መነሻ ገጽ - ሌሎች አምዶች - ልዩ ልዩ - ታክሲ - በጅምላ መነዳት አያዋጣም
Buy Valtrex Online Buy Albuterol inhaler Online Buy Prinivil Online
21 August 2013 ተጻፈ በ 

በጅምላ መነዳት አያዋጣም

እነሆ ጉዞ ከመብራት ኃይል ወደ ቦሌ። ‹‹ተረኛ ይኼው›› እያለ ወያላው ወደሚጠቁመን ታክሲ እንጋጋለን። ገብተን አረፍ ከማለታችን ቡሄ ጨፋሪዎች መግቢያውን አጨናነቁት።

ሾፌሩ ‹‹ኑ በእኔ በኩል ጨፍሩ ሰው አትከልክሉብኝ፤›› ሲል ወደ ራሱ ጠራቸው። ወደ እሱ ሄዱ። ‹‹በሉ ጨፍሩ፤›› አላቸው ኪሱን እየደባበሰ። ጀመሩ፣ ‹ሆያ ሆዬ ጉዴ ብሯን ብሯን ይላል ሆዴ፣ ሆያ ሆዬ ጉዴ ብሯን ብሯን ይላል ሆዴ፤›› ብለው ቁልጭ ቁልጭ። ‹‹በቃ?›› ይጠይቃል በጣም ተገርሞ። ‹‹ኧረ አለ!›› ብለው ሲያበቁ ደግመው ‘ብሯን ብሯን’ አሉት። ሾፌሩ የመገረሙን ያህል ንዴት ሳይዘው፣ ‹‹ወይ ስምንተኛው ሺሕ ‘አንደኛችንን ዘረፋ ነው የመጣነው’ አትሉም? ጉድ ነው እኮ እናንተ!›› ይላል ወደ ኋላ ዞር እያለ ወያላውን በዓይኑ እየፈለገ። ‹‹በራፕና በሂፕሆፕ ጆሯቸውን ሲያደነቁሩ እየዋሉ የት የሚያውቁትን ሆያ ሆዬ ነው አሁን እንዲጨፍሩ የምትጠብቁት?›› ስትል አንዷ አጠገቧ ያለች ጓደኛዋ ደግሞ፣ ‹‹ተጠያቂዎቹ እኛ ነና! እነሱ ምን ያድርጉ?›› ትላታለች። ‹‹የኢትዮጵያ ታሪክ ከመቶ ዓመት የሚዘል አይደለም በሚሉት ሲገርመን የቡሄን ጭፈራ የማያውቅ ትውልድ እንይ ደግሞ? እግዚኦ አንቺ አገር?!›› ይላሉ አንድ ጠና ያሉ ሰው።  

‹‹እናንተን እኮ ነው! ወይ ጨፍሩ ወይ ከዓይኔ ጥፉ?›› ይላል ሾፌሩ በምሬት። ይህን ተናግሮ ሳያበቃ መሀላቸው አንዲት የምታምር ሴት ልጅ መኖሯን አይቶ፣ ‹‹ቡሄ እኮ የወንዶች ነው፡፡ አንቺ ደግሞ ምን ትሠሪያለሽ?›› ሲል ከአፉ ነጥቃ፣ ‹‹ምን ትሠሪያለሽ? ዘመኑ እኮ የእኩልነት ነው። ሴቶች ወንዶች የሚያደርጉትን ሁሉ ማድረግ ይችላሉ፤›› ብላ ተንጣጣችበት። ተሳፋሪዎች ይስቃሉ። ሾፌሩ ግራ ገብቶታል። ‹‹አሹፉበት ብሎ የላካችሁ ሰው አለ እንዴ?›› ብሎ የምሩን ዙሪያውን ወደ ውጭ ማማተር ጀመረ። ‹‹እሺ! እንደገና የጨፈርንበትን ስጠንና ሌላ እንልልሃለን፤›› ሲለው ከመሀላቸው አንደኛው ልጅ፣ ‹‹ቡሄ ‘በአድቫንስ?’ ተጀመረ?›› ብሎ ስቆ አሳቀን።

‹‹ለምን አትሰጠንም! ጊዜው እኮ እየሮጠ ነው፤›› አለው በቁመትም በአካልም ከሌሎቹ ገዘፍ ያለው። ወዲያው ሌሎቹ እንደምንም አምጠው ይህቺን ግጥም ለባለታክሲው ገጠሙለት። ‹‹እዚያ ማዶ አንድ ብርቱካን እዚህ ማዶ ሌላ ብርቱካን የዛሬ ዓመት ባለአውሮፕላን፤›› ያለ ማሳረጊያ ዜማ ቃናውን አሳጥተው ጨፍረው ሳያበቁ ሾፌራችን አምስት ብር አውጥቶ ሰጠና ሸኛቸው። ‹‹ወይ ጊዜ! ትንሽ ትልቁ ለገንዘብ እንዲህ መሆን ከጀመረ…›› ብሎ ሳይጨርሰው ወያላውን ፍለጋ በዓይኑ ወዲያ ወዲህ ማለት ጀመረ። ከአፍ የቀደመ ሆኖ ነገሩ ሁሉ ምኑ ይጨረሳል አሁን ይኼ እባካችሁ?!

ጉዞው ተጀምሯል። ወያላው በየመንገዱ፣ ‹‹ግቡ ውኃ ልማትም ይሄዳል፤›› እያለ ሦስት ወጣቶችን ያባብላል። ‹‹ቦሌዎችን ጠበቅ አድርግ እንጂ ምን ሆኗል ይኼ? ዋናው የቦሌ ሰው ነው፤›› ብሎ ሾፌሩ ምክር አስመስሎ ለወያላው ውስጠ ወይራ ንግግር ይናገራል። ተሳፋሪዎች ፈገግ እያሉ ተደርበው ለሚቀመጡ ትርፍ ተሳፋሪዎች ይሸጋሸጋሉ። ‹‹ይኼ ሰውዬ የወያላነት ፍቅሩን ሳይጨርስ ነው ሾፌር የሆነው ማለት ነው? ምናለበት በሰው ሥራ ጥልቅ ባይል? የገዛ ኃላፊነታቸውን ሳይወጡ በሰው ኃላፊነት ጥልቅ የሚሉ አልበዙባችሁም?›› ይላል አንዱ ሾፌሩ ሲቁነጠነጥ እያየው። በዚህ መሀል አንድ መንገደኛ፣ ‹‹ቦሌ?›› ብሎ ጠየቀ። ሾፌሩ፣ ‹‹ግባ አሜሪካም ይሄዳል አንተ ካልክ!›› ብሎ አዲስ የጨዋታ ርዕስ ቀሰቀሰ።

‹‹እንዴት ነው እባክህ? አሜሪካ እንዲህ እንደ ቀልድ በታክሲ መብረር ተጀመረ እንዴ?›› ሲል ከኋላ መቀመጫ ያለ ወጣት ፀጉሩን እያፍተለተለ ጠየቀ። ‹‹ታዲያስ! ሰው በእግሩ እየገባ አይደለም እንዴ እንኳን በታክሲ?›› ብሎ ሾፌሩ ሳቀ። ‹‹ኧረ እውነትህን ነው! ዘንድሮ በዕድልም በግድም ሄደ ሲባል የማንሰማው የለም። የሕገወጥ ስደቱ ዜና ከልማት ዜናዎች ቀጥሎ ቁጥሩ በዝቷል። ዜናው ሁሉ እከሌ እኮ ‘ስቴት’ ገባ ሆኗል፤›› ስትል ከሾፌሩ ጀርባ የተቀመጠች፣ ‹‹በዚህ ዓይነት የሚቀር ያለ አይመስለኝም። የሚሻለው ግን…›› ብሎ ሳይጨርሰው ከልጅቷ አጠገብ የተቀመጠ ጎልማሳ በእንጥልጥል ተወው። ‹‹የሚሻለው ምን?›› በማለት አንዱ የመፍትሔ ሐሳብ ፈላጊ የሚመስለው ጠየቀው። ‹‹የሚሻለው መንግሥት እንደቤቱ ሁሉ የቲኬትና የኮቴ የምንከፍለውን እየቆጠብን እንድናጠራቅም መርዳት አለበት፤›› ብሎ አረፈው። ‹‹ወይ እናት ኢትዮጵያ! እንኳንም አልሰማሽ የምትባይውን?›› ሲል ከኋላ መቀመጫ፣ ‹‹የት ሄዳ ነው የማትሰማው ደግሞ?›› ብለን ጠይቅነው። መልሱን መገመት ስንችል መጠየቃችን በኋላ ቆጨን እንጂ፡፡ 

መሀል መቀመጫ ሦስት ተጠጋግተው የተቀመጡ ወጣቶች ጨዋታ ታክሲዋን ተቆጣጠሯት። ‹‹አንተ ግን በምን ፍጥነት ከመርካቶ እዚህ ድረስ መጣህ? የታክሲን ችግር የምናማርረው ውሸት ነው ማለት ነው?›› ይለዋል። ‹‹ኧረ በፈጠረህ ቀጭ ቀጭ እናድርግ ስትሉኝ ክንፍ አውጥቼ ነው እንጂ ደግሞ የትራንስፖርት ነገር ይወራል እንዴ?›› ሲል ይመልሳል። ‹‹ይኼኔ ለሥራ ቢሉህ የሚያደናቅፍ መቀነት ብዛቱ?›› ሲል ሦስተኛው ያሾፍባታል። ‹‹ከማውራት የበለጠ አሁን እዚህ አገር ሥራ አለ ነው የምትለኝ? ሁሉም ማውራት ትቶ ዝም ብሎ ቢሠራ የለመደችው ሲቀርባት አገራችን እንዴት ሊከፋት እንደሚችል ትንሽ አታስብም? እንዲያው በፈጠረህ ወሬ ነው እንጂ ቀጥ አድርጎ ይዞን ያለው የትኛው የተደላደለ ሥራችን ይዞን ነው?›› ሲል ኮስተር ብሎ የተሾፈበት ይመልሳል።

ተሳፋሪዎች አንገታቸውን እያወዛወዙ ይስቃሉ። አኳኋናቸው ሁሉ የሚመስጥ ነው። ወያላው ድንገት ወደ እነሱ ዞር አለና፣ ‹‹እሺ ሒሳብ፤›› አላቸው። ሁለቱ እንደተማረከ ወታደር እጆቻቸውን ከፍ አድርገው ወደ ሦስተኛው ጓደኛቸው ጠቆሙ። ወያላው እየሳቀ የሦስት ሰው ሒሳብ ሲቀበል፣ ‹‹በነካ እጅህ ለሁለት ወር ቁጠባ የምትሆን ጣል ብታደርግልን ደግሞ ሌላ አናስቸግርም ነበር፤›› ብሎ ‹ወሬ ነው ቀጥ አድርጎ የያዘን› ባዩ የሚከፍለውን ጓደኛውን ይለማመጣል። ተሳፋሪዎች በእነዚህ ብላቴናዎች ሕይወት ቀዳዳ የትውልዱን አቅጣጫና ሕይወት የሚመረምሩ ይመስል ፀጥ ብለው ያዳምጣሉ። ለግምትም ሆነ ለመተንበይ የሚያስቸግር ጊዜ ከፊቱ እየታየው አንገቱን የማይነቀንቅ ከሦስቱ በስተቀር ማንም አልነበረም። የነገን ማሰብ ስንጀምር የዛሬ እያመለጠን ተቸገርን እንጂ የሚያሳስብ ነገር መብዛቱ አያስገርምም፡፡ 

‹‹ወራጅ›› አሉ አፍታ እንደሄድን ሦስቱ ወንድማማች መሳይ ወጣቶች። ታክሲያችን እነሱን ለማውረድ ውኃ ልማት አካባቢ ቆማለች። ወርደው ውስጥ ለውስጥ ጥቂት እንደተጓዙ ከዓይናችን ጠፉ። ሾፌሩ፣ ‹‹ኧረ ሊገጨኝ ነው እያየህ በለው፤›› ይላል ከፊታችን ወደኋላ የሚሽከረከር ላዳ ታክሲን እየጠቆመ። ‹‹ሕግ የሚባል የለም በቃ?›› ይላል ከሾፌሩ አጠገብ የተቀመጠው ጎልማሳ። ‹‹እስኪ ሂድና አገር የሚያስተዳድረውን ጠይቅልን ወንድሜ?›› ይመልሳል በነገር አጣፍጦ በመሀል ወንበር የተቀመጠው። ሾፌሩ፣ ‹‹ምናለ ‘ስፖኬውን’ ቢያቃናውና የኋላውን ቢያይበት? ንገረው እስኪ! የዘንድሮ ሰው የኋላን ማየት የሚባል ነገር ጠልቷል፤›› ይላል። ‹‹ህም ኧረ በጣም! የኋላውን ማየት ጠልቷል ብቻ?›› ትላለች ወይዘሮዋ አባባሏን እንደ ማስቲካ እያላመጠች።

‹‹እነሱ ነፍስ ካወቁ በኋላ ያለውን እንጂ ከዚያ በፊት ያለውን ታሪክ በጭራሽ የሚሉ በዝተዋል። ‘ስፖኬያቸውን’ ሰብረው ልቦናቸውን አሳውረው የአገርን ሕልውና ካስማውን ነቅሎ ለመጣል የሚመኙ በጣም ነው የበዙት፤›› ትላለች እየቆየች። ላዳ ታክሲው በፈጠረው የመንገድ መጨናነቅ በተፈጠረው ትዕይንት ተሰርቀናል። ወያላው ከኋላ መቀመጫ አዳዲስ ከጫናቸው ተሳፋሪዎች ጋር ሲጨቃጨቅ ይሰማል። ‹‹ለምን አትጠጉም? ከኋላ እኮ አራት ነው፤›› ይላል እየደጋገመ። እያጉረመረሙ ያልሰሙ መስለው ሳይመልሱለት ዝም። ሾፌሩ ነገር እንዳያመልጠው የማለ ይመስላል፡፡ ‹‹ኧረ በሕገ መንግሥቱ ይዣችኋለሁ በላቸው፡፡ አይ ካሉ ‘አሸባሪዎች’ ናቸው ብለህ ማውረድ ነው፤›› እያለ ሰውን ያዝናናዋል። ወዲያው ዞር ስንል አንጠጋም ያሉት ተሳፋሪዎች አራተኛውን ተሳፋሪ ከመሀላቸው አስቀምጠውታል። ‹‹ወይ ‘ቴረሪዝም?’ የሰማውን እንዲህ ልኩን ሲያስገባው አልሰማ ያለውን ከርቸሌ ይከተዋል! ምናለበት አሠላለፍ መሆን ቢችልና ዋንጫ የናፈቀውን ‘አርሴን’ ድል በድል ቢያደርግልን?›› ሲል ጎልማሳው፣ ‹‹እንዲያ በል አንተ!›› እያለ የ‹ማንቼ› ደጋፊ ያቅራራል። ምኞት አይከለከልም እያለ ሌላው አደብ ገዝቷል!

 ቀለበት መንገዱ ጨርቅ የሆነላት ታክሲያችን መንገዱ አካፋይ ላይ ትንሽ ካስደነገጠን ከፍተኛ መጠን ያለው የውኃ መታቆር በቀር የማታልፈው እክል አልነበረባትም። ‹‹ይገርማል መሥራት ባንችል እንኳ የተሠራውን በወጉ መያዝ ያቅተናል ሰዎች?›› ሲል ጎልማሳው ይጠይቃል። ‹‹አልጄዚራን ነበር መጥራት›› ይላል ከኋላ ፀጉሩን የሚያፍተለትለው ወጣት። ‹‹ኢቲቪማ የልማት ዜናው ጎርፍ አልጎድልለት ብሎ እንዲህ ያለውን ያያል?›› ሲል ቀጠለ። ‹‹ታዲያስ! አሁን ደግሞ የሟቹ ጠቅላይ ሚኒስትር ሙት ዓመት ደረሰ መስሚያ የሚባል የለውም፤›› ይላል ከጎኑ የተቀመጠ። ‹‹በታሪክ ለመጀመሪያ ጊዜ ነው የሚሆነው አይደል?›› ትላለች ወጣቷ። ‹‹ምኑ?›› ይጠይቃታል ጎልማሳው። ‹‹ሙት ዓመት በቴሌቪዢን ሲከበር ማየት ነዋ!›› ትላለች ፈጠን ብላ። ‹‹እ!›› ብሎ ነገር ይበላል ሌላው።

‹‹ለመሆኑ ራዕያቸውን ለማስፈጸም ቃል ከገባው የተሳካለት ስንቱ ይሆን?›› ሲል ሦስተኛ ወንበር ላይ አንዱ ጠየቀ። ‹‹ከተተኪያቸው ሌላ ማን እንደገባው ቃልና እንደተናገረው ተሳካለት ልጄ?›› ወይዘሮዋ ነበረች የምትመልሰው። በዚህ መሀል ዝም ብለው ሲያዳምጡ የነበሩ አዛውንት፣ ‹‹አልሰማችሁም ‹ቃል የዕምነት ዕዳ እንጂ የአባትና የእናት ዕዳ አይደለም› እንደሚባል? ዋጋ መክፈል ያለብን ለዕምነታችን እንጂ ሌላውን ደስ እንዲለው መሆን የለበትም፡፡ በጅምላ ከመነዳት ነፃ የምንሆነው የዕምነታችን ባለቤት መሆን ስንችል ነው፡፡ ስንወድ በጅምላ ስንጠላ በጅምላ ከሆነ የራሳችን መለያ የለንም ማለት ነው፡፡ ስለዚህ ከምንም ነገር በፊት የራስ ዓርማ ይቅደም፤›› አሉን፡፡

ከመሀል ወንበር ላይ የተቀመጠው፣ ‹‹አዩ አባታችን የራስን ዓርማ ከማውለብለብና ዕምነትን ከማንፀባረቅ ይልቅ የሌሎችን ሕልም በይሉኝታ መሸከም ለምዶብናል፡፡ ትርጉሙን የማናውቀውን መፈክር ተሸክመን ለማናምንበት ዓላማ ሠልፍ እንወጣለን፡፡ ያልገባንን ዓላማ እናስፈጽማለን ብለን ግራ ተጋብተን ግራ እናጋባለን፡፡ የቸገረ ጊዜ ውስጥ ነው ያለነው፤›› አለ፡፡ ብራስን አልፈን ቦሌ ድልድይ ውስጥ ስንገባ ሾፌሩ ‹‹አውርድ›› ብሎ ታክሲዋን አቆማት። ወያላችን ‹‹መጨረሻ›› ሲል ጎልማሳው ‹‹ጊዜው ይለዋወጣል። አዲስ አመለካከትና አዲስ ሐሳብ ያሻናል፤ እንደሰማነው የራሳችን ዓርማ ከምንም ነገር ሊቀድም ይገባል፤ የራሱ ዓርማ የሌለው መለያ የለውም፡፡ ስለዚህ እንደተባለው በጅምላ መነዳት አያዋጣም፤›› ብሎ ቀድሞን ወረደ። እኛም እንደተከዝን ትርምሱን ቀስ በቀስ ተቀላቀልን። መልካም ጉዞ!