዖን
Buy Valtrex Online Buy Albuterol inhaler Online Buy Prinivil Online
11 August 2013 ተጻፈ በ 

ለተከበሩ አቶ በረከት ስምዖን

የአክብሮት ሰላምታዬን በማስቀደም በአስተዳደር በደል በተቃጠለው ውስጣዊ ስሜቴ ከፍተኛ ግፊት ይህቺ አጭር ማስታወሻዬ ወደ እርሶ ትደርስልኝ ዘንድ እንሆ ወስኜ በይፋ ልኬዋለሁ፡፡

ችግሬን በአጭሩ ለመግለጽ፣ እሠራበት የነበረው መሥሪያ ቤት በፈጸመብኝ የአስተዳርደር በደል ከማስረጃ አንፃር ተመርምሮ ውሳኔ ይሰጠኝ እያልኩ ሳመለክት ቆይቻለሁ፡፡ በመሆኑም ከአወራጃ ጀምሮ እስከ ፌደራል ደረጃ ለሚገኙት የመንግሥት መሥሪያ ቤቶችና ከፍተኛ የመንግሥት ባለሥልጣኖች ደረጃ በደረጃ በ29 ዓመታት ጊዜ ውስጥ 334 ጊዜ አቤቱታ አቅርቤአለሁ፡፡ አቤቱታዬ የቀረበላቸው ክፍሎችም በጥቅሉ ከ80 የማያንሱ የትዕዛዝ ደብዳቤዎችንና ከ100 በላይ የስልክ ትዕዛዞችን፣ የአስተዳደር በደሉን ለፈጸመብኝ ለጅማ ዞን ትምህርት መምርያ ሲያስተላልፉልኝ ቆይተዋል፡፡

ይሁን እንጂ ትዕዛዞቹ ተከብረው አንድም የተሰጠኝ ውሳኔ ባለመኖሩ፣ ለከፍተኛ መጉላላትና ኪሳራ ተዳርጌያለሁ፡፡ ለዚህም ዕውነትና ማስረጃ እያለኝ ጩኸቴ ሰሚና አጣሪ በማጣቱ ብቻ በወቅቱ ውሳኔ ማጣቴ ለዛሬው መከራና ስቃይ ዳርጐኛል፡፡ ስለሆነም በአሁኑ ጊዜ ሕገ መንግሥታዊ መብቶቼን ብቻ ሳይሆን የተፈጥሮ መብቶችንም ጭምር ማለት ይቻላል ተገድቤ ማለቂያ በሌለው ተፅዕኖ ውስጤ እየተቃጠልኩ እገኛለሁ፡፡

በዚህ ዓይነት ሁኔታ የዚህን አቤቱታዬን የመጨረሻ ውጤት ሳላይ መብቴንና ነፃነቴን እንዳጣሁ ብሞት እንኳ በአቤቱታዬ ዕድሜ ልክ 29 ሞቶች እንደተፈጸመብኝ እንጂ እንደ አንድ ሞት ሊቆጠር አይችልም፡፡

ውድ የተከበሩ አቶ በረከት
እስቲ አንድ 25 ዓመታት (ከአቤቱታዬ ዕድሜ ያነሳ ጊዜ) ወደኋላ መለስ ብለን በሐሳብ ብናስታውስ፣ እርስዎ የደርግ መንግሥት በኢትዮጵያ ሕዝብ ላይ ያደርስ የነበረውን የመብት ረገጣ፣ የመልካም አስተዳደር ችግሮችንና ሌሎችንም ጭቆናዎች በመቃወም ከቤተሰብዎ ተለይተው እኔንም ጨምሮ ለኢትዮጵያ ሕዝብ መብትና ነፃነት መከበር ሲሉ በግልዎ የከፈሉትን መስዋትነት በማስታወስ እባክዎን ችግሬን ይረዱልኝ፡፡

ከዚህ በፊትም ከተወነጀልኩበት የሐሰት ክስ በፍርድ ቤት ነፃ ብወጣም ከቢሮክራሲው ሰንሰለት ነፃ መውጣት አልቻልኩም፡፡ ይኸው በሚዲያ በኩል እንኳን ይፋ ሆኖ እርስዎን ጨምሮ ከፍተኛ የመንግሥት ባለሥልጣናትን ዕይታ አግኝቶ ሊጣራና ውሳኔ ሊያገኝ ይችላል በሚል ተስፋ ከፍተኛ ጥረት አድርጌያለሁ፡፡ በመሆኑም ጉዳዩ በአዲስ ዘመን ጋዜጣ ሁለት ጊዜ፣ በዛሬይቱ ኢትዮጵያ ጋዜጣ አንድ ጊዜ፣ በኢዮጵያ ቴሌቪዥን አፋን ኦሮሞ ፕሮግራም አንድ ጊዜ እንዲሁም በሪፖርተር ጋዜጣ አንድ ጊዜ በድምሩ አምስት ጊዜ ለሕዝብ ቀርቦ ለጊዜው አንባቢያን ጉድ ማሰኘት ችሏል፡፡ ሆኖም  ለበለጠ የበቀል ዕርምጃ ከመዳረጉ በስተቀር እንዳሰብኩት የአንድም ባለሥልጣን ዕይታ ውስጥ አልገባልኝም፡፡

ለዚህም ነው እኔ መብትና ነፃነቴን አጥቼ፣ ሕልውናዬና ሞራሌ ተሰብሮ በፍትሕ እጦት አንገቴን ደፍቼ መቅረቴን እርስዎ እንዲያውቁልኝ የፈለኩት፡፡ ስለዚህ ችግሬን  ብዘረዝረው አይደለም በዚህች አጭር ማስታወሻዬ ውስጥ ልጠቀልለው ይቅርና በ200 ገጽ እንኳን አይቋጭልኝም፡፡

በርካታ ጽሑፎችን ቀደም ሲል በተለያየ ጊዜ ለአዲስ ዘመን ጋዜጣ ብልክም ሳይታተሙልኝ ቀርተዋል፡፡  በቅርቡ “በ29 ዓመታት ያልተቋጨ አቤቱታ” በሚል ርዕስና በኋላም በዚሁ ርዕስ ክፍል ሁለት ከበላይ መሥሪያ ቤቶች ካስተላለፉልኝ የትዕዛዝ ደብዳቤዎች ውስጥ የ40 ያህሎቹን ጭብጥ የያዘ 11 ገጽ ሠንጠረዥ በማስረጃነት ለአዲስ ዘመን ጋዜጣ ልኬ አልታተመልኝም፡፡ ስለሆነ የችግሬን ጥልቀት በመረዳት በቀጥታም ሆነ በተዘዋዋሪ መንገድ አንድ ነገር እንደሚያደርጉልኝ እተማመናለሁ፡፡

ነገር ግን አያድርገው እንጂ እንደተለመደው በዚህም ካልተስተካከልኝ ጉዴ ያኔ ነው፡፡ ምን ማድረግ እንዳለብኝ ለጊዜው በትክክል ባላውቅም፣ የዚህ አቤቱታዬ መደምደሚያ ውሳኔ ሁለት አማራጮች ብቻ ይኖሩታል፡፡

1.    መብቴን ለማስከበር ሳቀርብ የቆየሁትን የፍትሕ ጥያቄ ወደ ጎን በማለት ያለአግባብ የተጫነብኝን በደል ሁሉ እንደ አህያ ተሸክሜ በተሰበረ ሞራል መሸማቀቅና ልጆቼንም አሸማቅቄ አንገቴን እንደደፍሁ የልጆቼ ማፈሪያ ሆኜ መኖር፤

2.    ለማይቀር ሞት ብዬ ተቸግሬ ያስተማርኳቸው ልጆቼን ሞራል እየጎዳሁ አሳፋሪ ሕይወት ከመኖር፣ አልፎ አልፎ ሌሎች ለመብታቸው ብሎም ለክብራቸውና ለሕልውናቸው ሲሉ እንሚያደርጉት ሁሉ ማድረግ፡፡ እኔ ለሌሎች ክብር ስል ከፍተኛ የአስተዳደር በደል በፈጸመብኝና ዛሬም የጅማ ዞን ቴክኒክና ሙያ ማሠልጠኛ ኮሌጅ እያደረሰብኝ ላለው በደል በቀድሞ ጅማ ዞን ትምህርት መምርያ ወይም የበላይ መሥሪያ ቤቶችን ትዕዛዝ ተግባራዊ ባላደረገው በዞኑ ትምህርት መምርያ ላይ ወሳኝ ዕርምጃ መውሰድ እየቻለ በደብዳቤ መጻጻፍ ብቻ ተወስኖ ለከፍተኛ መጉላላትና ኪሳራ ባደረሰብኝ በትምህርት ሚኒስቴር ዋና መሥሪያ ቤት በር ላይ ሰውነቴ ላይ ቤንዚን አርከፍክፌ ራሴ ማቃጠል እንዳለብኝ ይሰማኛል፡፡ ይህንን አሳፋሪ አቤቱታዬን ለአንዴና ለመጨረሻ ጊዜ በሞት ከመደምደም በስተቀር ሌላ ምንም ዓይነት አማራጭ እንደማይቀረኝ ክቡርነትዎ ሊገነዘቡልኝና ጉዳዩ ተጣርቶ (ተመርምሮ) ለመጨረሻ ውሳኔ እንዲበቃልኝ ሊያደርጉልኝ ይገባል፡፡


ስለዚህ እርስዎ በትግል ሜዳ በነበሩበት ጊዜ አስተማማኙን የመከላከያ ሠራዊት እየመሩ ከፍተኛ መስዋዕትነት የከፈሉበት ዓላማ ውጤቱ ባያምር ኖሮ ምን ይሰማዎ እንደነበር አስበው፣ የእኔም ችግር ምንም እንኳን ከአገር ጉዳይ ጋር የማይመሳሰል ተራ ጉዳይ ቢሆንም መነሻው (ምንጩ) በመንግሥት ጥቅምና በጥቂት ግለሰቦች የግል ጥቅም መካከል የተፈጠረ ተራ ተንኮል በወቅቱ ተገቢውን ውሳኔ (ምላሽ) በማጣቱ ብቻ አድጎ ለዚህ ደረጃ አድርሶኛል፡፡ እኔው  ተበድዬ ውሳኔ  በማጣቴ ከዛሬ ነገ ከዘንድሮ መጪው ዓመት ውሳኔ አገኛለሁ እያልኩ በየመሥሪያ ቤቱ ስንከራተት ይኸው 29 ዓመታት ቢያልፉም ያለ ውጤት ስቀር ምን ሊሰማኝ እንደሚችል ይገምቱልኝ! ከዚያም በተፅዕኖ ምክንያት አዕምሮዬ ዕረፍት አጥቶ ተጨንቄ ምንም ሌላ አማራጭ በማጣቴ የደረሰኩበትን ውሳኔ ተገንዝበውልኝ፣ ይህ አቤቱታዬ በትኩረት ተመርምሮና ተጣርቶ ለ29 ዓመቱ ጥያቄዬ ምላሽ ቢሰጡኝ እላለሁ፡፡ በቀጣይም መፍትሔ አግኝቼ አዕምሮዬ ስለ አቤቱታ ብቻ ከማሰብ ነፃ በመውጣት በቀረችኝ ጊዜ ስለ ሥራ ማሰብ እንድችል ያደርጉኝ፡፡ ለኢትዮጵያ ሕዝብ ነፃነትና መብት መከበር ሲታገሉ ከአጠገብዎ ወድቀው፣ ታሪክ ሠርተውና የአሞራ ሲሳይ ሆነው በተለዩዎት ገሞራውና ቀሺ ገብሩን ጨምሮ በአጠቃላይ በደርግ ጦር ሰማዕታት አጽም እጅግ አድርጌ እማፀንወታለሁ፡፡
ዘላለማዊ ክብር ለሰማዕታት ፍትሐዊ ውሳኔ ወይም ሞት!
(ዲሮ ድሪባ፣ ከጅማ)

የሙስሊሞቹ ጉዳይ ወዴት እያመራ ነው?
ባለፈው ሰሞን በኦሮሚያ ክልል ውስጥ በእስልምና እምነት ተከታዮችና በፀጥታ አስከባሪዎች መካከል በተፈጠረው ግጭት የሰው ሕይወት  ከማለፉም ባሻገር በርካቶች ላይ ጉዳት መድርሱን ሰምተናል፡፡ ክልሉ እንዳስታወቀውም ግጭቱ የተከሰተው አክራሪዎች ተደራጅተው ኹከት በመቀስቀሳቸው ነው፡፡ ኹከቱንም  ተከትሎ የፀጥታ አስከባሪዎች ሁኔታውን ለማረጋጋት ባደረጉት ሙከራ  በተነሳው ግጭት ክቡር የሆነው የሰው  ሕይወት ማለፉ በጣም አሳዝኖኛል፡፡ ይህንኑ ደብዳቤ እንድጽፍ ያነሳሳኝ ብቸኛ ምክንያት ይሄው ነው፡፡

አሁን ጉዳዩ እየተካረረ ሄዶ ባሳለፍነው የኢድ አል ፈጥር በዓል ላይም ተመሳሳይ ችግር ታይቷል፡፡ ከወር በላይ የፆሙ የእምነቱ ተከታዮች በአዲስ አበባ ብሔራዊ ስታዲየም የስግደት ሥርዓት በማድረግ ፆሙን እንደሚፈቱት ይታወቃል፡፡ ሆኖም በዕለቱ በፀጥታ አስከባሪዎችና በእምነቱ ተከታዮች በተፈጠረው ግጭት በሰዎች ላይ ጉዳት መድረሱን ሰምነተናል፡፡ ስለዚህ ይህ ጉዳይ በቶሎ መፍትሔ ካላገኘ ለሁላችንም አስቸጋሪ ሁኔታ መፍጠሩ አይቀሬ ነው፡፡

ምንም እንኳን  መንግሥት በሃይማኖት ጉዳዮች ጣልቃ መግባት እንደሌለበት በሕገ መንግሥታችን ቢደነገግም፣ መንግሥት ሕዝብንና አገርን ለመጠበቅ የሚሠራ አካል መሆኑ መዘንጋት የለበትም፡፡ መንግሥት ይህን ያህል በጉዳዩ ላይ መወጠሩ በአክራሪነት በምትታመሰው ዓለማችን የሚታዩትን አደገኛ ተግባሮች ወደ አገራችን ሰተት ብለው እንዳይገቡ ለመግታት በማሰብ መሆኑ ሊታወቅ ይገባል፡፡

ጥያቄ አለን የሚሉ ወገኖችም ጥያቄያቸውንም አግባብ በሆነ መልኩ በማቅረብ መፍትሔ ማፈላለግ ያዋጣል እንጂ ነገርን ማባባስ ለማንም አይጠቅምም፡፡ መታወቅ ያለበት ነገር ደግሞ ማንም ሰው የግል ሃይማኖቱን ለማራመድ ሰላማዊ አገር መኖሯ ወሳኝ መሆኑ ነው፡፡ ነገር ግን ለአንድ ሃይማኖት ጥያቄ ምላሽ ያስገኛል በማለት የአገርን ሰላም ማወክ ማንንም አትራፊ አያደርግም፡፡

ከዚህ በተጨማሪ በአገራችን ከፍተኛ የእምነት ተከታዮች ባሉበት የኦርቶዶክስ እምነት እንኳን ተመሳሳይ ጥያቄ ሲነሳ ይደመጣል፡፡ በተለይ ቀድሞ የነበሩት የእምነት  ተቋሙ መሪ በእምነቱ ተከታዮች ብዙም ዕውቅና ባይኖራቸውም፣ የእምነቱ ተከታዮች ያንን በመቃወም የአገሪቱን ሰላም ሲያውኩ አይስተዋልም ነበር፡፡ ምክንያቱም ሃይማኖት ማንኛውም ሰው በግሉ ከአምላኩ ጋር በሚያደርገው ግንኙነት የሚወሰን ነገር በመሆኑ ነው፡፡ ታዲያ የአሁኑ የሙስሊሞች ጥያቄ ከኋላው ያዘለው ሕዝብንና አገርን የሚጐዳ ነገር ላለመኖሩ ማስረጃ ሊኖር ይገባል፡፡

ከዚህም ባሻገር በሰሞነኛው የሙስሊሞች ጥያቄ ላይ ያስተዋልኩት ክስተት አለ፡፡ የአገሪቱ የፖለቲካ ጨዋታ ጦፎ በነበረበት የምርጫ 97 ወቅት በኅብረተሰቡ ዘንድ የነበረው መነቃቃት አይረሳም፡፡ ሆኖም በወቅቱ የምርጫ 97 ተቃዋሚ የነበሩት የፖለቲካ ፓርቲዎች ኃላፊዎች የእስር እጣ ፋንታ ገጥሟቸው ነበር፡፡ የበርካቶችን ቀልብ ስበው የነበሩት የፖለቲካ መሪዎች ታስረው በነበረበት በዚያ ወቅት እንኳን ኅብረተሰቡ የተለያዩ ተቃውሞችን ቢያሰማም፣ የብዙዎችን ቀልብ የሳበ ነበር ማለት ያስቸግራል፡፡ ይህን ጉዳይ ያነሳሁት ጥያቄ አለን በማለት በርካታ ዓርቦች ላይ ተቃውሟቸውን የሚያሰሙት ግለሰቦች አደረጃጀት ስለሚያስገርም ነው፡፡ ከፍተኛ የሆነ ቅንጅት የሚታይባቸው እነዚህ የዓርብ ተቃውሞች የገንዘብ ድጋፋቸውም አጠያያቂ ነው፡፡ ከሁለት ዓመት በላይ እነዚህ ተቃውሞችን ሳይቋረጡ እንዲካሄዱ የተደረገበት የገንዘብ ምንጭ ሊጠየቅም ይገባል፡፡

ስለሆነም ዓለማችን በአክራሪነት አስተምህሮት እየታመሰች ባለችበት በዚህ ወቅት ወደ እኛ አገርም ይህ ልምድ እንዳይገባ መጠንቀቁ ተገቢ ነው፡፡ የእምነቱ ተከታዮችም የሚጠይቁት ጥያቄ ይህን ያህል መስዋት የሚያስከፍል ስለመሆኑ ቆም ብለው ሊያስቡ ይገባል፡፡ መንግሥትም የቆመው ሕግ የሚያስከብሩትን ሊጠቅም፣ ሕግን የሚጋፉትን ደግሞ ሊቀጣ መሆኑን ሊሰመርበት ይገባል፡፡ ነገር ግን መንግሥትም ቢሆን ሕዝብን የማገልገል ግዴታ ስላለበት፣ ለሙስሊሞቹ ጥያቄ ምላሽ የመስጠት ግዴታ አለበት፡፡
(አቤል፣ ከአዲስ አበባ)