መነሻ ገጽ - ሌሎች አምዶች - ማህበራዊ ጉዳዮች - ደላላው - ዓይንና ልብ ሲራራቁ
Buy Valtrex Online Buy Albuterol inhaler Online Buy Prinivil Online

ሰላም! ሰላም! ‹‹የሰው ፍቅር ይስጥህ›› ይላሉ ባሻዬ ሲመርቁ። እንዴት ያለ ምርቃት መሰላችሁ? ችግሩ የዚህ አገር ሰው ሲሞቱ እንጂ ሲኖሩ፣ ሲያጡ እንጂ ሲያገኙ አያፈቅርም።

‹‹ከበጣም መጥፎ፣ መጥፎ ይሻላል›› ያሉት የቀድሞው ጠቅላይ ሚኒስትር ነበሩ፡፡ በፊት በቁም ሳሉ እንደነገሩ የነበረው ሁሉ ይኼው ካረፉ በኋላ ዓመት ሙሉ ሲያነሳቸው ከረመ። አያሳየን የለ! መቼም እየኖሩ ከመረሳት ሞቶ መታወስ እንዴት እንደሚሻል ዛሬ ቁሙ ያለን የነገ አፈሮች እያየን ነው። ታዲያ ምን አለበት ከመቃብር በላይ ለሚውል ስምና ታሪክ ዛሬ ብንተጋ? ኧረ ምንም የለበት። እንዲያው ግን ጥሎበት የሃያ አንደኛው ክፍለ ዘመን ሠለጠንኩ ባዩ የሰው ልጅ መኮፈስና ለራስ ጥቅም መሯሯጥ ብቻ እንጂ ለሌላው ወገኑ መኖር ጠልቷል። እኔንም ጨምሮ ነው የምላችሁ እኮ! አቤት! አቤት! ፍቅርና መተሳሰብ እንደ ጥላቻና በቀል በቅስቀሳ መነሳሳት ቢችሉ ኖሮ፣ ዓለም ምን ትመስል ነበር? ፍቅር በትግል እንደማይሆን ተረድቶ የተቸገረ አዝማሪ ምን አለ መሰላችሁ? ‹‹ሴት ልጅ ካልወደደች ቋንጣ አትበጥስም!›› (ቀና ብላ ማየቱንማ እርሱት ነው እኮ) ‹‹ውደደኝ ተብሎ ሰው አይገደድም እውነታው ይገዳል ግን አያስገርምም፤›› ያለችው ድምፀ መረዋ ሳትረሳ። ፍቅር እንዲህ ጭንቅ የሆነበት ዘመን፡፡     

ታዲያ መወደድና መከበር ለታደለ ይኼው ከሕዝብ ልብ ሳይጠፋ ዘወትር ሲኖር መታዘብ ይቻላል።  አታዩም እንዴ  ለምናከብራቸውና ለምንወዳቸው እንዴት እንደምንሆን? በእንዲህ ያለው ሰሞን ደግሞ ጨዋታና አሉባልታው ይገሽብና አንዱን ሰምታችሁ ሳትጨርሱ አንዱ ይጀመርላችኋል። ‹‹እንኳንስ ዘንቦብሽ›› ነዋ የእኛ ነገር። እና አንዱ ምን አለኝ መሰላችሁ? ‹‹በጣም የሚገርመኝ ኢትዮጵያን የምታክል አገር የወላድ መካን ትመስል በሙት መንፈስ ስትገዛ ማየት በጣም ያናድዳል፤›› ሲለኝ፣ አባባሉ በጣም ቢያናድደኝ፣ ‹‹እንዴት እንዲህ ትላለህ? ታላቁ መሪ የሠሩዋቸው ሥራዎች ከዚህ በላይ ቢያስመሰግኗቸውም ይገርማል?›› ብዬ አፋጠጥኩት። አንዳንዱ ሰው አስተያየቱና ፍርዱ አያበሳጭም? ሲሉ ሰምቶ የሚያናፍሰው፣ ሌሎች የተናገሩትን ሸምድዶ የሚያሳጣ እኮ ነው አገሩን የሞላው። ጉድ እኮ ነው! ኋላ ምን ይለኛል? ‹‹አይ አንበርብር ለጊዜው እኮ የታላቁን መሪ ራዕይ ለማስፈጸም የሚፎክረው በቂ ነበር። አነሰን አላሉህ ምን እንዲህ ያውረገርግሃል?›› ብሎ የባሰ አንተከተከኝ። ‹‹ወትሮም እኔ ነኝ ሥራዬን ትቼ ካንተ ጋር የምዳረቅ›› ብዬ ፈቀቅ አልኩ። ቆይቼ ሳስበው ግን የተሳሳትኩት እኔ ነኝ፡፡ ማንም የፈለገውን የማሰብ፣ የመናገርና የማብራራት መብት አለው፡፡ ይህንን መብት ለመገደብ ፍላጎቱም ሥልጣኑም የለኝ፡፡ ምን ነካኝ? ራስን መውቀስ ለመታረም ይበጃል፡፡

ውዷ ማንጠግቦሽ እንኳ፣ ‹‹ሰማህ የሰው ልጅ በነፃነት መኖር ሲጀምር ሐሳቡ የበሰለ ይሆናል፡፡ ስለዚህ ጽንፈኝነትና ጭፍንነት የነፃነት እጦት ምልክቶች ናቸው፤›› ስትለኝ ነበር የሰነበተችው። የጭፍን ተቃውሞና የጭፍን ፍቅር አካሄድ ምን ያህል እንደከፋ ስረዳ ሥጋት ይነግሥብኛል። ከምሁሩ የባሻዬ ልጅ ጋር ስንገናኝም ነገሩን ባነሳበት፣ ‹‹አሁንስ ነፍሴን እየቀፈፋት ያለው ነገር ይኼ የጭፍንነት ችግር ነው። ችግሩ የሚመነጨው ደግሞ ከመታፈን ነው፤›› አለኝ፡፡ ስንደማመጥ ከጨዋታችን ቁም ነገር እንደሚወለደው ሁሉ ስንከባበርና ሌላው የሠራውን ሥራ ዋጋ ስንሰጥ የታሪክ ቅብብሎሹ እየሰመረ ይሄዳል። መከባበርና ዕውቅና መስጣጠት የሚመጣው አንዱ የሌላኛውን ነፃነትና መብት ሲያከብር ነው፡፡ ‹‹ጭፍን ድጋፍና ተቃውሞ አርነት  ያልወጣ አዕምሮ መገለጫ ነው፤›› ያለኝ የባሻዬ ልጅ ነው፡፡ የነፃነትን ዋጋ በገንዘብና በጌጣጌጥ ባንተምነውም ነፃነትን ለማግኘት የሚከፈለው መስዋዕትነት በትዕግሥት የታጀበ መሆን እንዳለበት አይጠፋንም፡፡ ቆይ ቆይ ሰሞኑን እየወጡ ያሉትን የፖለቲከኞችን መጻሕፍት አይታችኋል? በደላላ አቅሜ ባለ ማስተርሶችና ባለ ፒኤችዲዎች የጻፉዋቸውን ገዝቼ እያነበብኩ ነበር፡፡ ጎበዝ በእኛ ባልተማርነውና በተማሩት መካከል ያለው ልዩነት የሰማይ ያህል ነው ብዬ ሳስብ ለካ ጎረቤት ኖረናል? ድሮ ድሮ ፍቅር እስ መቃብርና አልወለድምን በማንበብ ጀምሬ ብዙ ባልገፋም በመጠኑ አንብቤያለሁ፡፡ ለካ አላውቅም ስል ብዙ አውቅ ኖሯል? የባለ ማስተርሶቹና የባለ ፒኤችዲዎቹ መጻሕፍት ከፊደል ግድፈት እስከ ሐሳብ አለመቀናጀት ድረስ ስህተት በስህተት መሆናቸው ቢገርመኝ የባሻዬን ልጅ፣ ‹‹ምንድነው ችግሩ?›› ስለው፣ ‹‹የፈረደበት የትምህርት ጥራት ችግር ነው፤›› ብሎኝ አስደነገጠኝ፡፡ ትምህርት በመካከላችን ያለውን ልዩነት ማሳየት ካልቻለ የት ልንደርስ ይሆን?

ጨዋታ ካነሳን አይቀር ሰሞኑን ስለፌስቡክ የገጠመኝን ባጫውታችሁ አይከፋም። ፅድት ያለ ቪላ ቤት ለማከራየት አስቀድሞ ነግሮኝ ለነበረ ደንበኛዬ ደውዬ አሳወቅኩት። ቤቱን መጥቶ እንዲያየው አካባቢውን ነገርኩት። አንዳንዴ በቤት ጉዳይ ላይ እንደኛ ደላላ ሆናችሁ የቀጠራችሁት ሰው ተጣድፎ በቀጠራችሁት ሰዓት ሲመጣ ስታዩ ቀጠሮ ባለማክበር የምንታማው ሐሜት አይገባችሁም። መዘግየትና መክሸፍ ከኑሯችን እስከ ታሪካችን በየት በኩል እንደሚከሰቱ ማወቅ ያምራችኋል። አምሯችሁ ይቀራል እንጂ የኅብረተሰብ ሥነ ባህሪ ጥናትና ምርምር ድምፁ በማይሰማበት አገር ማን መልስ ይሰጣችኋል? ይኼንንም በትምህርት ጥራት ችግር አሳበን እንለፈው? 

 እና ደንበኛዬ ከተፍ ሲል ፍጥነቱ እያስደነቀኝ ቤቱን አሳየው ጀመር። ግቢውን ከቃኘ በኋላ ቪላው ውስጥ ሊገባ ሲል ስልኩ ጮኸ። ከአሁን አሁን ስልኩን ትቶ ቤቱን መጎብኘቱን ይቀጥላል ብዬ ብጠብቅ ቀጥ ብሎ ቆመ። ‹‹ምን ነው ችግር አለ?›› አልኩት ቢጨንቀኝ። ቀና ብሎ ሲያየኝ አጠገቡ ሰው መኖሩ ትዝ አለው መሰል፣ ‹‹ምን ልበላት?›› አለኝ ዓይን ዓይኔን እያየ። ‹‹ማንን?›› አልኩት ሰውዬው በአንዴ የት ሄዶ ነው እያልኩ (ዕድሜ ለቴክኖሎጂ ሰው ሁሉ ቀስ በቀስ ያለቪዛ በኔትወርክ ለጉድ ይበረዋል)፡፡ ለካስ የማያውቃት ኮረዳ በፌስቡክ የጋብቻ ጥያቄ እያቀረበችለት ኖሯል። መንግሥት እንኳን ስንቱን ነገር አባብሎ፣ ሸውዶ፣ አለዝቦ፣ በሕግና በደንብ አስደግፎ የልቡን እያስፈጸመ በሚኖርበት ዘመን የአንዳንዱ ሰው ውሳኔና ድፍረት ስታዩ ትበረግጋላችሁ። ለነገሩ ከመደበኛው መንግሥት የግለሰብ ‹‹መንግሥታት›› ስለበዙ ምንም የሚገርም ነገር የለውም። እናም የጋብቻ ጥያቄ በፌስቡክ ያውም ላይቭ (በቻት) መሆኑን ስሰማላችሁ ጮክ ብዬ ‹‹ጉድ በል›› አልኩ የዘመኑ አያያዝ እጅግ አስፈርቶኝ። ‹‹የአማርኛውን ነው የእንግሊዝኛውን ጉድ ነው በል የምትለኝ?›› አለኝ ደንበኛዬ መልሱን የነገርኩት መስሎት። ስንግባባ ሁለታችንም የሳቅ አምሮታችንን ተወጣነው። ሌላ ሌላውን ነው እንጂ መወጣት ያቃተን፡፡ 

‹‹በዚህ ዓይነትማ ጥሪውንና ግብዣውን ጭምር ‘ቻት’ ተክቶት ማረፉ ነው፤›› ብዬ ለአንድ ደላላ ወዳጄ ስለደንበኛዬ ባጫውተው፣ ‹‹ማን ያውቃል በዚህ ቀውጢ የኑሮ ውድነት ሳቢያ ደግሶ ማብላት ተረት ሆኖ ሊቀር ተቃርቦ ይሆናል፤›› አለኝ። ትንሽ ቆይቶ በምርጫ ጊዜም ለቆጠራና ለትዝብት አሻፈረኝ ባዩ ሲያይል ድምፅ በኮሮጆ መስጠት ተረስቶ ‘ኦንላይን’ በ ‘ላይክ’ የሚሆንበት ዘመን ይመጣም ይሆናል፤›› ሲለኝ ቴክኖሎጂና ዲሞክራሲ መቀራረባቸው ገባኝ! እንደ እውነቱ ከሆነ ደግሞ ዛሬ በቴክኖሎጂ መሣሪያዎች ጉድ ሲጎለጎል ነው የምናየው። ከዲሞክራሲ ተቃርነው በዲሞክራሲ ጥም ተቃጥለው አልበርድ ያሉ አብዮቶችን ዜና ሆኗል የምናዳምጠው። በአንድ በኩል መንግሥታት ለዲሞክራሲያዊ ሥርዓት የሚታገሉና ዋስ ጠበቃ እንደሚሆኑ ሲደሰኩሩ፣ በጎን ዜጎቻቸውን ሲሰልሉ፣ ሲያፍኑና ሲያስሩ የድኅረ ኢንተርኔቱን ትውልድ እንዳልቻሉት ያሳዩናል። የዓለም ፖለቲካና አካሄድ አልገባ ሲለኝ ደላላ እንጂ ፖለቲከኛ አለመሆኔን ለራሴ አስረድቼ ወደ ኑሮዬ እመለሳለሁ። ሥጋትና ተስፋ የነገው ኑሮዬና ቤቴ ላይ ዕጣ ሲጣጣሉ ሳይ ደግሞ መልሼ የጣልኩትን አነሳ እጀምራለሁ። ‘ስትሄድ ስከተላት’ ማለት ይኼ አይደል ታዲያ! አወይ ፖለቲካ!

እስኪ ደግሞ የሳምንት ሰው ይበለን። ከመሰነባበታችን በፊት ግን አንድ የኮንስትራክሽን አስመጪና ሻጭ የሆነ ደንበኛዬ ጠርቶኝ ሄጄ ያወጋነውን ላውጋችሁ። ከመድረሴ፣ ‹‹እንኳን ደስ አለህ አንበርብር›› አለኝ። ‹‹በአምላክህ ምን ተገኘ?›› ስለው፣ ‹‹የሁለት አኃዝ የኢኮኖሚ ዕድገታችን ከመለስ በኋላም ቀጥሏል፤›› አለኝ እየሳቀ። ‹‹የጠራኸኝ ለሥራ መስሎኝ?›› አልኩት ኮስተር ብዬ። በእውነት ሰው ታጥቆ ይኼን ያህል ነቆራ ላይ እንደዘመተው ሥራ ላይ ቢዘምት ምን ነበረበት? ‹‹ለሥራው ትደርስበታለህ ሦስት አዳዲስ ማሽኖች አስገብቻለሁ መተንፈሻ ነው የምታጣው፤›› ካለኝ በኋላ፣ ‹‹ስለሁለት አኃዝ ዕድገታችን ስናገር ለምን ተበሳጨህ?›› ብሎ ጠየቀኝ። ‹‹ወሬህ ሳይሆን አነጋገርህ ደስ ስላላለኝ ነው፤›› አልኩት ፊት ለፊት። ‹‹እኔም የሰማሁትን ነው እባክህ የነገርኩህ። የነገሮች ማነፃፀሪያና መለኪያው ሟቹ ጠቅላይ ሚኒስትር  እንደሆኑ ተደርገው ነው የሚወራው።  ይብላኝ ለቋሚዎቹ እንጂ እሳቸው እንደሆነ ምንም ተባለ ምንም ታሪክ የማይዘነጋቸው ሰው ናቸው። አንዳች ነገር ባለበት በማይቀጥልበት ዓለም ያውም በፖለቲካው ሜዳ ‘እሳቸው እንዳሉት’፣ ‘እሳቸውም እንዳለሙት’ እያሉ ጉዞ የት እንደሚያደርሰን በእውነቱ ግራ ያጋባል። ማርም ሲበዛ እኮ ይመራል፤›› አለኝና አዳዲስ ያስመጣቸውን ማሽኖች ፎቶ ያሳየኝ ጀመረ። ዓይኔ ፎቶዎቹ ላይ ልቤ አባባሉ ላይ ቀረ። ዓይንና ልብ የተራራቁበት ጊዜ ስንቱን ያሳየን ይሆን? መልካም ሰንበት!